Putin Avropanın qazını kəssə...

Rusiya Avropanın təbii qaza olan tələbatının 30 faizindən çoxunu ödəyir. Lakin Putinin Avropaya qaz axınını kəsməsi təbii qaz bazarında uzunmüddətli böhrana səbəb ola bilər.

Reyting.az-ın xəbərinə görə, Londonda Markit investisiya qrupunun energetika üzrə eksperti Dan Yergin deyir ki, Rusiya prezidenti Vladimir Putin Rusiya ilə Ukrayna arasında gərginliyin artdığı bir vaxtda Avropaya qaz nəqlini “silah” kimi istifadə edərsə, bunun əvəzini ödəməli olacaq.

Onun sözlərinə görə, Rusiya təbii qazdan sanksiya silahı kimi istifadə etməyəcək və qaz böhranına daha çox ehtimal olunan ssenari-müharibə səbəbindən qazın kəsilməsi baş verə bilər.

“Putin qazı geniş mənada silah halına gətirə və sonra Avropanı çətinə sala bilər. Amma bu da dünyada təbii qaz bazarına dərin ziyan vuracaq. Düşünürəm ki, təbii qaz bazarında yarana biləcək pozulmaların bölgədəki gərginlikdən qaynaqlanan problemlər səbəbindən olması ehtimalı daha yüksəkdir”, - ekspert deyib.

Qeyd edək ki, Rusiya Avropanın təbii qaza olan tələbatının 30 faizini ödəyir. Avropaya təbii qaz boru kəmərləri ilə göndərilir. Bu kəmərlərin bir hissəsi Ukrayna ərazisindən keçir.

Kreml əvvəllər enerjidən siyasi təzyiq vasitəsi kimi istifadə edib. Rusiya 2006 və 2014-cü illərdə Krımı ilhaq etdikdən sonra qiymət mübahisəsinə görə Ukraynaya qaz nəqlini dayandırıb. 2009-cu ildə Ukrayna üzərindən Avropaya qaz nəqlini kəsib. Rusiya ilə Ukrayna arasında gərginlik son aylarda Rusiyanın Ukrayna sərhədinə 100 minə yaxın əsgər yerləşdirməsindən sonra artıb. Sərhəddəki sıxlıq Rusiyanın ölkəni işğal etməyə hazırlaşması ilə bağlı narahatlıqları artırıb.

Kremlin 2014-cü ildə beynəlxalq hüququ pozaraq Krımı ilhaq etməsi işğalın təkrarlanacağı qorxusuna səbəb olub. Moskva dəfələrlə bu iddiaları təkzib edib.

Ukraynanın Rusiya ilə Aİ arasında mövqeyini nəzərə alsaq, istənilən münaqişə bütün regionda sabitliyi pozmaq potensialına malikdir.

Mütəxəssis bildirib ki, hazırda neft bazarlarında “həddən artıq gərginlik” var: “Görünür ki, qiymət artımı Rusiya ilə Ukrayna arasındakı gərginliklə yanaşı, təklifin sıxılması ilə bağlı faktorlar tərəfindən dəstəklənir”.

Qeyd olunur ki, xam neftin qiyməti son vaxtlar bir barel üçün 90 dolları keçib. Bu ilin əvvəlindən təxminən 20 faiz bahalaşan xam neftin qiymətləri 2021-ci ilin yanvarından bu yana 60 faizdən çox artıb. Bəzi analitiklər neftin qiymətinin bir barel üçün 100 dollara qədər yüksələ biləcəyini proqnozlaşdırırlar.

OPEC (Neft İxrac Edən Ölkələr Təşkilatı) üzvləri və qeyri-OPEC tərəfdaşlarının yaratdığı enerji tərəfdaşlığı olan OPEC+ mart ayı üçün bazara gündəlik 400 min barel daha çox xam neft tədarük etmək qərarına gəlib.

Ekspert bildirib ki, dünya qaz-neft bazarında Rusiyaya görə pozulmalar olarsa, bu halda ehtiyat imkanı olan yalnız iki dövlət var - Əbu Dabi və Səudiyyə Ərəbistanı.

Ana səhifəyə dön