Rəşad Sadıqov: "Komandanın oyuna köklənməsindən çox razıyam"

"Rəqibdə məşqçı dəyişikliyi baş verib. Heyətlərində zədəli futbolçuları var. Bunu bilmək üçün İsrailə səfərim vacib idi".

Bunu "Zirə"nin baş məşqçisi Rəşad Sadıqov Bakıda İsrailin "Makkabi" (Təl-Əviv) komandasına qarşı keçirəcəkləri UEFA Konfrans Liqasının II təsnifat mərhələsinin ilk oyunundan öncə mətbuat konfransında deyib.

40 yaşlı mütəxəssis bildirib ki, hazırlıqları sırf turnir üçün yox, eyni zamanda çempionat üçün qurulub: "Komandanın oyuna köklənməsindən çox razıyam. İlk oyunda ideal formada olmağımızı düşünmək doğru olmaz. Matça, müsbət nəticəyə köklənmişik".

O, Rəhim Sadıxovun universiallığından səmərəli yararlanmaq istədiyini söyləyib: "Futbolçunun 2-3 mövqedə oynamağı bacarması hər məşqçinin arzusudur. Rəhim də universaldır, hər bir taktiki sxemə uyğundur".

Sadıqov "Qarabağ"dan icarəyə götürülən Rüstəm Əhmədzadə barədə də fikirlərini bölüşüb: "O, gənc və perspektivli futbolçudur. “Qarabağ”da hücum xəttində rəqabət böyükdür. Rüstəm “Qarabağ”a keçməzdən əvvəl də onu transfer etmək istəmişdim. Həmin vaxt menecerləri demişdi ki, Azərbaycanda yalnız “Qarabağ”da oynaya bilər. Rüstəm də universal futbolçudur. Mövsümboyu ondan müxtəlif mövqelərdə, daha çox hücumçu kimi yararlanacağıq. Futbolda hər an problem yaşaya bilərsən. Rüstəmlə söhbətimizdə də pozitiv reaksiya gördüm. Əminəm ki, inadkarlığı və istəyi ilə problem yaşamayacaq, gələcəkdə “Qarabağ”ın aparıcı oyunçusuna çevriləcək".

Mütəxəssisin sözlərinə görə, mövsümöncəsi edilən transferlər təkcə avrokuboklarla bağlı deyil: "Bir mövsümlük plan cızmışıq. 4-5 transfer etmək istəyirik. Mənim üçün vacib olan əlimizdəki oyunçuların performansıdır. Bu komanda ilə ötən mövsüm uğurlu çıxış etmişik. Bir az da uğurlu olub, kuboku qazana bilərdik. Hazırda transfer danışıqları istədiyimiz kimi getmir. Transferlərin olmaması “Makkabi” ilə oyunlarda hiss olunmaz".

Baş məşqçi Slavik Alxasovu transfer etmələrinin səbəbini də açıqlayıb: "Onu hələ “Sabah”a keçməzdən əvvəl də istəmişdim. Bu il artıq 4 cinah müdafiəçimiz var. Kimsə cəzalı və ya zədəli olduqda digərləri onu rahatlıqla əvəz edə biləcək. Çünki ötən mövsüm bəzən Qismət Alıyevi sol cinahda oynadırdıq".

Sadıqov komandasının hücum potensialına da toxunub: "Rüstəm Əhmədzadə və Hamidu Keyta ön xətdə oynaya bilir. Hətta Rəhim də yalançı hücumçu mövqeyində oynaya bilər. Hücum xətti ilə bağlı problemimiz yoxdur. Filipe Paxtmann və Təmkin Xəlilzadə hazır olsaydı, heyətin kasadlığndan narahat olmazdım. Həmçinin Mirsayib Abbasov da hücumun hər iki cinahında oynaya bilir. Mən universal oyunçuları xoşlayıram. Çünki belə olanda bəzən gözlənilməz addım ata bilirsən".

O, "Mərhələ keçsəniz, çempionatda hansısa oyunun təxirə salınması üçün PFL-ə müraciət etmək fikriniz var?" sualına bu cür cavab verib: "Qarabağ” qruplara düşdükdə belə, təxirəsalmanı minimuma endirib. Bu gün heyətimiz kasaddır. Amma bu, sonrakı məsələdir. Bu gün diqqətimiz “Makkabi” ilə oyunlaradır".

Qeyd edək ki, iyulun 21-də “Dalğa Arena”da oynanılacaq qarşılaşma saat 20:00-da başlanacaq.

Ana səhifəyə dön