Türkiyə dövlətinin pulları 41 yaşlı qadın həvalə edilib

Maliyyə sıxıntısı və milli valyutanın devalvasiyasının yaşandığı qardaş Türkiyədə Hafize Qaye Erkan ölkənin Mərkəzi Bankının rəhbəri təyin edilib. Prezident Ərdoğanın bununla bağlı qərarı artıq ictimaiyyətə təqdim edilib. Beləliklə, Hafize Gaye Erkan Türkiyə Mərkəzi Bankın İdarə Heyətinin sədri, keçmiş sədr Şahap Kavcıoğlu isə Bank İşini Tənzimləmə və Nəzarət Şurasının sədri vəzifəsinə təyinat alıblar.

Reyting.az xatırladır ki, Hafize Qaye Erkanın işlədiyi Amerikadan Türkiyəyə gətirilməsi və ona bu postun təklif edilməsinin təşəbbüsü indiki hökumətdə xəzinə və maliyyə naziri təyin olunan Mehmet Şimşəkdən gəlib. Şimşək Türkiyənin indiki çətin günlərində maliyyə naziri məsuliyyətini üzərinə o şərtlə götürüb ki, xarici maliyyə qurumlarında işləyən türklər ölkəyə cəlb ediləcək və onlar müvafiq sahədə irəli çəkiləcək, eləcə də ölkə rəhbərləri bank və pul siyasətinə sərt müdaxilə etməyəcək.

Qeyd edək ki, xaricdə mühüm maliyyə karyerasına malik olan Hafize Qaye Erkan Mərkəzi Bankın tarixində ilk qadın rəhbərdir. Bundan başqa, Mərkəzi Bankın sədri təyin olunan Hafize Qaye Erkanın rəsmi “Twitter” hesabı yoxdur.

1982-ci ildə İstanbulda anadan olan Erkan İstanbul Oğlan Liseyini bitirdikdən sonra 2001-ci ildə Boğaziçi Universitetinin Sənaye Mühəndisliyi fakültəsini bitirib. Təhsilini ABŞ-da davam etdirən Erkan 2005-ci ildə Prinston Universitetində əməliyyat tədqiqatları və maliyyə mühəndisliyi üzrə doktorluq dərəcəsi alıb. Erkan Harvard Biznes Məktəbində idarəetmə elmləri və Stenford Universitetində liderlik üzrə iki təlim proqramını bitirib. Karyerasına 2005-ci ildə “Goldman Sachs”da başlayan Erkan, işlədiyi müddətdə ABŞ-ın böyük banklarının və sığorta şirkətlərinin idarə heyətlərində təmsil olunub, idarə heyətinə balansın idarə edilməsi, stress testi və kapitalın planlaşdırılması, risklərin idarə edilməsi, birləşmə və satınalmalar üzrə məsləhət xidmətləri göstərib. Burada 9 il işləyib.

2014-cü ildə “First Republic Bank”-da işə başlayan Erkan, 8 ilə yaxın orada həmsədr, icraçı direktor, sədr, idarə heyətinin üzvü, investisiya direktoru, depozit direktoru və risk üzrə direktor vəzifələrində çalışıb.

Baş ofisi ABŞ-da yerləşən zərgərlik şirkəti “Tiffany & Co”-da 2 il idarə heyətinin üzvü olan Erkan, 2022-ci ildə Fortune 500-ə daxil olan qlobal maliyyə məsləhət şirkəti “Marsh McLennan”-ın idarə heyətində təmsil olunub.

“San Francisco Business Times”ın 2018-ci il araşdırmasına görə, Amerikanın ən böyük 100 bankında prezident və ya digər titulu daşıyan 40 yaşından kiçik yeganə qadın olan Erkan, “40 Yaş Altı 40 Siyahısına” daxil edilib. Eyni zamanda “Crain New York Business”in “40 yaşından aşağı 40 qadın” siyahısında yer alıb.

O, 2019-cu ildə “Bankçılıq və Maliyyə Sektorunda Əhəmiyyətli Qadınlar Siyahısı” və Amerikalı Bankirin “İzləniləcək Qadınlar Siyahısı”na daxil edilib.

Bankçılıq, investisiya, risklərin idarə edilməsi, texnologiya və rəqəmsal innovasiya sahələrində təcrübəyə malik olan Erkan Princeton Universitetinin Əməliyyat Araşdırmaları və Maliyyə Mühəndisliyi Departamentinin Məsləhət Şurasında da xidmət edir.

ELÇİN

Ana səhifəyə dön