Marketlərdə satılan yağın və şəkərin qiyməti artırılıb.

Reyting.az xəbər verir ki, Unikal.org-un "Araz", "Rahat", "Makromart" marketlər şəbəkəsində apardığı müşahidələrə əsasən, Zellandiya istehsalı olan "Golden Crown” kərə yağının 1 kq-ı hazırda 8.8 AZN-ə satılır. Qiymət artımı "Westgold” kərə yağının satışında da baş verib.

Bəzi mağazalarda isə bu məhsul 9 AZN-ə təklif edilir. Halbuki bir neçə gün əvvəl bu rəqəm 7.5 AZN təşkil edirdi.

İmişli Şəkər Zavodunun istehsalı olan 1.10 AZN-ə satılan şəkərin marketlərdə hazırda satış qiyməti 1.2 AZN-dir.

Ukrayna istehsalı olan şəkər tozunun əvvəlki qiyməti 1.18 AZN idisə hazırda, 1.29 AZN-ə satılır.

Market administratorları qiymət artımını dolların bahalaşması ilə əlaqələndirirlər.

İstehlakçılar bildiriblər ki, təkcə şəkərin və yağın deyil, digər məhsulların da qiymətlərində bahalaşma var.

56 yaşlı Bakı sakini Rəhilə xanımın fikrincə, şəkər tozunun qiymətinin artımı meyvə-tərəvəz mövsümü ilə əlaqədardır: "İnsanlarımız qışa mürəbbə və kampotlar bişirirlər. Belə olduğu halda şəkər tozuna tələbat çoxalır. İşbazlar da bundan öz xeyirləri üçün yararlanırlar".

Xatırladaq ki, bir neçə gündür dolların məzənnəsində nəzərəçarpacaq dərəcədə artım müşahidə edilməkdədir.

Bir müddət əvvəl İqtisadiyyat Nazirliyindən qiymət artımlarının qarşısının alınacağı bildirilsə də, hələlik bu istiqamətdə hər hansı addımın atıldığı müşahidə olunmur.