Üsyandan sonrakı Rusiya… - Bəzi yüksək vəzifəli şəxslərə təhlükə yaranıb

“Vaqner” muzdlu dəstəsinin Moskvaya qarşı üsyanı ötən həftə gündəmin ən mühüm məsələlərindən biri oldu. “Vaqner” qüvvələri Moskvadan kilometrlərlə uzaqda dayandıqdan və Yevgeni Priqojin geri addım atdıqdan sonra üsyan hələlik sona çatsa da, Kremldə Putinə yaxın fiqurları çox çətin günlər gözləyir. Xüsusilə təhlükəsizlik üçün məsul olanları şəxsləri.

Reyting.az Rusiya prezidenti Vladimir Putinə yaxın olan və təhlükəsizlik üçün məsul şəxslərdən bir necəsinin adını təqdim edir:

Rusiya Təhlükəsizlik Şurasının sədr müavini Dmitri Medvedev 2008-ci ildə Putindən sonra 4 illik müddətə prezident olub. Bu müddət ərzində Putin Rusiyanın baş naziri olub və bir çoxları üçün baş nazirlik sadəcə, simvolik bir post idi. Putin baş nazir olduğu müddətdə Medvedevin arxasında “kölgə lider” oldu və hakimiyyəti saxlamağa davam etdi.

Medvedevin prezidentlik dönəmində Rusiyanın Qərblə yaxınlaşacağına ümidlər artsa da, bu dövrdə Rusiya Gürcüstanla müharibə apardı. 2012-ci il seçkilərində prezident kürsüsünü Putinə təhvil verən Medvedev 2020-ci ilə qədər baş nazir vəzifəsini icra etdi və sonra Rusiya Təhlükəsizlik Şurasının sədr müavini təyin edildi.

Ukrayna ilə müharibə başlayandan Medvedev “Telegram”dakı yazıları ilə müharibənin müdafiəçilərindən birinə çevrilib və hətta Putini vətəninin düşmənlərinin üzərinə nüvə bombası atmağa çağırıb.

“Vaqner” qoşunları Moskvaya çatmağa çalışdığı vaxtlarda Medvedev yazırdı:

“Bəşəriyyət hələ quldurlar tərəfindən idarə olunan nəhəng nüvə arsenalını görməyib. Belə bir böhran təkcə bir ölkənin sərhədləri ilə məhdudlaşmır, bütün dünyanı məhv olmaq həddinə gətirir. Biz belə trayektoriyaya yol verməyəcəyik” .

Xarici işlər naziri Sergey Lavrov Putin hökumətinin tanınmış simalarından biridir və 2004-cü ildən Rusiyanı beynəlxalq arenada təmsil edir.

“Vaqner” üsyanı zamanı ictimaiyyətə çox da görünməyən 73 yaşlı Lavrov Priqojinin arxasında Ukraynanı dəstəkləyən Qərb dövlətlərinin olub-olmaması ilə bağlı araşdırma başlandığını açıqlayıb. Hadisələr bitdikdən sonra “Vaqner”in Afrika və Yaxın Şərqdəki fəaliyyətinin taleyi ilə bağlı sualı cavablandıran Lavrov deyib: “Vaqner” üzvləri işləməyə davam edəcək, üsyan dostlarımız və tərəfdaşlarımızla münasibətlərimizə təsir etməyəcək”.

68 yaşlı Şoyqu 2012-ci ildə Müdafiə naziri postunu tutub və Sergey Lavrov kimi, Putinin ən yaxın təmaslarından biridir.

Ukrayna müharibəsinə lap əvvəldən rəhbərlik edən Şoyqu üsyanın səbəbkarı kimi göstərilib. Priqojin Ukraynada davam edən müharibədəki uğursuzluqları və silahlı qüvvələrdəki korrupsiyanı əsas gətirərək, Rusiya Baş Qərargah rəisi Gerasimov və Şoyqunu ağır şəkildə təhqir edib, onların işdən çıxarılmasını vacibliyini dilə gətirib və onunla əməkdaşlıq edəcək insanları görmək istədiyini bildirib. Lakin “Vaqner” üsyanından sonra Putin bazar ertəsi yüksək səviyyəli təhlükəsizlik rəsmiləri, xüsusilə də Şoyqu ilə görüşüb, Müdafiə naziri və Baş Qərargah rəisinin arxasında dayandığı mesajını verib.

