Erməni ekspertlər iddia edirlər ki, Ermənistanda Azərbaycan benzinini satmaq üçün süni maye qaz çatışmazlığı yaradıla bilər.

Reyting.az xəbər verir ki, bu məsələni Ermənistanda nəşr olunan “Jogovurd” qəzeti gündəmə gətirib.

“Bir gün əvvəl maye qazın qiyməti 30-40 dram artdı və axşama doğru yanacaqdoldurma məntəqələrində maye qaz qıtlığı yarandı”,- nəşr bildirir.

Günün sonuna qədər maye qazın qiyməti tədricən 250 dram səviyyəsinə qalxıb. Sürücülər həyəcan təbili çalaraq xəbərdarlıq edirlər ki, bu tendensiya davam edərsə, qıtlıq yaranacaq və bu da Azərbaycan benzininin daha da sürətlə satılmasına səbəb olacaq.

Ermənistan Rəqabət və İstehlakçıların Hüquqlarını Müdafiəsi Komissiyasının sədri Geqam Gevorqyan qiymət artımının səbəblərindən biri kimi Yuxarı Lars keçid məntəqəsinin bağlanmasını göstərib.

Xatırladaq ki, Ermənistan maye qazı əsasən Rusiyadan, həmçinin İran və İraqdan idxal edir.

V. QULİYEV