İqtisadçı ekspert Vüqar Bayramov 4 bankın - "Dekabank” ASC, "Kredobank” ASC, "Parabank” ASC və "Zaminbank” ASC-nin lisenziyalarının ləğv edilməsiylə bağlı məsələni şərh edərkən bu qərarın gözlənilən olduğunu deyib: "Hələ ötən ilin sonunda bankların sayının azalacağını bildirmişdim. Amma təbii ki, bunlar da bağlanan sonuncu banklar olmayacaqlar”.

V.Bayramovun sözlərinə görə, neft bumu dövründə yüksək faizlərlə böyük gəlirlər qazanan "ərköyün banklar” post-neft dövrünə hazır ola bilmədilər:

"Təəssüf ki, öz funksiyalarını tam yerinə yetirməyən, amma lisenziyası geri alınmayan bankların sayı heç də az deyil. Hazırda əmanətçilərin öz halal pullarını qaytara bilmədikləri banklar var. Təəssüf ki, Palata onların lisenziyasının ləğvi barədə qərar qəbul etmir. Nəticədə, sığorta hadisəsi baş vermədiyindən əmanətçilər öz depozitlərini geri götürə bilmirlər. Əslində, belə bankların da lisenziyasının geri alınmasına və əmanətlərin tam şəkildə fond tərəfindən ödənilməsi təmin edilməlidir”.

İqtisadçı-ekspert bildirib ki, dörd bankın hamısı Əmanətlərin Sığortlanması Fondunun üzvləri olduğundan onların müflis elan edilməsi artıq sığorta hadisəsinin baş verməsi deməkdir: "Əmanətçilər öz sığortalanan pullarını fonddan geri almalıdırlar. Bu zaman artıq əmanətlərin hissə-hissə deyil, tam şəkildə qaytarılması həyata keçirilməlidir. Gözlənilir ki, Palata bu banklara müvəqqəti inzibatçı təyin edəcək. Əmanətçilər bundan sonra öz pullarını geri ala bilməlidirlər. Əmanətlərin Sığortlanması Fondu tərəfindən sığortalanan hər bir depozitin son qəpiyinədək əmanətçiyə qaytarılması olduqca vacibdir”.

V.Bayramov qeyd edib ki, mövcud qanunvericilikdə məbləğindən asılı olmayaraq bütün depozitlər sığortalanır. Sadəcə, maksiumum divident faizi dollar əmanətləri üzrə 3, manat əmanətlərində isə 12 faizdən çox olmamalıdır.

Reyting.az