Rəsul Quliyev: “Nə ABŞ, nə də Avropa İttifaqı Azərbaycanın əleyhinə getməyəcək”

“Əhalisinin sayı Azərbaycanın ümumi əhalisinin 0,1 faizini təşkil edən, sahəsi 2.5 min kvadrat kilometr olan və azərbaycanlıların yaşadığı rayonlarla əhatələnmiş kiçik bir ərazidə qondarma prezident seçkisi keçirməyə heç bir ağıllı millətçi getməz. Əgər belə bir ağılsız addımı atmağa cəsarəti çatanlar varsa, deməli, onları bu işi görməyə sövq edənlər var".

Bunu Reyting.az-a Azərbaycan parlamentinin sabiq sədri Rəsul Quliyev separatçı ermənilərin Xankəndi şəhərindəki qondarma seçkisindən danışarkən deyib.

R. Quliyev iddia edir ki, bu işi gördürən yeganə qüvvə Putin Rusiyasıdır:

"Dünya tərəfindən qəbul edilməyən saxta seçkilər Putinin aləmində Rusiyanın böyük zəfəridir. Putin bu seçkiləri dini rituallar səviyyəsinə qaldırıb. O, işğal etdiyi Ukrayna ərazilərində keçirdiyi saxta seçkiləri Xankəndidəki saxta seçki ilə sinxronlaşdırıb. Bu adam, sanki özünün düzəltdiyi qeyri-real həyatda yaşayır".

Keçmiş parlament sədrinin sözlərinə görə, Putinin nə istədiyi hamıya məlumdur: "Güçlü kəşfiyyat təşkilatları olmasa belə, onun nə istədiyini anlamaq çətin deyil. Ukrayna müharibəsində həm beynəlxalq aləmdə, həm də cəbhədə uduzur, ancaq bunu qəbul etmir, uduzduğunu anlamır, çünki onun öz aləmi var, o aləmdə, əksinə, o udur, Ukraynanı özünə tabe edir, Lukaşenko kimi bir şəxsi prezident təyin edir, ondan sonra keçir Qazaxıstana, Astana başda olmaqla Şimali və ya Şərqi Qazaxıstan yaradır, sonra da onu rus imperiyasına birləşdirir”.

R. Quliyev əlavə edib ki, Ermənistanda Paşinyan hakimiyyətə gəldiyi gündən Putin onu devirərək yerinə Sarksiyan və ya Köçəryan tipli bir şəxsi hakimiyyət başına gətirmək istəyir. Kiçik bir Ermənistanda bu işi görə bilməməsi onu rahat buraxmır:

“Azərbaycan işğal olunmuş torpaqlarını azad etməyə başlayanda, bir-iki rayon azad olunduqdan sonra Putin düşünürdü ki, ermənilər (Köçəryan və Sarksiyana da söz vermişdilər) Paşinyanı yıxacaqlar, o da təntənə ilə kimisə prezident qoyacaq və bundan sonra müharibəni dayandıracaq. Belə bir günü gözlədiyi vaxt Azərbaycan Ordusu Şuşanı da azad etdi və sınıq-salxaq erməni ordusunu mühasirəyə aldı. Bundan sonra Putin gözləmədiyi və qurmadığı B planını həyata keçirməyə məcbur oldu. Yəni faktiki olaraq Xankəndini işğaldan azad etməyə imkan vermədi. Bütün torpaqların azad edilməsi və işğalçıların təmizlənməsinə maksimum iki gün qalmış müharibə dayandırıldı. Bu, 2020-ci il idi. Hələ heç kim Rusiya ordusunun 2-ci yox, blef ordu olduğunu bilmirdi. Çünki Ukrayna ilə müharibə başlamamışdı”.

R. Quliyev bildirib ki, 44 günlük müharibədən sonra Putin bütün gücünü Paşinyanı devirməyə yönəltsə də, Paşinyan yeni seçkilər keçirərək qalib oldu: “Yəni Putinin ağzına tərs bir sillə ilişdirdi. Putin siyasi arenada da, terror planında da Paşinyana qalib gələ bilmədi. Köçəryan və Sarksiyanı maliyyələşdirməyi saxladı, Rusiyada və Ermənistanda yaşayan başdan xarab millətçiləri işə saldı. Əslində ermənilər artıq bir neçə dəfə Putinə “yox” deyib, ancaq onun aləmində ermənilər onu sevir.

Hazırda Rusiya ordusu Xankəndidə oturub. Vəzifəsi Azərbaycan qanunlarının yerinə yetrilməsini təmin etmək, qeyri- qanuni hərəkətlərin baş verməsinə mane olmaqdır. Erməni separatçıları kiçik də olsa, Xankəndidə silahlı qüvvələr yaradıb, onun qarşısını almaq vəzifəsini görmək əvəzinə, Rusiya onları silahlandırır. Bu silahları mütəmadi qonşu rayonlara qarşı istifadə edirlər”.

R. Quliyev qeyd edib ki, Rusiya vətəndaşı olan Babayan kimi bir şəxsə qondarma bir quruluşda aparıcı rollardan birini veriblər, Rusiya XİN isə gecə-gündüz Paşinyanın əleyhinə notalar verir:

“Nə Rusiyanın, nə də Ermənistan millətçilərinin analiz etmək qabiliyyətləri yoxdur. Əgər bir qədər düşünsəydilər, bilərdilər ki, nə ABŞ, nə də Avropa İttifaqı heç vaxt Azərbaycanın əleyhinə getməyəcək. Çünki son 2 ildə prezident Əliyev həm ABŞ, həm də Aİ-nın liderləri ilə çox yaxşı münasibətlər yaradıb və Azərbaycanın siyasətinin nədən ibarət olduğunu başa sala bilib. Ermənistan Rusiya ilə silahdaşlıq edəndə Azərbaycan Aİ ilə qaz müqaviləsi imzalayıb. Ermənistan Putinin tələbi ilə Ukraynanın əleyhinə danışanda prezident Əliyev Ukraynaya humanitar yardımlar göndərirdi.

Paşinyanın qərbyönlü olduğu məlum idi. Ancaq atdığı addımlar qərbyönlü deyildi. 15-20 gündür ki, Paşinyan sanki yuxudan ayılıb, Avropa İttifaqı və ABŞ-a mesajlar göndərir. Azərbaycanın Qərb pozisiyası, Ukrayna müharibəsi başlayandan məlumdur. Türkiyənin də dəstəyi bir mənalıdır. Bunları həm erməni millətçiləri, həm də Putin Rusiyası unutmamalıdır”.

R. Quliyevin iddiasına görə, Putinin B planının davamı da var: “O, Ukrayna müharibəsindən sonra Qazaxstanın böyük bir hissəsini işğal edib imperiyasına qatdıqdan sonra Xankəndidə saxta referendum keçirib Rusiyaya birləşdiyini elan etmək istəyir. Ümid edirəm ki, onun bu planı reallaşmayacaq".

E. KAMAL

Ana səhifəyə dön