Əmək bazarının vəziyyəti təhlil olunub

“Azərbaycan Respublikasında son illərdə həyata keçirilən sosial-iqtisadi siyasətin əsas istiqamətlərindən biri də məşğulluğa dair siyasətin həyata keçirilməsi və işçi qüvvəsindən səmərəli istifadə edilməsidir. Son illər rayon iqtisadiyyatında aparılan islahatlar nəticəsində əmək bazarında əhəmiyyətli dərəcədə müsbət dəyişikliklərə nail olunub. Əsas məqsəd əhalinin sosial rifahı və həyat səviyyəsinin daha da yüksəldilməsinin həyata keçirilməsindən ibarətdir. Əhalinin məşğulluğunu təmin etmək məqsədilə yeni iş yerləri, müəssisələr, infrastruktur obyektləri yaradılıb”.

Reyting.az xəbər verir ki, bu fikirlər Füzuli Rayon Statistika İdarəsinin rəisi Rafiq Məstəliyevin 2021-ci ilin on ayında əmək bazarının vəziyyəti haqqında təhlil məruzəsində bildirilir.

Təhlil məruzədə qeyd olunur ki, 2021-ci ilin noyabr ayının 1-dək rayonda 448 yeni iş yeri açılıb. Daimi iş yerlərinin 4-ü yeni yaradılmış müəssisə və təşkilatlarda, 85-i mövcud müəssisə və təşkilatlarda, 359-u isə fiziki şəxslərdə olub.

Bildirilir ki, sosial-iqtisadi inkişaf istiqamətində həyata keçirilən tədbirlər nəticəsində əhalinin iqtisadi fəallığının, o cümlədən məşğulluq səviyyəsinin artması, işsizlərin sayının azalması müşahidə edilib. Belə ki, 2021-ci il noyabr ayının əvvəlinə rayonda mövcud 65,1 min iqtisadi fəal əhalinin 60,2 min nəfəri iqtisadi əmək fəaliyyəti ilə məşğul olub.

İqtisadi islahatlar və iqtisadiyyatda baş verən struktur dəyişiklikləri nəticəsində məşğul əhalinin qeyri-dövlət sektorundakı payı artaraq 84,5 faizə çatıb.

Əhalinin iqtisadi fəallığına dair Füzuli Rayon Statistika İdarəsi tərəfindən aparılan seçmə müayinənin nəticələri göstərir ki, məşğul əhalinin 47,6 faizini kişilər, 52,4 faizini qadınlar təşkil edir. İqtisadiyyatda məşğul olanların 11,5 faizi şəhər, 88,5 faizi isə kənd sakinləridir.

Müayinə aparılan dövrdə əhalinin iqtisadi fəallığının səviyyəsi 79,3 faiz, məşğulluğun səviyyəsi 97,3 faiz, işsizliyin səviyyəsi isə 2,7 faiz təşkil edib.

Qeyd olunur ki, 2021-ci ilin on ayında Füzuli rayonunun iqtisadiyyatında muzdlu işçilərin sayı əvvəlki ilin müvafiq dövrü ilə müqayisədə 174 nəfər azalaraq 9406 nəfər olub. Bu da məşğul əhalinin 16,6 faizini təşkil edir. Muzdlu işçilərin 92,8 faizi və ya 8732 nəfəri dövlət sektorunda çalışıb. Qeyri-dövlət sektorunda çalışanların sayı 674 nəfər və ya 7,2 faiz olub.

İdarə rəisinin məruzəsində qeyd olunur ki, iqtisadi fəaliyyət növü üzrə muzdla işləyənlərdən 45,6 faizi təhsildə, 2,6 faizi topdan və pərakəndə ticarət; avtomobillərin və motosikletlərin təmiri sahəsində, 12,4 faizi əhaliyə səhiyyə və sosial xidmətlərin göstərilməsi sahəsində, 5,7 faizi dövlət idarəetməsi və müdafiə; sosial təminat sahəsində, 5,7 faizi sənayedə, 10,2 faizi kənd təsərrüfatı, meşə təsərrüfatı və balıqçılıq sahəsində, 2,1 faizi tikintidə, 0,2 faizi informasiya və rabitə sahəsində, 0,2 faizi maliyyə və sığorta fəaliyyətində, 15,3 faizi isə digər sahələrdə çalışıb.

