Siyasi şərhçi: “ABŞ-ın dünya dövlətlərini klonlaşdırmaq haqqı yoxdur”

“ABŞ strateji maraqları üçün bütün vasitələri məqbul sayıb, dünya siyasətində öz maraqlarını təmin etmək üçün demokratiyadan sui-istifadə edir. Hətta bu vasitələr beynəlxalq qanunları tapdalamaq hesabına olsa belə, ABŞ bunun həyata keçirilməsindən çəkinmir. Bu strategiya isə ABŞ-ın pul vahidi olan dolları dünya valyutası kimi qoruyub saxlamaqdan ibarətdir”.

Bunu Reyting.az-a açıqlamasında Strateji Planlaşdırma və Araşdırmalar İnstitutunun rəhbəri, siyasi şərhçi Azad Məsiyev deyib.

ABŞ Dövlət katibi Entoni Blinkenin Vaşinqtonun bundan sonra rejimləri devirməyəcəyi və demokratiyanı zorla təbliğ etməyəcəyi ilə bağlı dediklərini şərh edən A. Məsiyev bildirib ki, ABŞ xarici siyasətində beynəlxaq qanunların gücünə deyil, gücdən və zorakılıqdan doğan “qaydalara” üstünlük verməkdədir.

Onun iddiasına görə, ABŞ dünyaya demokratiya ixrac etmək haqqını mənimsəyib, özünü dünyada demokratiyanın qarantı kimi təqdim edib, bundan süni-istifadə etməkdən çəkinmir:

“ABŞ-da hansı partiyanın hakimiyyətdə olmasına baxmayaraq qeyd etdiyim strategiya dəyişməz qalır, sadəcə, hakimiyyətə gələnlər kosmetik dəyşikliklər etməyə məcbur olurlar”.

A. Məsiyev bildirib ki, ABŞ xarici siyasətində hədəflərini demokratik dəyərlərdən süni-istifadə yolu ilə əldə edir: “Bu baxımdan hansı dövlət ABŞ-ın iqtisadi-siyasi maraqlarına uyğun davranmırsa, həmin dövlətlərə anti-demokratik rejim damğası vurulur və dövlət çevrilişi edilir. Lakin gedişat sübut etdi ki, bu yanaşma ABŞ-ın dünyadakı imicinə mənfi təsir göstərir. Dövlət katibi Entoni Blinkenin “Vaşinqtonun artıq rejimləri devirməyəcəyini və demokratiyanı zorla təbliğ etməyəcəyini” bildirməsi də dediklərimi təsdiqləyir”.

İnstitut rəhbəri əlavə edib ki, ABŞ ayrı-ayrı ölkələrdə öz marağına uyğun rəngli inqilablar edərək münasib bildiyi şəxsləri hakimiyyətə gətirib və bunu demokratiyanın qələbəsi kimi təqdim etsə də, bu, həmin xalqın iradəsinin zorlanması deməkdir:

“Hesab edirəm ki, hər hansı bir ölkədə dövlət çevriliş edərək öz maraqlarına uyğun şəxsi hakimiyyətə gətirmək həmin xalqa qarşı ən ağır cinayət hesab edilməlidir. Motivindən asılı olmayaraq, bir dövlətin başqa bir dövlətdə çevriliş etməsi beynalxalq terror cinayəti sayılmalıdır”.

A. Məsiyev daha sonra əlavə edib: “Blinken etiraf edir ki, bu illər ərzində ABŞ-ın demokratiyanı zorakılıqla tətbiq etməsi çox baha başa gəlir. Onda belə bir sual meydana çıxır: bu illər ərzində həmin dövlətə dəyən ziyanı kim ödəyəcək? Məsələn, Gürcüstanda çevriliş edərək Saakaşvilini hakimiyyətə gətirdilər və nəticəsini gürcü xalqı ağır ödədi - ərazilərinin bir qismi itirildi. Ukraynada da eyni prosesdir, bu günə qədər vətəndaş müharibəsi davam etməkdədir. Yaxın Şərqi götürək, ABŞ-ın “Ərəb baharı” layihəsi ərəb ölkələrinə nə verdi: hərcmərclik, ağır iqtisadi vəziyyət, kütləvi insan təlafatı və s. ABŞ-ın haqqı yoxdur ki, dünya dövlətlərini öz maraqlarına uyğun klonlaşdırsın”.

Siyasi şərhçi sonda xatırladıb ki, beynəlxalq hüquq görə hər bir xalqın öz müqəddəratını təyin etmək haqqı var və xalqlar yaşayacağı və ya quracağı dövlətin formasını seçmək hüququna malikdirlər.

Ana səhifəyə dön