Deputat su təchizatı üçün ayrılan vəsaitin xərclənmə mexanizmindən şübhələnir

“Diqqəti məsələnin önəminə çəkmək üçün Yaponiya hökuməti ilə bağlanan “kiçik şəhərlərdə su təchizatı və kanalizasiya layihəsi”nin əleyhinə səs verəcəm. Demək olar ki, dövlət müəssisələrinin Azərbaycan hökumətinin zəmanəti ilə aldığı kreditlərin effektivliyi və ya qeyri-səmərəliliyi barədə şəxsən mənim heç bir məlumatım yoxdur. Əldə etmək üçün də açıq bir resurs mövcud deyil. Ümumiyyətlə, ən vacib məsələ bu günə qədər alınan kreditlərlə bağlı müfəssəl, şəffaf və görülən işləri əks etdirən hesabatın cəmiyyətə açıqlanmamasıdır. Biz bilmək istərdik ki, kredit alan müəssisələrin nə qədər borcu var, o kreditlərlə hansı işlər görülüb, hansı yarımçıq qalıb və ya kökündən edilməyib”.

Reyting.az xəbər verir ki, bunu Milli Məclisin bu gün keçirilən iclasında deputat Razi Nurullayev deyib.

Deputat fikirlərini davam etdirərək bildirib ki, borcun məbləği barədə dolaşıq məlumatlar verilir: “Borcun nə qədər olduğunu başa düşmək üçün gərək 3-4 maliyyəçi ekspert dəvət edib hərəsinə bir kalkulyator verəsən ki, onlar yüzlərlə səhifə sənədləri araşdırıb rəqəmləri və faizləri hesablasınlar. Məgər asan başa düşülən, real rəqəmləri əks etdirən statistika vermək olmaz? Niyə jurnalistlər, deputatlar, ekspertlər və digər maraqlı dairələr hər şeyi ehtimal üzərində qurmalıdır? Üzümü Maliyyə Nazirliyinə tutub deyirəm: “Bizə bu günə qədər götürülən kreditlərin səmərliliyi və ya əksi barədə məlumatı təqdim edin. Bunları tapa bilmirəm, varsa haradadır, yerini deyin. Bunu təcili etmək lazımdır. Bu məsələyə aydınlıq gətirilməsə, bütün bu tip layihələrin əleyhinə səs verəcəm və həmkarlarımı da bu məsələnin ciddiliyinə varmağa səsləyirəm. Səmərəsini və görülən işlərin şəffaf hesabatını bilmədiyiniz işdə iştirakçı olmayaq”.

R. Nurullayev əlavə edib ki, qoy müstəqil ictimai təşkilatlar, hətta beynəlxalq qurumlar bu məsələni qiymətləndirsinlər: “Borc verən maliyyə institutlarının apardığı monitorinq də həqiqəti əks etdirmir. Çünki, onlar monitorinqi dövlət qurumları ilə əməkdaşlıq şəraitində edir. Dövlət qurumları da onlara göz oxşayan, rəngli, qalın şəffaf kağızda əks olunan məlumatları təqdim edir. Bəzən kağızlarda əks olunan, layihənin keçirilməsindən məmnun olan o adamlar heç bizimkilərə oxşamır. Haradansa tapıb yapışdırırlar ora.

Hər bir kredit bu xalqın cibindən, mayasından gedir və onun üçün də hesabatlılığı ən yüksək səviyyədə olmalıdır. Hesabatlılığı şəffaf olmayan layihələrə səs vermək rəhbərlik etdiyim Milli Cəbhə Partiyasına da məsuliyyət yaradır. Bu baxımdan əleyihinə səs verdiyim üçün üzürlü sayın”.

Ana səhifəyə dön