Türkiyəyə yardım aparan azərbaycanlı xeyriyyəçi: “Əziz Türkiyəmiz, biz səninləyik”

“Azərbaycan-Türkiyə qardaşlığı bütün Türk və İslam dünyası üçün nümunədir, böyük örnəkdir”.

Reyting.az xəbər verir ki, bunu tanınmış xeyriyyəçi, mərhum professor Fəxrəddin Cavadovun oğlu Gülmirzə Cavadov deyib.

G. Cavadov bildirib ki, Türkiyədə baş verən dəhşətli faciənin fəsadlarını hər birimiz müşahidə etdik və bu, Azərbaycan xalqının çox sarsıtdı.

“Azərbaycanın dövlət başçısı cənab İlham Əliyev tərəfindən dərhal başlanan qardaş dəstəyi çağırışına qoşulmağı özümüzə borc bilib, dərhal yaxın dostlar ilə maliyyə toplamağa qərar verdik. “Bir millət - iki dövlət” prinsipinə sadiq qalaraq, qardaş Türkiyədəki bu kritik vəziyyətdə əlimizdən gələn etmək üçün kampaniyaya başladıq”, - deyə G. Cavadov əlavə edib.

Onun sözlərinə görə, ən əsas məqsəd fəlakətdən sonra çox ağır vəziyyətlə üzləşmiş qardaş və bacılarımıza köməklik göstərməkdir:

“Əsas hədəfimiz Azərbaycan boyda ərazini yerlə-yeksan edən dağıdıcı zəlzələnin bir neçə nöqtəsinə birbaşa gəlib, orada ən təcili ehtiyac duyulan vacib ləvazimatları qardaş və bacılarımıza birbaşa təqdim etmək, onlara mənəvi dəstək göstərməkdir.

Hazırda 4 böyük TIR ilə 2 milyon TL dəyərində ən çox ehtiyac duyulan ərzaq və qida məhsulları, həmçinin 10 ədəd dizel generatoru, böyük və uşaqlar üçün isti gış qiyimləri, qış botları, yastıq və yorğan, su depoları, bir çox təmizlik maddələri, antıseptik, müxtəlif gigiyenik bezlər, 68 ton içməli su, süngər yataqlar, 1400 nəfərlik quru yemək dəsti, yaşayış konteynerləri və digər zəruri ləvazimatlar bölgəyə tərəfimizdən birbaşa gətirilib. Yardımın bir hissəsi 15 və 16 fevral tarixlərində Hatay vilayətinin inzibati mərkəzi Antakyaya, bundan başqa da İskenderun şəhərlərində əhaliyə çatdırılıb. Bundan əlavə, zəlzələdən ən çox zərər çəkmiş Antakya şəhərində günlük 10.000 nəfərə isti yemək gətiriləcək və davamlı olaraq paylanacaqdır. Zəlzələdən zərər çəkmiş digər bölgələrə də yardım göstərmək üçün əlimizdən gələni etməyə çalışırıq”.

Cavadov onu da bildirib ki, əlavə olaraq 230 min türk lirəsi dəyərində olan ayrıca 21 ədəd generator, əl fənərləri, yataq dəstləri Türkiyə dövlət qurumu AFAD vasitəsilə 18 fevral tarixində Qazıantepdə təqdim edilib.

“Biz - millətimizi, iki dövlətimizi sevən vətəndaşlar olaraq həm dövlətimizin başçısının çağırışına qoşulur, həm də bütün dünyaya Azərbaycan-Türkiyə birliyinin nə qədər böyük güc olduğunu göstərmək üçün buradayıq. Əsas məqsədimiz buradakı qardaş və bacılarımıza əlimizdən gələn köməyi göstərməkdir. Canımız, əziz Türkiyəmiz, biz səninləyik”, - Cavadov bildirib.

Xatırladaq ki, fevralın 6-da Türkiyədə səhər saatlarında 7.7 bal gücündə zəlzələ baş verib. Dərinliyi 7 kilometr olduğu müəyyən edilən zəlzələ Hatay, Qaziantep, Kilis, Osmaniye, Malatya, Adıyaman, Şanlıurfa, Diyarbəkir, Adana və Kahramanmaraş vilayətlərində ciddi dağıntılara səbəb olub.

Qeyd edək ki, Türkiyədə zəlzələ nəticəsində həlak olanların sayı 41 020 nəfərə çatıb.

ELÇİN
Reyting.az

Ana səhifəyə dön