Qara dəniz döyüş meydanına çevriləcək?

Rusiya Federasiyasının Qara Dəniz Donanması hərbi mövcudluğunu gücləndirir. Bu, yəqin ki, Qara dənizdə mülki gəmilərin məcburi dayandırılması və axtarışına şərait yaratmaq, ərazidə nəzarəti gücləndirmək üçündür.

Reyting.az xəbər verir ki, bu barədə ABŞ-ın Müharibə Araşdırmaları İnstitutu bildirib.

İnstitutun analitikləri bildiriblər ki, Ukrayna Hərbi Media Mərkəzi və Böyük Britaniya Müdafiə Nazirliyi Rusiya qüvvələrinin Ukraynanın blokadasını gücləndirmək üçün Qara dənizdə gəmilər hazırlaması barədə məlumat yayıb.

Ukrayna Hərbi Media Mərkəzinin məlumatına görə, Rusiyanın Qara Dəniz Donanması döyüş əməliyyatlarını, yerüstü qüvvələrinin və dəniz aviasiyasının təlimini gücləndirir.

Bununla belə, bildirilir ki, Qara Dəniz Donanması mülki gəmilərə qarşı tədbirləri sərtləşdirsə də, Ukraynanı tamamilə blokadaya alması müşkül məsələdir. Çünki Rusiyanın Qara dənizdə Ukraynanı tam blokadaya alması o deməkdir ki, Rusiya qüvvələri Ukrayna limanlarına gedən bütün gəmiləri atəşə tuta biləcək. Amma Kremlin indiyədək qaçmağa çalışdığı NATO üzvləri -Rumıniya, Bolqarıstan və Türkiyə də daxil olmaqla, Qara dəniz sahili ölkələri ilə hərbi münaqişə yaratmadan tam blokadaya cəhd etməsi mümkünsüzdür.

Güman olunur ki, Rusiyanın Qara dənizdəki hazırkı vəziyyəti Rusiyanın mülki və kommersiya gəmilərinə yaxşı şərait yaratmağa, eyni zamanda blokadanı əlavə rıçaq vasitəsi kimi təbliğ etməyə yönəlib.

Britaniya Müdafiə Nazirliyi bildirib ki, Rusiya korveti “Sergey Kotov” Bosfor boğazı ilə Odessa bölgəsi arasında gəmiçilik marşrutunda patrulluq edir və korvet Rusiya qüvvələrinin Ukraynaya doğru getdiyinə inandığı ticarət gəmilərinin qarşısını almaq üçün xüsusi qrupun bir hissəsi ola bilər.

Xatıqladaq ki, iyulun 20-də Rusiya Müdafiə Nazirliyi bəyan edib ki, Rusiya qüvvələri Ukraynaya gedən bütün gəmiləri potensial hərbi yük daşıyıcıları hesab edəcək. Rusiyanın müxalif “Astra” nəşri iyulun 24-də yazıb ki, Rusiya Dövlət Təhlükəsizlik Xidməti Türkiyədən Rostov-na-Dona gedən xarici yük gəmisində axtarış elan edib və onun Kerç boğazından keçməsini inkar edib. Federal Təhlükəsizlik Xidməti gəminin ekipajında 12 Ukrayna vətəndaşı olduğu üçün gəminin partlayıcı maddələri Ukraynaya çatdıra biləcəyini bildirib və Kerç boğazından keçən digər gəmilərdə axtarış aparacaqlarını elan edib.

Onu da qeyd edək ki, Rusiya iyulun 17-də Taxıl müqaviləsindən çıxıb. Bundan sonra Moskva yenidən Qara dənizi Ukrayna üçün tamamilə bağlamaqla hədələyib. Rusiya Müdafiə Nazirliyi Ukrayna limanlarına gedən bütün mülki gəmilərə hücum edəcəklərini və onları hərbi yük daşıyan hədəf hesab edəcəklərini açıqlayıb. Eyni zamanda, Ağ evin Təhlükəsizlik Şurasının sözçüsü Con Kirbi Vaşinqtonun Taxıl dəhlizinin hərbi müdafiəsində iştirak etməyəcəyini bildirib. Öz növbəsində ABŞ-ın ATƏT-dəki müvəqqəti işlər vəkili Ketrin Brooker deyib ki, Rusiya Federasiyası mülki gəmiləri sıradan çıxarmaq üçün Ukrayna limanlarına yaxın əraziləri minalayıb.

V. QULİYEV

Ana səhifəyə dön