İmran Xanla bağlı yeni iddialar gərginliyə səbəb olub

ABŞ Dövlət Departamentinin İmran Xanın “Rusiya-Ukrayna müharibəsində bitərəfliyinə” görə baş nazir vəzifəsindən uzaqlaşdırılmasını təşviq etməsi ilə bağlı iddialar Pakistanda mübahisələrə səbəb olub.

Reyting.az-ın məlumatına görə, Pakistanın hazırkı baş nazir Şahbaz Şərif televiziya proqramında verdiyi açıqlamada 2022-ci ilin aprelində İmran Xanın hakimiyyətdən getməsində ABŞ-ın rol oynadığına dair iddiaları təkzib edib.

Şərif deyib ki, Rusiya ilə münasibətinə görə ABŞ-ın Xan hökumətinin hakimiyyətdən getməsini təşviq etməsinə inanmır: “Rusiyadan endirimli qiymətə xam neft aldıq. Allah eləməsin, əgər hökumətimiz ABŞ-ın planı ilə qurulubsa, onda biz bu xam nefti Rusiyadan necə əldə etmişik?”.

Mövzunun Pakistanın ABŞ-dakı keçmiş səfiri Esad Məcid Xan ilə Milli Təhlükəsizlik Şurasında müzakirə edildiyinə diqqət çəkən Şərif qeyd edib ki, Məcid Xanın ABŞ Dövlət Departamenti ilə görüşünün məxfi sənədində hər hansı təşviqdən və fəaliyyətdən bəhs edilmədiyini söyləyib.

Həbsdə olan İmran Xanın Pakistan Ədalət Hərəkatı da məsələyə münasibət bildirib və sözügedən məxfi sənədlə bağlı ortaya çıxan təfərrüatları, İ. Xanın planlı şəkildə vəzifədən uzaqlaşdırıldığına dair mövqeyini bir daha təsdiqləyib. Açıqlamada sözügedən məxfi sənədlə bağlı araşdırma tələb olunub.

Məlumat üçün qeyd edək ki, ABŞ-da yayımlanan “The Intercept” xəbər saytı Pakistanın ABŞ-dakı keçmiş səfiri Esad Məcidin ABŞ Dövlət Departamentinin iki rəsmisi arasında 7 mart 2022-ci ildə keçirildiyi iddia edilən gizli görüşün sənədini əldə etdiyini bildirib. Pakistan hökumətinə aid olduğu iddia edilən və görüşün məzmununu özündə əks etdirən sənədə əsaslanan xəbərə görə, ABŞ tərəfi Pakistanın keçmiş baş nazirinin Rusiya-Ukrayna müharibəsində bitərəf mövqeyinə görə narahatlığını keçmiş səfir baş nazirə çatdırıb.

İclasda iştirak edən ABŞ dövlət katibinin Cənubi və Mərkəzi Asiya məsələləri üzrə müavini Donald Lu, Xan ilə bağlı etimadsızlıq səsverməsinin qəbul ediləcəyi təqdirdə Vaşinqtonla İslamabad arasında daha isti münasibətlər quracağına söz verib.

“Düşünürəm ki, əgər baş nazirə qarşı etimadsızlıq səsverməsi müvəffəqiyyətli olsa, Vaşinqtonda hər şey əfv ediləcək. Rusiya səfəri baş nazirin qərarı olaraq görüldüyü üçün hər şey bağışlanacaq. Düzünü desəm, düşünürəm ki, baş nazirin (Xan) ABŞ və Avropadan təcrid olunması (o, vəzifəsində qalarsa) güclü olacaq”,- iddiaya görə, bunu ABŞ dövlət katibinin Cənubi və Mərkəzi Asiya məsələləri üzrə müavini Donald Lu deyib.

2022-ci il martın 7-də keçirildiyi deyilən toplantının ertəsi günü Pakistandakı müxalifət partiyaları Milli Assambleya sədrinin katibliyinə keçmiş baş nazir İmran Xana qarşı etimadsızlıq təklifini təqdim ediblər. İclasdan bir ay sonra Pakistan parlamentində 2022-ci il aprelin 10-da keçirilən etimad səsverməsində 174 “xeyr” səsi alan İ. Xan hökuməti çöküb.

E. KAMAL

Ana səhifəyə dön