Muzdla işləyənlərin əksəriyyəti iri və orta müəssisələrdə əmək fəaliyyəti ilə məşğul olub.

Müəssisə və təşkilatlarda çalışan işçilərin 4893 nəfərini, yəni 52,0 faizini qadınlar təşkil edir.

2021-ci ilin on ayında rayonda muzdla işləyənlərin orta aylıq nominal əməkhaqqı 460,4 manat təşkil edib. Dövlət sektorunda çalışanların orta aylıq nominal əməkhaqqı 461,6 manat təşkil edib ki, bu da ötən ilin müvafiq dövrü ilə müqayisədə 6,4 faiz çoxdur. Qeyri-dövlət sektorunda çalışanların orta aylıq əməkhaqqı isə keçən ilin eyni dövrü ilə müqayisədə 7,3 faiz artaraq 440,0 manat təşkil edib.

Orta aylıq nominal əməkhaqqı kənd təsərrüfatı, meşə təsərrüfatı və balıqçılıq sahəsində 381,4 manat, emal sənayesində 222,4 manat, elektrik enerjisi, qaz, buxar və kondisiyalaşdırılmış hava ilə təchizat sahəsində 709,5 manat, su təchizatı və tullantıları təmizlənməsi sahəsində 408,6 manat, tikintidə 371,5 manat, topdan və pərakəndə ticarət; avtomobillərin və motosikletlərin təmiri sahəsində 469,4 manat, nəqliyyat və anbar təsərrüfatı sahəsində 294,4 manat, informasiya və rabitə sahəsində 319,1 manat, maliyyə və sığorta fəaliyyətində 1114,8 manat, peşə, elmi və texniki fəaliyyət sahəsində 411,7 manat, inzibati və yardımçı xidmətlərin göstərilməsi sahəsində 286,9 manat, dövlət idarəetməsi və müdafiə sahəsində 601,7 manat, təhsildə 481,9 manat, səhiyyə və sosial təminat sahəsində 457,0 manat, digər sahələrdə xidmətlər üzrə 563,2 manat olub.

Rayon iqtisadiyyatının sənaye sektorunda 2021-ci ilin on ayında 533 nəfər muzdlu işçi çalışıb və onların 19,9 faizi qeyri-dövlət sənaye müəssisələrində cəmləniblər. Emal bölməsində 182 nəfər, elektrik enerjisi, qaz, buxar və kondisiyalaşdırılmış hava ilə təchizat bölməsində 144 nəfər, su təchizatı; çirkli suların və tullantıların təmizlənməsi bölməsində isə 207 nəfər işləyib. 2021-ci ilin əvvəlindən sənaye sahəsində çalışan işçilərin orta aylıq əməkhaqqı 412,6 manat olub. Dövlət sektorunda çalışan işçilərin orta aylıq əməkhaqqı məbləği 439,8 manat, qeyri-dövlət sənaye müəssisələrində çalışanların orta aylıq əməkhaqqı məbləği isə 285,3 manat təşkil edib.

2021-cı ilin on ayında nəqliyyat və anbar təsərrüfatı müəssisələrində işləyən 49 nəfər muzdlu işçinin hamısı dövlət müəssisələrində çalışıb. 2020-ci ilin müvafiq dövrü ilə müqayisədə nəqliyyatçıların orta aylıq əməkhaqqı 7,0 faiz artaraq 294,4 manat olub.

İnformasiya və rabitə müəssisələrində işləyənlərin sayı 21 nəfər, bir işçinin orta aylıq əməkhaqqı isə 328,8 manat olub.

