Daşnaksütyun Partiyası: “Ermənistan təcrid olunur, ölkənin təhlükəsizlik sistemi məhv edilib”

“Ermənistan dünyadan təcrid olunmaqda davam edir, beynəlxalq münasibətlərdə onun subyektivliyi tarixin ən aşağı səviyyəsinə enib”.

Reyting.az xəbər verir ki, bunu Ermənistanın Daşnaksütyun Partiyasının rəsmisi İşxan Saqatelyan bəyan edib.

Onun sözlərinə görə, səlahiyyətlilər son iki il yarımda Ermənistanı və onun xalqını fəlakətə qərq ediblər. Onların fəaliyyəti nəticəsində ölkə fəlakətli müharibə ilə üzləşib, ölkənin təhlükəsizlik sistemi və xarici siyasəti davamlı olaraq məhv edilib.

İ. Saqatelyan deyib ki, hakimiyyətin Ermənistanın beynəlxalq münasibətlərinə dair ibtidai qərarları, ziddiyyətli siyasi açıqlamaları, Ermənistanın Qarabağ məsələsində danışıqlar aparmayan tərəf olmasına gətirib çıxarıb və bu da beynəlxalq ictimaiyyətin gözündə müharibənin başlanmasını qanuniləşdirib: “Nikolun mütləq diletantlığı üzündən dünya Qarabağ problemini öz müqəddəratını təyinetmə hüququ uğrunda mübarizə kimi deyil, tamamilə ərazi mübahisəsi kimi qəbul etməyə başladı. Ermənistan müharibəyə strateji müttəfiqsiz və strateji tərəfdaşları ilə sabit əlaqələr olmadan girdi”.

İ. Saqatelyan

Saqatelyana görə, nəticədə heç bir dövlət Ermənistanla həmrəylik nümayiş etdirməyib, əksinə, Ermənistan bu siyasəti nəticəsində Azərbaycan və Bakını açıq şəkildə dəstəkləyən ölkələr qarşında tək qalıb.

O, müharibədən əvvəl də hiss olunan erməni hakimiyyətinə beynəlxalq hörmətsizliyə işarə edərək deyib ki, 2018-ci ilin oktyabrında Yerevanda Beynəlxalq Frankofoniya Təşkilatının Forumunun keçirildiyi tədbirdən sonra heç bir dövlət lideri Ermənistana rəsmi səfər etməyib:

“Həm strateji müttəfiq - Rusiya ilə, həm də Çin, Avropa Birliyi və ABŞ ilə münasibətlərdə keyfiyyətcə azalma göz qabağındadır. Ermənistanın maraqları bölgəmizdəki əsas oyunçuların maraqları ilə üst-üstə düşmədi”.

Azərbaycana qarşı kəskin mövqedə duran şovinist Daşnaksütyun Partiyasının nümayəndəsi problemin həllini dövlət maraqlarını dərk edən və ən əsası, özünə inamı ruhlandıran hakimiyyət orqanlarının formalaşmasında görür: “Heç bir dövlətin, hətta bizim üçün ən səmimi, balanssız müttəfiq belə macəraçı bir insanla əməkdaşlıq qurmayacaq. İndi isə Ermənistan hələ də dünyadan təcrid olunmuş vəziyyətdədir, düşmən isə yenidən qruplaşır və təsir gücünü artırır. Bütün bunların nəticələri xalqımızın və dövlətimizin üzərinə düşür”.

Şovinist siyasətçi əlavə edib ki, yalnız 11 yanvarda bu xaindən (Baş nazir Paşinyanı nəzərdə tutur-red.) yeni güzəştlər gözləyən “düşmən” ləyaqətini itirmiş və təslim imzalayan bir liderlə danışıq aparmaq istəyinə sahib ola bilər.

Ana səhifəyə dön