Analitik: “Rusiya parçalansa, nüvə silahlarının kimin əlinə keçəcəyi məlum deyil”

“Putinə qarşı birləşən müttəfiqlər Ukraynanın müharibədə qələbəsinin vacibliyini başa düşürlər, lakin bunun Rusiya Federasiyası üçün nəticələrindən qorxurlar. Ukraynanın Qərb müttəfiqləri Rusiyanın zəifləməsinin nəticələri ilə bağlı müəyyən narahatlıq keçirir və buna görə də Kiyevin bu və ya digər silahlarla təmin olunması üçün müraciətlərinə heç də həmişə operativ reaksiya vermirlər. Qərbi narahat edən odur ki, Rusiyanın dağılmasının idarə olunması çətin ola və başqa nəticələr ortaya çıxa bilər”.

Reyting.az xəbər verir ki, bunu siyasi analitik Vitali Dimarski deyib.

Onun sözlərinə görə, Rusiya Federasiyasının bir neçə subyektə parçalanması məsələsində Qərbi qorxudan əsas məsələ nüvə silahıdır.

Dimarski əlavə edib ki, belə bir vəziyyətdə nüvə silahından istifadə etməkdən qorxurlar: “Söhbət nüvə silahına malik olan və parçalananda nəzarətdən çıxa biləcək ölkədən gedir. İndi ən azı nüvə silahları və ölkəyə nəzarətin kimin əlində olduğu başadüşüləndir”.

Analitik qeyd edib ki, Rusiya Federasiyası dağılsa, onun yerində bir neçə subyekt yarana bilər. Nüvə silahlarının kimin əlinə keçəcəyi və yeni ərazi vahidlərinə kimlərin rəhbərlik edəcəyi isə məlum deyil.

“Əgər Rusiya parçalanmasa, Ukraynanın qələbəsindən sonra onunla necə yaşayacağımızı düşünməliyik”, - deyən Dimarskinin fikrincə, yəqin ki, Qərb bu məsələni düşünür, amma hələ də vahid həll yolu tapılmayıb.

Analitikin sözlərinə görə, bu, tərəfdaşların müəyyən silahların Ukraynaya ötürülməsində gecikmələrini izah edə bilər. Müttəfiqlər Ukraynanın müharibədə qələbəsinin vacibliyini başa düşürlər, lakin bunun Rusiya Federasiyası üçün nəticələrindən qorxurlar.

Onu da qeyd edək ki, Ukrayna rəsmiləri arasında Rusiya Federasiyasının dağılmasının qaçılmazlığından ən çox danışan Milli Təhlükəsizlik və Müdafiə Şurasının katibi Aleksey Danilovdur. O, dəfələrlə dünyanı buna hazırlaşmağa çağırıb. İyulun əvvəlində alman nəşrlərindən birinə müsahibəsində Danilov “Rusiya Federasiyasında üsyana cəhd göstərdi ki, Rusiya dövlət deyil”,- deyib. Onun fikrincə, Rusiya Federasiyası parçalanıb və onu qalaq-qalaq saxlaya biləcək heç bir qüvvə yoxdur və Qərb bunu başa düşməlidir.

Eyni zamanda, Rusiyada bu yaxınlarda fəaliyyəti qadağan edilən “Memorial” hüquq müdafiə təşkilatının liderlərindən biri Oleq Orlov deyir ki, Rusiya Federasiyası absurdluq və repressiya qarışığında parçalanır. O, bunun Sovet İttifaqında Brejnev dövrü ilə müqayisə oluna biləcəyini vurğulayıb.

Orlov onu da qeyd edib ki, Rusiya 21-ci əsrin dövlətləri arasında öz yerini tutmaq şansını itirib və onun gələcəyi Ukraynada həll olunacaq.

Y. QACAR
Reyting.az

Ana səhifəyə dön