Qanlı Rusiya: Putinin ölüm siyahısında çeçenlər də var

Böyük Britaniyanın “The Sunday Times” qəzetində Rusiya kəşfiyyatının xaricə sığınmış çeçenləri bir-bir dənlədiyi haqda yazı dərc olunub. “Qanlı Rusiya: Putinin ölüm siyahısında olan çeçenlər” başlıqlı məqalənin müəllifləri Luiza Kallaqan və Vera Mironovadır.

Reyting.az xəbər verir ki, Novator.az-ın ingiliscədən çevirdiyi məqalədə deyilir:

“Bir aydan çoxdur ki, Mahran Abdulayev Avstriyanın elə də böyük olmayan şəhərində, üçotaqlı mənzilində oturub qatillərini gözləyir. Onun beş övladı var. Uşaqlar yalnız məktəbə gedəndə evdən çıxırlar. Mahranın xanımı da nadir hallarda, dükandan bazarlıq etmək lazım gələndə evdən çıxır və tez də mənzilinə dönüb qapısı bərk-bərk kilidlənmiş evə qapanır. Bu ailənin belə bir vəziyyətə düşməsinin səbəbi var. Abdulayevin təhlükəsizliyi naminə ad-soyadı dəyişdirilsə də, ötən il o, Rusiya kəşfiyyatının “qara siyahı”sında olduğundan xəbər tutub. Bu məlumatı ona Avropanın kəşfiyyat qurumları çatdırıb”.

Yazıda bildirilir ki, Mahran Abdulayevin adının salındığı “qara siyahı”da ümumilikdə beş nəfərin adı olub. Onların hamısı vaxtilə rus-çeçen müharibəsində iştirak etmiş, sonradan Rusiyadan mühacirət edərək xaricə sığınmış çeçenlərdir. Artıq siyahıdakı adamlardan dördü öldürülüb, sağ qalan bircə Mahrandır. Siyahıdakı dörd nəfərdən biri Türkiyədə, biri Gürcüstanda, biri Ukraynada, biri də Almaniyada qətlə yetirilib.

“The Sunday Times” bu qətllərdə Rusiya xüsusi xidmət orqanının izinin açıq-aydın göründüyünü, Mahran Abdulayevin də bir neçə ay qabaq təhdid olunduğunu yazır: “Bir neçə ay öncə özünü çeçen kimi təqdim edən bir şəxs Abdulayevə zəng edib, hazırda Almaniyada, Berlin şəhərində olduğunu bildirib və hədə-qorxu gələrək Mahrandan susmağı, dilini dinc saxlamağı tələb edib. Bu zəngdən qabaq isə rus casuslar Çeçenistanda Abdulayevin valideynlərini taparaq hədələyiblər”.

Təhdidlərin ardınca sükut çöküb. “The Sunday Times” bu sükutun Mahran Abdulayevi çox vahimələndirdiyini və sanki onun hər an öldürülə biləcəyindən xəbər verdiyini qeyd edir.

Çeçen mühacir qəzetə açıqlamasında deyib: “Əslində, istərdim kimsə zəng vurub məni hədələsin. Hazırkı susqunluqda isə nəyi gözlədiyimi sadəcə bilmirəm. Bu çox vahiməli sükutdur”.

Gürcüstan Strateji və Beynəlxalq Tədqiqatlar Fondunun əməkdaşı Aleksandr Kvaxadze “The Sunday Times”a deyib ki, son iki ildə mühacir çeçenlərin öldürülməsi halları daha da artıb.

Kvaxadze bu işdə Rusiya kəşfiyyatının xaricdə, o cümlədən diaspor qurumlarında yerləşdirdiyi çeçen agentlərin də iştirak etdiyini düşünür: “Təəssüf ki, Avropada hökumətlər, hüquq mühafizə orqanları çeçen diaspor təşkilatlarında toplaşmış adamların məramını, məqsədini yetərincə qiymətləndirə bilmir”.

Məqalədə Rusiya Federasiyasının Çeçenistan Respublikasının başçısı Ramzan Kadırovun keçmiş cangüdəni Umar İsrailovun faciəli taleyi xatırladılır: “Umar İsrailov çeçen liderin ona işgəncələr verdiyi haqda açıqlamasından az sonra, 2009-cu ildə Avstriyanın paytaxtı Vyanada qətlə yetirildi. Ardınca qətllər silsiləsi başlandı. Təkcə Türkiyənin İstanbul şəhərində 10-a yaxın çeçen öldürüldü. Fransa, Almaniya və Ukraynada da çeçenlər qətlə yetirildilər. 2020-ci ildə daha bir çeçen Avstriyada qətliamın qurbanı oldu”.

Mahran Abdulayevin “qara siyahı”ya düşməsinin, izlənməsinin səbəblərinə gəlincə, qəzet yazır ki, o, vaxtilə çeçen mücahidi kimi döyüşüb və rus-çeçen savaşının iştirakçılarından olmuş Zəlimxan Xanqoşvili ilə yaxın dost olub. Zəlimxan Xanqoşvili 2019-cu ilin avqust ayında Almaniyanın paytaxtı Berlində kiçik bir parkda yaxın məsafədən açılan atəş nəticəsində öldürülüb. Bu qətli də Rusiya agentinin törətdiyi ehtimal edilir”.

Mahran Abdulayevin sözlərinə görə, Avstriyanın xüsusi xidmət orqanları onunla vaxtaşırı əlaqə saxlayır, onun təhlükəsizliyi üçün əllərindən gələni etdiklərini deyirlər.

Ana səhifəyə dön