“Putinlə sülh masasında oturun ki, nüvə düyməsini basmasın”

“Bu, Rusiya prezidenti Vladimir Putinin Ukraynanı işğal etdiyi gündən verdiyimiz sualdır: Kreml bu müharibədə nüvə silahından istifadə edə bilərmi? ABŞ prezidenti Co Bayden də bu variantı nəzərdən qaçırmır. Bayden bu həftə BBC-nin Rusiya redaktoru Steve Rosenberqə deyib ki, Putinin taktiki nüvə silahından istifadə etmək ehtimalından narahatdır. Beydenin sözlərindən belə anlaşılıb ki, real təhlükə var”.

Reyting.az xəbər verir ki, bu, “Kommersant” qəzetində dərc olunmuş “Nüvə müharibəsi problemlərimizi həll etmək üçün çox pis üsuldur”, - başlıqlı məqalədə qeyd edilib.

Siyasi baxışları ilə tanınan Rusiyanın aparıcı xarici əlaqələr və müdafiə siyasəti üzrə eksperti Sergey Karaqanovdan sitat gətirən nəşr yazır ki, ABŞ prezidenti Baydenin Rusiyada nəşr olunan “Profil” jurnalını oxuyub-oxumadığı bilinmir. Amma onu oxuyursa, niyə narahat olduğunu anlamaq çətin deyil.

Xarici Əlaqələr və Müdafiə Siyasəti Şurasının fəxri sədri kimi şübhəsiz ki, Karaqanov hakimiyyətdəkilərlə yaxın münasibəti olan şəxsdir.

S. Karaqanov iddia edir ki, Qərbin iradəsini qırmaq üçün Rusiya nüvə silahından istifadə həddini aşağı salaraq, nüvə silahının qarşısının alınmasını yenidən inandırıcı arqumentə çevirməlidir: “Düşmən bilməlidir ki, biz qisas almaq üçün qabaqlayıcı zərbə endirməyə hazırıq. Bəs onlar geri çəkilməsələr necə? O zaman biz bir sıra ölkələrdə bir neçə hədəfi vurmalı olacağıq ki, ağlını itirənlər özlərini yığışdırsınlar”.

Xatırladaq ki, Putin artıq Rusiyanın Belarusda bir sıra taktiki nüvə silahları yerləşdirdiyini təsdiqləyib. Onun sözlərinə görə, bu addım Moskvaya “strateji məğlubiyyət” verəcəyinə ümid edənləri yenidən düşünmək üçün atılıb.

Qeyd edək ki, Ukraynada nüvə silahından istifadə edib-etməmək Rusiyada ictimai müzakirəyə çevrilib. Moskvadakı başqa bir qrup isə məqalə müəllifi S. Karaqanovun səhvə yol verdiyini bildirir.

Beynəlxalq Təhlükəsizlik Mərkəzindən Aleksey Arbatov, Konstantin Boqdanov və Dmitri Stefanoviç yazır:

“Nüvə silahlarının adi hərbi üsulların həll edə bilmədiyi strateji problemlərin eskalasiyasını həll edə və ya dayandıra biləcəyini düşünmək son dərəcə şübhəlidir və yəqin ki, böyük bir yanlışlıqdır. Müasir tarix hərbi əməliyyatların gözlənilməz nəticələr verdiyi çoxsaylı nümunələrlə doludur. Bununla belə, bunlarda nüvə silahlarından istifadə edilməyib. Nüvə hücumu münaqişələri gözlənilməzliyin tamamilə yeni səviyyəsinə çıxaracaq və münaqişə risklərini dəfələrlə artıracaq. Nüvə ruletinin radioaktiv qalıqlarının parlaq bir zəmin yaratmaq ehtimalı yüksəkdir”.

Məqalədə qeyd olunur ki, Karaqanovun qabaqlayıcı nüvə zərbəsi təklifinin şokedici xarakterini nəzərə alsaq, çox güman ki, digər rusiyalı akademiklərin də səssiz qalmayacaqlarını düşünürdülər. “Əgər belədirsə, demək olar ki, Rusiya media mühiti dövlətin nəzarətində olsa da, bəzi platformalarda, hətta indiki məhdudiyyətlər çərçivəsində hələ də məhdud müzakirə imkanları var. Xüsusilə nüvə müharibəsi kimi həssas mövzularda. Və ya bəlkə də bütün bu müzakirə Qərbin diqqətini cəlb etmək, Putini yaxşı polisə, Karaqanovu isə pis polis kimi göstərməyə hesablanıb. Axı Kreml rəhbəri şəxsən Qərbə qarşı qabaqlayıcı nüvə zərbəsinə çağırmır. Deməli, bu arqumentə görə, yaxşı olar ki, Putinlə sülh masasında oturub danışasınız ki, Karaqanov kimi sərt xətt tərəfdarları qalib gəlməsin və nüvə düyməsini basmasın”,- deyə məqalə müəllifləri yazır.

Diqqətə çatdırılır ki, Rusiyada anti-Qərb ritorikası artdıqca və Ukrayna ordusunun əks-hücumları davam etdikcə, nüvə silahından istifadə edib-etməmək barədə müzakirələrə ara verilməyəcək.

V. QULİYEV

Ana səhifəyə dön