ABŞ Səhiyyə və İnsan Xidmətləri Nazirliyi (HHS) prezident Donald Trampın qərarından bir il sonra ABŞ-nın Ümumdünya Səhiyyə Təşkilatındakı (ÜST) 78 illik üzvlüyünün rəsmi olaraq başa çatdığını açıqlayıb.

Reyting.az xəbər verir ki, rəsmi bəyanatda ÜST-ə ayrılan bütün Amerika maliyyə vəsaitinin dayandırıldığı və təşkilatda çalışan ABŞ vətəndaşı olan bütün əməkdaşların geri çağırıldığı bildirilib.

Beləliklə, Trampın ikinci prezidentlik müddətinin ilk günündə imzaladığı icra sərəncamı ilə başlayan ÜST-dən çıxma prosesi rəsmi şəkildə yekunlaşıb.

ÜST-nın məlumatına görə, ABŞ-nın təşkilata olan borcu 130 milyon dolları keçib. ABŞ rəsmiləri isə çıxış prosesinin tamamlandığını, lakin ayrılmanın “tam və problemsiz” olmadığını qeyd edirlər.

Ekspertlər bildirirlər ki, ABŞ-nın ÜST-dən çıxması ölkənin epidemiyalarla bağlı erkən xəbərdarlıq mexanizmlərinə və digər dövlətlərin kritik səhiyyə məlumatlarına çıxışında ciddi boşluqlar yarada bilər.

Corctaun Universitetinin ictimai səhiyyə hüququ üzrə eksperti Lorens Qostin qeyd edib ki, ABŞ-nın təşkilatdan ayrılması qlobal pandemiyalara qarşı mübarizəni zəiflədəcək, eyni zamanda Amerika alimlərinin və əczaçılıq şirkətlərinin yeni təhlükələrə qarşı vaksin və müalicə vasitələri hazırlamaq imkanlarına mənfi təsir göstərəcək.

Amerika Yoluxucu Xəstəliklər Assosiasiyasının rəhbəri Ronald Nahass bu qərarı “uzaqgörənlikdən uzaq və elmi baxımdan məsuliyyətsiz” adlandırıb.

Qeyd edək ki, ÜST-nın yaradılmasında aparıcı rol oynayan və uzun illər təşkilatın ən böyük maliyyə dəstəkçilərindən biri olan ABŞ, quruma rəsmi olaraq illik təxminən 111 milyon dollar üzvlük haqqı və 570 milyon dollar könüllü ianə ayırıb.

N. ORUCOV