İlqar Məmmədov: "Hökumətdən zəng edib dedilər ki..."

"Hökumətdən REAL Partiyasına zəng edib dedilər ki, sizin təşkilata qarşı istifadə edə biləcəyimiz anti-demokratik qaydanı icra etməkdə bizə yardımçı olun”.

Reyting.az xəbər verir ki, bunu REAL Partiyasının sədri İlqar Məmmədov bildirib.

İ. Məmmədov əvvəlcə məsələnin qanun tərəfi ilə başlayıb, sonra praktik tərəfinə keçib:

“Hökumət siyasi sistemi həqiqətən yaxşılaşdırmaq istəsəydi, sadə bir məlumat yayardı ki, A partiyası üzvlərinin 12 faizi həm də B partiyasında təmsil olunur, 7 faizi həm C partiyasının, 3 faizi isə həm də D partiyanın üzvüdür. Onda vətəndaş özü bilərdi ki, hansı nəticəni çıxarsın və seçkidə necə səs versin. Bəlkə partiyaların bəziləri ikili-üçlü üzvlüyü özləri qadağan edərdi.

Amma yox, qanuna birbaşa yazdılar ki, şəxs yalnız bir siyasi partiyanın üzvü ola bilər (Maddə 20.1)".

Onun sözlərinə görə, sonra da təəccüblənirlər ki, niyə Venesiya Komissiyası həmin maddəni tənqid edərək öz rəyində şəxsin bir neçə partiyaya üzv olmasına qadağanın qanundan çıxarılmasını tövsiyə edir.

İ. Məmmədov əlavə edib ki, REAL Partiyası da bununla tam razıdır: “Bu cür qadağa qoymaq dövlətin işi deyil".

REAL Partiyasının sədri bildirib ki, rəhbəri olduğu qurum üzvlərinin reyestrini iyunun 1-də hökumətə çatdırıb, həm də əleyhinə olduqları yeni qanunun tələbinə tam uyğun formada: “Qanun nə tələb edirdisə, onu da vaxtında etdik. Qanuna əsasən, hökumət bizə öz cavabını 30 gün ərzində verməlidir. Yəni iyulun 13-də. Oturub o cavabı gözləyirdik, birdən hökumətdən zəng gəldi ki, reyestri bizə həm də elektron “Excell” faylı şəklində göndərin. Soruşdum ki, axı qanun bunu tələb eləmir. Dedilər ki, biz partiyaların reyestrini bir-biri ilə tutuşdurub eyni şəxsin bir neçə partiyaya üzv olub-olmadığını müəyyən edəcəyik deyə, elektron fayl işimizi xeyli rahatlaşdırar. Faktiki olaraq, hökumət REAL Partiyasına deyir ki, sizə qarşı istifadə edə biləcəyimiz anti-demokratik qaydanı icra etməkdə bizə yardımçı olun.

Məsul şəxslərdən soruşdum, məlum oldu ki, bizdə heç o “Excell” faylı qalmayıb. 3 həftə əvvəl reyestri hökumətə göndərəndən sonra həmin o göndərdiyimiz sənədlərin ancaq pdf skan faylını saxlamışıq.

REAL Siyasi Komitəsində məsləhətləşdik. Qərara gəldik ki, hökumətin niyyəti bizə aydın olmasa da, rəqəmsal faylı xoş niyyət göstərib hökumətə göndərə bilərik. Sonra zəng edən hökumət təmsilçisini yığdım və bildirdim ki, bu xahişinizi ancaq xoş niyyət göstərərək yerinə yetiririk, çünki siyahımızdan əminliyimiz sizin texniki işi rahatlaşdırmaq imkanını bizə verir. Halbuki qanun bizdən rəqəmsal sənəd tələb etmir. Tələb olunan bütün sənədləri bizdən iyunun 13-də almısınız. 13 iyulda cavabınızı gözləyirik, yəni elektron faylın çatdırılması bu tarixə təsir etməyəcək”.

ELÇİN

Ana səhifəyə dön