Dəqiq xatırlamıram, təxminən 4-5 il əvvəl nəqliyyat naziri Ziya Məmmədovla bağlı köşə yazmışdım.

«Ziya Məmmədovun bacıoğluları» başlıqlı yazı nəqliyyat qoçularından bəhs edirdi. Yazıda qeyd eləmişdim ki, vaxt gələcək Ziya Məmmədov işsiz qalacaq, o zaman onun hesabına şellənən bacıoğluları köməyinə çatmayacaq. Artıq Ziya müəllim işsizdir, bacıoğlulardan da hayan yoxdur. Ona görə də özünə yaxşı məşğuliyyət tapıb. Bizimkilər işdən çıxanda, həbsə düşəndə, mollalığa başlayırlar. Ziya müəllim də eynən...

Belə ki, Prezident İlham Əliyevin müvafiq sərəncamından sonra işsiz qalan sabiq nəqliyyat naziri Ziya Məmmədov boş vaxtını mütaliəyə ayırıb. Bu barədə eks-nazirin qardaşı, sabiq deputat Elton Məmmədov məlumat verib. E.Məmmədov bildirib ki, sabiq nazir mütaliəyə geniş vaxt ayırıb: «Ziya müəllim müqəddəs Qurani-Kərimi kifayət qədər oxuya, təhlil edə bilir. Düşünürəm ki, bu da xoş olan bir işdir. Həmçinin, ailəsinin, doğmalarının yanında istirahət etməyin özü də yaxşı bir haldır.

Ziya müəllim sağlam düşüncəli, potensiallı, intellekti yüksək olan insandır. Yəqin ki, 10-15 gün istirahət edəndən sonra hansısa sahəni seçmək məsələsində qərar verər. Amma onun yerinə mən konkret nəsə deyə bilmərəm”.

Ziya Məmmədov həqiqətən də potensiallı insandır. Kənardan sadə görünsə də, uzun sürən hakimiyyətdə qalmaq, vəzifəsini qorumaq o qədər də asan məsələ deyil. Amma uzun illər tənqidlərə, şok faktların açıqlanmasına, hətta bir ara hakimiyyəti ələ keçirmək istəməsi ilə bağlı iddiaların dolaşmasına baxmayaraq, Z.Məmmədov özünü yaxşı qoruya bilmişdi. Əldə etdikləri milyonlarla sərvət bir yana, hakimiyyətdə kifayət qədər pay sahibi də olmuşdu. Deputat mandatı, icra hakimiyyəti başçısı vəzifəsi və daha nələr-nələr...

Bizim kimsənin malında gözümüz yoxdur. Hər kəsin malı özünə qismət. Amma Ziya Məmmədovun milyonluq varidatının öz malı olmadığı hər kəsə gün kimi aydındır. Axı, başqasının haqqına girmədən qısa zamanda o qədər var-dövlət əldə etmək mümkün deyil. Yəni, bu gün mən və mənim kimi onlarla, yüzlərlə vətəndaş Məmmədovların sərvəti barədə danışırıqsa, nə günah edirik, nə də "başqasının pulunu saymaq” kimi pis iş tutmuş oluruq. Belə baxanda, mən, Ziya Məmmədovun mənimsədiyi öz payım barədə rahatca danışa bilərəm. Çünki bu gün ölkədə məmurlar tərəfindən mənimsənilən milyonlarda mənim payım az deyil. Həm şəriətən, həm də kişi söhbətinə qalanda mən öz haqqımı tələb edirəm.

Şəriət demişkən. Ziya Məmmədovun dinə meyllənməsi, Quran oxuması, hətta onu təhlil etməyə başlaması barədə oxuyanda diksindim. İnanın, heç kim bu xəbəri adi bir xəbər kimi oxumur. Hərənin ürəyindən bir fikir keçir. Amma heç kim Ziya müəllimin sidq ürəklə dinlə məşğul olacağına inanmır. Bəlkə də çoxları haqlıdır. Necə ola bilər ki, illər boyu korrupsiya və rüşvətxorluqla məşğul olasan, büdcə pullarını göyə sovurasan, axırda da Quranı təhlil edib, cənnət qazanasan?