Gerasimov və Şoyqunun gələcək taleyi maraq doğursa da, Putinin hərbi idarəetmədə dəyişiklik etmək qərarına gələcəyi təqdirdə ilk olaraq bu iki şəxsin vəzifədən uzaqlaşdırılacağı gözlənilir.

Mixail Mişustin 2020-ci ildən Dmitri Medvedyevdən sonra Rusiyanın baş naziri olub. “Vaqner” qüvvələri Moskvaya yürüş edərkən Mişustinin açıqlama verməzdən əvvəl hadisələrin nəticəsini gözlədiyi iddia edilir. Guya Mişustin “Vaqner” qüvvələrinin uğur qazana bilməyəcəyini anladıqdan sonra Rusiya xalqını öz prezidentinin ətrafında birləşməyə çağırıb. Mişustin baş verən hadisələrdən sonra bəyanat verib:

“Birlik yaratmaq üçün vahid komanda olaraq birlikdə hərəkət etməli və prezidentin ətrafında toplanmalıyıq”.

Putinə çox yaxın olan digər şəxs SSRİ “KQB”-sinin varisi olan Federal Təhlükəsizlik Xidmətinin (FTX) rəhbəri Aleksandr Bortnikovdur. FTX “Vaqner” üsyanının ilk saatlarından fəaliyyət göstərib, lakin bir çoxları üçün hələ də Bortnikovun yaxın günlərdə cavab verməli olacağı bəzi “narahatedici” suallar var. Çoxları düşünür ki, “Vaqner” üsyanında Kremlin “sürprizi” FTX-də öz əksini tapmayacaq.

Xarici Kəşfiyyat Xidmətinin direktoru Sergey Narışkin Putinlə yaxın münasibətdə olsa da, Ukrayna müharibəsi başlayandan dərhal sonra keçirdiyi mətbuat konfransında Putinin tənqidindən qaça bilməyib və Rusiya lideri tərəfindən alçaldılıb.

Rusiya mətbuatında yer alan xəbərlərə görə, Narışkin “Vaqner” üsyanı başlayandan bəri Priqojinə qarşı olduğunu açıq şəkildə bəyan edib. Bununla belə, bildirilir ki, Narışkin də FTX rəhbəri kimi qarşıdakı günlərdə “narahatedici” suallarla üzləşməli ola bilər.

Təxminlərə görə, hazırda Rusiya Təhlükəsizlik Şurasının katibi olan və 1999-2008-ci illərdə FTX-ya rəhbərlik etmiş Nikolay Patruşev də Rusiyanın “Vaqner” üsyanına hazır olub-olmaması ilə bağlı cavab verməli olduğu suallarla üzləşə bilər.

Prezident Putinin ötən həftənin bazar ertəsi təhlükəsizlik rəsmiləri ilə görüşündə Milli Qvardiyanın direktoru Viktor Zolotov da iştirak edib. Ukraynada davam edən müharibədə ağır itkilər verdiyi üçün Zolotovun bölməsinin rəhbərlərinə qəzəbləndiyi iddia edilsə də, Qərb mətbuatında yer alan iddialara görə, Zolotovun qəzəbinin çevrilişə və ya üsyana çevrilmə potensialı yoxdur. 69 yaşlı Zolotov “Vaqner” üsyanının ilk saatlarından Putinlə daimi ünsiyyətdə olduqlarını bildirib. “Hər kəs bu yolda ölməyə hazırdır”,- deyib.

Zolotov bundan əvvəl 1991-ci ildə Mixail Qorbaçova qarşı çevriliş cəhdinin qarşısını almaq üçün tankların üstünə çıxan Rusiyanın keçmiş prezidenti Boris Yeltsinlə birlikdə olub.

İkinci Çeçen müharibəsindən sonra Çeçenistan Respublikasının başçısı olan Kadırovun təxminən 12 min nəfərlik qüvvəsi olduğu təxmin edilir. Ukrayna müharibəsindən əvvəl çeçen qoşunlarının yüksək təcrübəli və peşəkar olduğu düşünülürdü, lakin bu ordu gözləntiləri doğrultmadı. “Vaqner” üsyanı aydınlaşdıqdan sonra Kadırov Putinə dəstəyini ifadə edərək hərəkətə keçib və komandanlığı altında olan qoşunları “Vaqner”in tutduğu Rostova göndərib. Mümkün münaqişə Priqojinin geri addım atması ilə başa çatıb. Kadırovun qoşunlarını səfərbər etməyə hazır olması onun Putinə sadiqliyinin sübutu kimi şərh edilib.

ELÇİN

Ana səhifəyə dön