Deputat: “İlham Əliyevə və Ərdoğana sona qədər güvənməliyik”

“Mən əvvəllər də söyləmişdim ki, Paşinyanın psixikasında ciddi problemlər olduğu üçün onun addımları normal məntiqlə izah oluna bilməz. Onun hərəkətlərini izləməklə niyyətini müəyyənləşdirmək mümkün deyil. Amma o da mümkündür ki, Köçəryan və Serj Sarkisyanın nəzarət etdiyi “Qarabağ klanı” və onların ordudakı tərəfdarları Paşinyanı saymır. 90-cı illərdə də Ter-Petrosyan həmişə gileylənirdi ki, səhra komandirləri ona qulaq asmırlar”.

Reyting.az xəbər verir ki, bunu Bütöv Azərbaycan Xalq Cəbhəsi Partiyasının (BAXCP) sədri, deputat Qüdrət Həsənquliyev deyib.

Ermənistan Baş naziri Paşinyanın bir tərəfdən dünya güclərinə atəşkəsə nail olmaq üçün yalvarması, digər tərəfdən isə atəşkəsi dərhal pozması ilə bağlı suala cavabında Q. Həsənquliyev əlavə edib ki, Azərbaycan Minsk qrupunun həmsədrlərinə, beynəlxalq ictimaiyyətə bu barədə məlumat verməlidir: “1992-ci ilin mayın 6-da İran prezidenti Rəfsəncaninin dəvəti ilə Ter-Petrosyan və Yaqub Məmmədov sülh danışıqları üçün Tehrana getdilər. İndi necə ki, həmsədr dövlətlərin iştirakı ilə atəşkəs haqqında razılaşmalara əhəmiyyət vermirlər, onda da ermənilər İrana eyni cür hörmətsizlik edərək danışıqlar getdiyi bir vaxtda Şuşa şəhərini işğal etdilər”.

Q. Həsənquliyevin sözlərinə görə, Ermənistan siyasətçilərini, klan başçılarını erməni gənclərin, döyüşə göndərdikləri qadın və uşaqların həyatı yox, hakimiyyət düşündürür: “Həm də “Qarabağ klanı” fikirləşir ki, müharibədə nə qədər çox Paşinyan tərəfdarı qırılsa, bir o qədər onların xeyirinədir. Ola bilsin, fikirləşirlər ki, məğlubiyyətdən istifadə edib Paşinyanı devirsinlər və sonra xarici himayədarlarının dəstəyi ilə 90-cı illərdə olduğu kimi, torpaqlarımızı təkrar işğal edərlər, azad etdiyimiz torpaqları təkrar işğal edə bilməsələr belə, onsuz da bu ərazilər onların deyil”.

Ermənistanda “Qarabağ klanı” hakimiyyətə gələrsə Rusiyanın münaqişəyə aktiv müdaxiləsinin mümkün olub-olmayacağı ilə bağlı suala cavabında deputat əlavə edib:

“Rusiya bilir ki, bunu etsə Azərbaycanı həmişəlik itirəcək. Ona görə də bizimlə dostluğa sadiq qalıb, bəyan etdikləri neytrallığı qoruyacaqlar.

Amma hər şey Türkiyə və Azərbaycanın qətiyyətindən asılı olacaq. Xüsusilə Türkiyənin. Çünki Türkiyə güclü dövlətdir. Türkiyə beynəlxalq təzyiqlər qarşısında güzəştə gedib bizi tək buraxarsa, bizim də güzəştə getməkdən başqa yolumuz qalmayacaq. Amma kimsənin Ərdoğanın iradəsini sındıra biləcəyini düşünmürəm. Ona görə də zamanında “nə qədər ki, Ərdoğan hakimiyyətdədir biz torpaqlarımızın azad olunması üçün savaşa başlamalıyıq”,- deyirdim. İlham Əliyevə və Ərdoğana sona qədər güvənməliyik. Onlar işğala son qoymaq üçün mümkün olan hər şeyi edəcəklər”.

Ana səhifəyə dön