Qüdrət Həsənquliyev: “Türkiyə Qarabağın azadlığına özünün İstiqlal savaşı kimi baxır”

“Rusiya vasitəçi ölkə kimi neytrallığını qoruyub saxlamalıdır. Rusiya Ermənistanın hərbi-siyasi müttəfiqi olsa da, bizim də strateji tərəfdaşımızdır. Azərbaycan Rusiya ilə səmimi olaraq yaxın qonşuluq və dostluq siyasəti yürüdür və bu münasibətlərə böyük önəm verir. Hesab edirəm ki, Putin indiki mövqeyi ilə, inşallah, keçirəcəyimiz Qələbə paradına regionun digər dövlət başçıları kimi dəvət haqqını qazanıb”.

Reyting.az xəbər verir ki, bunu Bütöv Azərbaycan Xalq Cəbhəsi Partiyasının (BAXCP) sədri, deputat Qüdrət Həsənquliyev Rusiya Xarici İşlər Nazirliyinin Paşinyanın kömək yalvarışlarına verdiyi cavabı şərh edərkən bildirib.

Q. Həsənquliyev deyib ki, axı Rusiya niyə Ermənistana kömək etməlidir? Söhbət yalnız Paşinyanın ruslara nifrətindən getmir:

“Erməni xalqı öz xəyanətkar xisləti ilə hesab etdi ki, Rusiyaya güvənərək Azərbaycanın 20 faiz ərazisini işğal edib, yeni müharibə başlayarsa, Rusiya etməsə də, Qərb və digər region dövlətləri onlara kömək edəcək, həm də onlar güclü müdafiə istehkamları qurublar. Deməli, Rusiyaya xəyanət edib, ruslara nifrət bəsləyən birini özlərinə lider seçə bilərlər. Paşinyan da hakimiyyətə gələn kimi Rusiyanı tədrici addımlarla Ermənistandan çıxarmağa başladı, xalq da onun bu siyasətini dəstəklədi. Ona görə də Rusiya deyir ki, biz Kollektiv Təhlükəsizlik Müqaviləsi Təşkilatı çərçivəsində öhdəliklərimizə sadiqik. Müharibə Azərbaycan ərazisində getdiyindən biz sizin kimi satqınlara görə beynəlxalq hüququ ayaqlar altına atıb Azərbaycanla, həm də təkcə Azərbaycanla yox, o cümlədən Türkiyə ilə münasibətləri poza bilmərik. Bununla da Rusiya satqın erməni xalqına “dərs” verir. Paşinyana da dolayısı ilə deyir ki, özün kimi saqqallı rusafob tərəfdarlarını göndər Qarabağa döyüşməyə, qoy qırılsınlar. Sonra baxaq görək İrəvanın küçələrində səni kim dəstəkləyəcək. O da axmaq olduğu üçün göndərir. Həm də axmaq olduğu üçün vəziyyəti düzgün qiymətləndirə bilmir, işğalçı ordusunu Azərbaycandan çıxarmaq əvəzinə, fikirləşir ki, son əsgərini də döyüşə göndərib vaxt udsa, bəlkə Qərb özü kömək etməsə də, Rusiyaya təzyiq göstərib onları Ermənistan üçün döyüşməyə göndərə bilər. Amma Paşinyan başa düşmür ki, məsələ tək onunla bağlı deyil, daha çox həmişə onlara qucaq açmış qonşularına nankorluq edən erməni xalqı ilə bağlıdır. Bu xalq qonşularına etdiyi xəyanətlərin acısını yaşayıb tövbə etməli, qonşuları ilə ləyaqətli birgəyaşayış yolu seçməli, beynəlxalq hüquq normalarına hörmət etməyi öyrənməlidir”.

BAXCP sədrinin sözlərinə görə, Paşinyan hərbi canidir: “O, öz təhrikedici hərəkətləri ilə bizə müharibəyə başlamaqdan ayrı yol qoymadı. Əvvəlcə dedi ki, “Qarabağ Ermənistandır”. Sonra bizim hisslərimizə toxunub, bizi alçaltmaq üçün qondarma rejimin cinayərkar başçısının “inaqruasiya”sını Şuşada təşkil etdi. Bu azmış kimi bəyan etdi ki, qondarma rejimin “parlamenti”ni Şuşaya köçürəcək. Bundan başqa, oğlunu Qarabağa hərbi xidmətə göndərdi. Ardınca həyat yoldaşına hərbi forma geyindirib, əlinə avtomat silahı verib Qarabağa yolladı. O da gülə-gülə Azərbaycan əsgərinin maketinə atəş açmaqla bacardığı formada bizi alçaltdı. Müdafiə naziri yeni torpaqlarımızı işğal edəcəyi ilə bizi hədələdi.

