Sürətli bərpa işləri - Qarabağdan Şərqi Zəngəzuradək...

Azərbaycanın iqtisadi inkişafı, azad edilmiş əraziləri dirçəltmək imkanı ilə yanaşı, ölkəmiz üçün yeni əməkdaşlıq prespektivləri yaradır.

Ölkə başçısı cənab İlham Əliyevin apardığı uğurlu siyasət nəticəsində ölkəmizin hərtərəfli inkişafı təmin olunub. Paytaxtla yanaşı regionların inkişafını daim diqqətdə saxlayan dövlət başçısı cənab İlham Əliyev tez-tez bölgələrə səfərlər edir, regionlarda infrastruktur layihələrin inşası istiqamətində mühüm işlər görülür. Regionların Sosial-İqtisadi İnkişafı Dövlət Proqramlarının icrası ilə bağlı verilən tapşırıqların icrası yerində yoxlanılır.

Son illər ərzində Azərbaycan Prezidenti bölgələrə yüzlərlə səfər edib. Səfərlər zamanı baş tutan açılışlar, təməlqoyma mərasimləri görülmüş işlərin həcmini və ölkənin hərtərəfli inkişafını göstərir.

Respublikamızın digər bölgələri kimi Füzuli rayonunda da Regionların Sosial-İqtisadi İnkişafı Dövlət Proqramı uğurla icra olunub. Rayonda iri infrastruktur layihələr inşa edilib, yollar asfaltlanıb, qazlaşma və elektik enerjisi ilə təminat 100 faizə çatdırılıb. Yeni yollar, içməli su xətləri çəkilib, xəstəxanalar, sosial obyektlər tikilib, iş yerləri yaradılıb, yəni, bu bölgə sürətlə inkişaf edir və işlər plan üzrə gedir.

Ölkə başçısının sərəncamı ilə Horadiz şəhərinin və ətraf kəndlərin içməli su sistemi yenidən qurulub və əhali 24 fasiləsiz içməli su ilə təmin olunub.

Qeyri-neft sektorunun inkişafı, aqrar sahənin canlandırılması ilə bağlı ölkə başçısı cənab İlham Əliyevin atdığı mühüm addımlar Füzuli rayonunda da öz müsbət nəticələrini göstərir. Bildiyimiz kimi, rayonumuz tarixən aqrar rayon olub. Məhz bu səbəbdən aqrar sahənin inkişafı ilə bağlı görülən mühüm işlər Füzuli rayonunda uğurlu nəticələr verib. Ənənəvi təsərrüfat sahələrindən olan taxılçılq, baramaçılıq, pambıqçılıq dirçəldilib, əhalinin yaşayış səviyyəsi yüksəlib. Son illərin statistikasına nəzər salsaq görərik ki, rayonumuzda hər il 100 min tondan yuxarı taxıl istehsal olunur. Füzuli kümçüləri son 3 il ərzində rayonumuzda 120 tona yaxın barama istehsal ediblər. Bu da görülmüş işlərin, islahatların nəticəsidir. Çünki dövlət dəstəyi olmadan kənd təsərrüfatı istənilən qədər inkişaf edə bilməz.

Rayonumuzun ərazisində 2700 ha sahəni əhatə edən aqroparkın salınması, iri taxılçılıq təsərrüfatlarının yaradılması, yeni Barama Qəbulu Məntəqəsinin tikilməsi məhsuldarlığın artmasına təkan verir.

Bəllidir ki, 44 günlük Vətən müharibəsi Azərbaycanın haqq işinin Zəfəri ilə yekunlaşdı. Müzəffər Ali Baş Komandan cənab İlham Əliyevin rəhbərlik etdiyi Azərbaycan Ordusu torpaqlarımızı düşmən işğalından azad etdi. 30 ilə yaxın düşmən əsarətində qalmış digər ərazilərimiz kimi Füzuli şəhəri və 61 kəndimiz işğalçılardan təmizləndi, Füzuli sakinlərinin də doğma el-oba həsrətinə son qoyuldu. İndi artıq dövlətimiz tərəfindən rayonumuzun işğaldan azad edilmiş ərazilərində tikinti-quruculuq, bərpa işləri aparılır. Ərazimizdə nəhəng nəqliyyat infrastrukturu yaradılır, magistral yollar, həmçinin xüsusi strateji əhəmiyyətə malik Horadiz-Ağbənd dəmir yolu çəkilir. İşğaldan azad edilmiş ərazilərdə ilk Beynəlxalq Hava Limanı da məhz bizim rayonda tikilir.

Ölkə başçısı cənab İlham Əliyev tərəfindən Füzuli yarımstansiyasının açılışı artıq reallaşıb. Bu ilin sonuna qədər həm Qarabağda, həm də Şərqi Zəngəzurda bütün elektrik təsərrüfatı qurulacaq. Yeni xətlər, ötürücü xətlər, transformatorlar, yarımstansiyalar və elektrik stansiyaları qurulacaqdır. Ermənilərin Kəlbəcər və Laçın rayonlarında onlara iki həftə möhlət veriləndən sonra yandırıb dağıtdıqları 12 su elektrik stansiyası bərpa olunacaq. Bundan sonra yaşıl enerji layihəsi icra ediləcək. 200 meqavatlıq günəş elektrik stansiyasının xarici şirkətin vəsaiti hesabına tikintisi ilə bağlı razılıq əldə olunub. Bu, çox önəmli hadisədir. Eyni zamanda, başqa şirkətlər üçün də bir siqnaldır.

Hazırda Qarabağ və Şərqi Zəngəzur iqtisadi zonalarının sürətli bərpası davam edir. Aydın məsələdir ki, bütün bu işlər böyük maliyyə vəsaiti tələb edir. Ölkəmizin güclü iqtisadi potensiala malik olması və bu potensialın düzgün istiqamətləndirilməsi, valyuta ehtiyatlarımızın artırılması, qeyri-neft ixracının artması nəticəsində bütün bu işləri həyata keçirtmək mümkün olur. Bu gün ölkəmizdə bütün xərclərə ciddi nəzarət mövcuddur. Nəticədə israfçılığa, lazımsız xərclərə yol verilməsi mümkün deyil.

Prezident İlham Əliyevin apardığı uğurlu xarici siyasət nəticəsində ölkəmizin beynəlxalq nüfuzu daha da yüksəlib, möhtəbər beynəlxalq təşkilatların və şirkətlərin Azərbaycana olan marağı artıb. Məhz bunun nəticəsidir ki, işğaldan azad edilmiş ərazilərdə aparılan geniş tikinti-quruculuq işlərinə xarici şirkətlər də qoşulublar. Xüsusilə qardaş Türkiyə dövlətinin şirkətləri azad edilmiş ərazilərimizin bərpasında fəallıq nümayiş etdirirlər. Bu isə ölkələrimiz arasında tarixi köklərə əsaslanan dostluq, qardaşlıq münasibətlərinin daha bir nümunəsidir.

Əminik ki, dövlət başçımızın uğurlu siyasəti, artan iqtisadi gücümüz sayəsində Qarabağda aparılan quruculuq işləri tez bir zamanda müvəffəqiyyətlə yekunlaşacaq. İşğaldan azad edilmiş digər ərazilərimiz kimi Füzuli rayonu da həm iqtisadi cəhətdən, həm turizm imkanlarının genişlənməsi baxımından yüksək tərəqqi dövrü yaşayacaqdır.

Rafiq Məstəliyev,
Füzuli rayon Statistika idarəsinin rəisi

Ana səhifəyə dön