Deputat hökumətə səslənib: “Sənədsiz evləri sənədləşdirin!”

"2022-ci il dövlət büdcəsi bir neçə gündür komitələrin birgə iclaslarında müzakirə olunur. Bu, əsas hədəfləri əhatə edən, bugünkü reallığın diktə etdiyi bir çox məsələlərin həllinə yönələn dolğun və mükəmməl bir sənəddir. Bu xüsusda sənədə əsasən, işğaldan azad olunmuş ərazilərin bərpası və yenidən qurulmasının, ölkənin müdafiə potensialının gücləndirilməsinin və eyni zamanda, əhalimizin sosial müdafiəsinin və sosial təminatının gücləndirilməsinin ölkə rəhbərliyinin xüsusi diqqətində olması tərəfimizdən birmənalı olaraq dəstəklənir. Təbii ki, mən büdcə layihəsinə səs verəcəm və həmkarlarımı da səs verməyə dəvət edirəm. Bununla yanaşı, ölkə üzrə bir çox vətəndaşlarımızı narahat edən problemi səsləndirmək istərdim, bu da sənədsiz evlərin sənədləşdirilməsi ilə bağlıdır".

Reyting.az xəbər verir ki, bunu deputat Kamran Bayramov parlamentdə büdcə müzakirəsi zamanı deyib.

Sənədsiz evlərin sınədləşdirilməsini təklif edən deputat bildirib ki, ölkə üzrə yüz minlərlə sənədsiz ev var: "Hələ 2011-ci ilin mart ayında Bakı Şəhər İcra Hakimiyyətində keçirilən müşavirədə cənab prezident rəsmi icazə olmadan tikilmiş evlərin sənədləşdirilməsi ilə bağlı hökumətə xüsusi tapşırıq verib və onun icrası istiqamətində müəyyən işlər də görülüb. Belə ki, “Daşınmaz əmlakın dövlət reyestri haqqında” Qanuna 2015-ci ildə edilmiş dəyişikliklə sənədsiz evlərin qeydiyyatı asanlaşdırılıb. Eyni zamanda, cənab prezidentin 2015-ci və 2019-cu illərdə imzaladığı müvafiq fərmanlara əsasən 200 minə yaxın fərdi yaşayış evi və mənzil sənədləşdirilib".

Deputat əlavə edib ki, bundan başqa Prezident Administrasiyasının rəhbəri tərəfindən 2019-cu ildə təsdiq edilmiş Tədbirlər Planına uyğun olaraq sənədsiz tikililər və onların yerləşdiyi torpaq sahələrinin qeydiyyatı məqsədilə yerli ekspert komissiyalar formalaşdırılıb, İqtisadiyyat Nazirliyi tərəfindən sənədsiz tikililərin inventarlaşdırılması işinə başlanılıb və pandemiyanın başlandığı dövrədək Bakıda 163 mindən artıq, regionlarda təxminən 2 min yaşayış məntəqəsi üzrə 75 minə yaxın sənədsiz ev və mənzil, ümumilikdə isə 240 minə yaxın fərdi əmlak invertarlaşdırılıb. Təəssüf ki, pandemiya ucbatından inventarlaşma prosesi ləngiyir: "Düşünürəm ki, sənədsiz evlərə əmlak amnistiyasının tətbiqi bir çox problemlərin həllinə səbəb olacaq - vətəndaşların əmlakları üzərində sərəncam vermək hüququnu təmin edəcək, ölkənin daşınmaz əmlak bazarını canlandıracaq, bələdiyyələrin yığdığı fiziki şəxslərin torpaq və əmlak vergiləri üzrə vergitutma bazasını genişləndirəcək, yerli büdcələrə və dövlət büdcəsinə daxil olan vəsaitlərin əhəmiyyətli dərəcədə artmasına xidmət edəcəkdir”.

Deputat qeyd edib ki, eyni ləngimə bələdiyyə torpaqları üzərində mülkiyyət sənədlərinin və xəritələrin verilməsi prosesində də yaşanır: “Bununla əlaqədar, sənədsiz evlərin sənədləşdirilməsi və bələdiyyə torpaqları üzərində mülkiyyət sənədlərinin və xəritələrin verilməsi işinin tezliklə başa çatdırılması məqsədilə 2022-ci il dövlət büdcəsində İqtisadiyyat Nazirliyinə ayrılması nəzərdə tutulan vəsaitin artırılmasını xahiş etmək istərdim".

O, eyni zamanda, diqqəti təmsil etdiyi Şəmkir və Daşkəsən rayonlarında yaşayan əhalini narahat edən problemlərdən birinə cəlb edərək qaz təchizatı ilə bağlı məsələnin həllini hökumət qarşısında qaldırıb.

Ana səhifəyə dön