Ermənistan beynəlxalq hüquqa zidd olaraq işğal altındakı torpaqlarımızı xaricdən köçürülən ermənilərlə məskunlaşdırmağa başladı və s. Sonra sərhədlərimizə hücum etdi, qarşımıza yeni alçaldıcı şərtlər qoydu, bir sözlə, bizi əks-hücum əməliyyatlarına başlamağa məcbur etdi. Müharibə başlayandan sonra isə beynəlxalq qanunlarla qadağan olunmuş silahlardan istifadə etməyə başladı. Həmin silahlardan döyüş meydanlarından çox uzaqda olan şəhər və kəndlərimizdə dinc sakinlərə atəş açdırdı. Yüzə yaxın dinc sakini qətlə yetirdi. Bu axmaq fikirləşirdi ki, Azərbaycanı müharibəyə başlamağa məcbur etdiyi kimi, indi də bizi cavab addımları kimi Ermənistandakı mülki obyektlərə zərbə endirməyə təhrik edəcək və beləliklə də Rusiyanı bu münaqişəyə cəlb edəcəkdir. Bu zaman Qərb ona əsgəri yardım etməklə yanaşı, Dağlıq Qarabağın müstəqilliyini tanıyacaq. Çünki bu müharibə ilə həm də Qərb ölkələrindəki müttəfiqləri ilə aralarında müəyyən gərginlik yaşanan Türkiyə ilə Rusiyanı da üz-üzə qoyacaq və Qərbdəki müəyyən dairələri arzusuna çatdırmaqla böyük xidmət göstərmiş olacaq. Qarşılığında isə bu yolla qondarma rejimin beynəlxalq miqyasda tanınmasına nail olacaq”.

Q. Həsənquliyev Paşinyanı nəzərdə tutaraq əlavə edib: “Bu səfeh məxməri Baş nazirin kimliyini və hansı ağla sahib olmasını hamı tezliklə başa düşdü və ondan üz döndərdi. İndi o, minlərlə insanın həyatı bahasına başa gəlmiş bu müharibə avantürasına görə məhkəmə qaşısında cavab verməlidir. Müharibə başa çatdıqdan sonra Rusiyanın da bu məsələdə bizə kömək edəcəyinə ümid bəsləyirəm”.

Q. Həsənquliyev inanır ki, Rusiya prezidenti Putin mövqeyini dəyişməyəcək: “İnanmıram ki, onun bizim əleyhimizə hansısa planı olsun. Rusiya, Türkiyə və Azərbaycan liderlərinin xarekterində oxşar cəhətlər çoxdur, satqınlığa və xəyanətə yer yoxdur. Yeltsin vaxtilə deyirdi ki, o, döyüşçüdür. İndi həmin fikri hər üç liderə aid etmək olar. Hər üç şəxs böyük strateq olmaqla yanaşı eksterimal vəziyyətdə daha böyük potensial ortaya qoymağı, öz ölkələrinin marağı tələb edəndə sona qədər mübarizə aparmağı bacarır. Azərbaycanın ərazi bütövlüyünün bərpası hər üç ölkənin milli maraqlarına uyğundur. Həm də təkcə onların yox, Ermənistan da daxil olmaqla bütün region ölkələrinin. Ona görə də onların mövqelərindən geri çəkiləcəyinə inanmıram. İnşallah, torpaqlarımızı tamamilə azad edəcəyik”.

Deputat sonda bir məqamı da diqqətə çatdırıb: “Türkiyə Qarabağın azadlığı uğrunda apardığımız Vətən müharibəsinə özünün İstiqlal savaşı kimi baxır. Ona görə də 120 min erməniyə Azərbaycan torpaqlarında ikinci eməni dövləti qurmaq istəyənlər gərək o sayda da əsgərinin ölümünü göz önünə alıb nəticəsi onlar üçün qaranlıq olan, regionu qeyri-müəyyənliyə sürükləyəcək savaşa girsinlər...”

Sonda onu da qeyd edək ki, Q. Həsənquliyev Türkiyədə baş vermiş zəlzələ nəticəsində həyatını itirənlərə Allahdan rəhmət, yaralılara şəfa diləyib. “Türk xalqı üçün keçmiş olsun!”- deyib.

Ana səhifəyə dön