Qeyd edilən dövr ərzində tikinti sektorunda işçilərin sayı 189 nəfər təşkil edib, onların 169 nəfəri və ya 89,4 faizi dövlət mülkiyyətinə, 20 nəfəri və ya 10,6 faizi isə qeyri-dövlət mülkiyyətinə məxsus tikinti müəssisələrində cəmlənib. 2021-ci ilin on ayında inşaat sektorunda çalışan işçilərin orta aylıq nominal əməkhaqqı 385,7 manata çatmış və 2020-ci ilin müvafiq dövrü ilə müqayisədə 11,0 faiz azalıb. Bu göstərici dövlət mülkiyyətində olan müəssisələrdə 384,6 manat, qeyri-dövlət mülkiyyətində olan tikinti müəssisələrində isə 395,5 manat təşkil edib.

1 noyabr 2021-ci il vəziyyətinə rayonda kənd təsərrüfatı, meşə təsərrüfatı və balıqçılıq müəssisələrində çalışan işçilərin sayı 960 nəfər olub və onlara hesablanan əməkhaqqı fondunun məbləği 346,6 min manat təşkil edib. Onlardan 779 nəfəri dövlət bölməsində, 181 nəfəri isə qeyri-dövlət bölməsində çalışıb. Əvvəlki ilin müvafiq dövrü ilə müqayisədə kənd təsərrüfatı, meşə təsərrüfatı və balıqçılıq sahəsində orta aylıq əməkhaqqı 5,1 faiz artaraq 361,0 manat təşkil edib. Dövlət müəssisələrində işləyənlərin orta aylıq əməkhaqqı 324,4 manat olub.

2021-ci ilin on ayında topdan və pərakəndə ticarət; avtomobillərin və motosikletlərin təmiri sahəsində çalışan işçilərin sayı 271 nəfər olub və onların orta aylıq əməkhaqqı 489,0 manat təşkil edib.

Maliyyə və sığorta fəaliyyəti sahəsində çalışan işçilərin sayı 21 nəfər olub və keçən ilə nisbətən onların sayı 15,0 faiz artıb, orta aylıq əməkhaqqı isə 14,6 faiz yüksələrək 1568,7 manata çatıb. Dövlət sektorunda işləyənlərin əməkhaqqı 410,0 manat, qeyri-dövlət sektorunda işləyənlərin əməkhaqqı isə 1690,7 manat olub.

Dövlət idarəetməsi və müdafiə; sosial təminat bölməsində işləyənlərin sayı 525 nəfər olub və onların sayı 2020-ci ilin müvafiq dövrünə nisbətən 6,6 faiz azalıb, orta aylıq əməkhaqqı 4,7 faiz artaraq 570,3 manat təşkil edib.

Təhsil bölməsində işçilərin sayı 4329 nəfər olub və əvvəlki ilə nisbətən 2,6 faiz azalıb. Orta aylıq əməkhaqqı əvvəlki illə müqayisədə 14,0 faiz artaraq 504,5 manata çatıb.

Əmək siyasəti və əməyin ödənilməsi sahəsində həyata keçirilən islahatlar nəticəsində işləyənlərin orta aylıq əməkhaqqının ilbəil artması əhalinin həyat səviyyəsinin yüksəldilməsini təmin edib. 2021-cı ilin on ayında rayonun iqtisadi və sosial sahələrində muzdla işləyənlərin orta aylıq nominal əməkhaqqı 2020-ci ilin müvafiq dövrünə nisbətən 6,4 faiz artaraq 460,0 manata çatıb. Sənaye, maliyyə və sığorta fəaliyyəti, informasiya və rabitə, nəqliyyat və anbar təsərrüfatı sahələrində orta aylıq nominal əməkhaqqı rayon üzrə orta göstəricidən yüksək olub.

Ana səhifəyə dön