Rusiya ilə Fransa arasındakı "Qırmızı xətt" itə bilər

Fransa prezidenti Emmanuel Makron martın 7-də ölkəsində fəaliyyət göstərən siyasi partiyaların liderləri ilə görüşüb. Görüş zamanı E. Makron deyib ki, Ukraynaya dəstək məsələsində heç bir məhdudiyyət olmamalıdır.

Reyting.az xəbər verir ki, Rusiya prezidenti Vladimir Putinin “Heç bir məhdudiyyət yoxdur. Ukraynanın müttəfiqlərinin özləri üçün müəyyən etdiyi çərçivə Rusiyaya çox üstünlük verir", - fikrinə də münasibət bildirən Fransa prezidenti deyib: "Rusiyaya heç bir məhdudiyyətimizin olmadığını Putinə göstərməliyik".

İclasda iştirak edənlər, Fransa Kommunist Partiyasının lideri Fabien Roussel və Milli Mitinqin lideri Jordan Bardellin sözlərinə görə, Makronun dediklərindən belə çıxır ki, artıq Fransanın Ukraynaya dəstək məsələsində heç bir məhdudiyyət, "Qırmızı xətt" yoxdur.

Deputat Bertrand Pançet isə "Le Figaro" qəzetinə deyib: "Prezident Ukraynada Rusiya təhlükəsi ilə mübarizə məqsədilə əlavə resursların tez bir zamanda səfərbər edilməsinin zəruriliyi barədə çox ciddi danışdı".

Görüşün digər iştirakçısı, adının açıqlanmasını istəyən fransalı siyasətçi "Le Monde" nəşrinə bildirib ki, Makron narahatdır, o, Rusiya ordusunun Odessaya yaxud Kiyevə doğru irəliləməsi risklərindən danışdı.

Qeyd olunur ki, E. Makron çıxışı zamanı deyib: “Biz heç bir halda Moskvaya bunu etməyə icazə verməməliyik”.

Fransa prezidenti bununla özünün Ukraynaya dəstək məsələlərində artıq qırmızı xətlərinin olmadığına işarə edib.

Rusiya Federasiyası Təhlükəsizlik Şurasının sədr müavini Dmitri Medvedev Makronun dediklərini şərh edib:

"Bu artıq o deməkdir ki, Rusiya ilə Fransa arasında “Qırmızı xətt” qalmayıb".

D. Medvedev mövzu ilə bağlı paylaşdığı şərhində Roma hüququndan sitat gətirməklə, “In hostem omnia licita”, yəni “Düşmənlə münasibətdə hər şeyə icazə verilir”, - ifadəsi ilə yekunlaşdırıb.

Xatırladaq ki, E. Makron fevralın 26-da deyib ki, Avropa ölkələri Rusiyanın Ukrayna ilə müharibədə qalib gəlməsinin qarşısını almaq üçün hər şey etməlidir. Fransa prezidenti eyni zamanda etiraf edib ki, Qərb müttəfiqləri öz qoşunlarını tezliklə Ukraynaya göndərə bilərlər. Makron onu da əlavə edib ki, bu məsələdə hələlik konsensus olmasa da müzakirələr davam edəcək.

Makronun Rusiya barədə söylədiklərini Rusiya prezidentinin mətbuat katibi Peskov cavabsız qoymayıb. Söylənilənlərə şərh verən Peskov xəbərdarlıq edərək bildirib ki, NATO alyansının hərbçiləri Ukraynada peyda olacaqları təqdirdə Rusiya ilə NATO arasında birbaşa münaqişə artıq qaçılmaz olacaq.

V. Putin də məsələyə toxunub. O, Fransanı və Qərbi hədələyərək “mümkün müdaxiləçilər” üçün “faciəli nəticələrdən” söz açıb.

Onu da qeyd edək ki, Makronun söylədiklərinin onun subyektiv fikri kimi qiymətləndirən bəzi Qərb ölkələri, eləcə də ABŞ öz qoşunlarını Ukraynaya göndərmək fikrində olmadığını bəyan edib. NATO-nun baş katibi Yens Stoltenberq də rəhbərlik etdiyi alyansın belə planlarının olmadığını təsdiqləyib.

Martın əvvəlində Fransa prezidenti Makron Çexiyanın Novinky.cz nəşrinə müsahibə verərək yenidən bu məsələdən söz açıb. O deyib: “Bu o demək deyil ki, Fransa olaraq biz öz qoşunlarımızı yaxın gələcəkdə dost Ukraynaya göndərilməsi imkanını nəzərdən keçiririk, lakin biz bu mövzu ilə bağlı geniş müzakirələrə davam edirik və Ukraynaya dəstək olmaq üçün edilə biləcək hər şeyi düşünürük”.

Oqtay QORÇU

Ana səhifəyə dön