Bayden erməni lobbisinin siyasi alətinə çevrilib

“Türkiyə Cümhuriyyəti xarici və daxili siyasətində prezident Ərdoğanın rəhbərliyi altında tam müstəqil siyasət yeritməkdədir. Prezident Ərdoğan dünya siyasətində özünəməxsus yeri, ədalətli mövqeyi olan şəxsdir. Onun İslam dini ilə yanaşı bəşəri dəyərlərlə seçilməsi ABŞ-la yanaşı digər Qərb dövlətlərini də narahat etməkdədir. Bu narahatlıq müxtəlif sahələrdə özünü açıq göstərir”.

Bu sözləri Reyting.az-a açıqlamasında Strateji Planlaşdırma və Araşdırmalar İnstitutunun rəhbəri Azad Məsiyev ABŞ prezidenti Baydenin “erməni soyqırımı” barədə bəyanatını şərh edərkən deyib.

Onun sözlərinə görə, Türkiyənin Rusiya ilə siyasi, iqtisadi, hərbi sahədəki əlaqələrini inkişaf etdirməsi, iki dövət arasında dostluq və əməkdaşlığın sürətlə artmasına səbəb olub. Bu isə ABŞ-ı və onun əlaltıları olan bəzi Qərb dövlətlərinin başçılarını qəzəbiləndirir:

“Türkiyə və Rusiya prezidentlərinin şəxsi münasibətlərinin dostluq səviyyəsində olması da, qeyd etdiyim kimi, ABŞ-ın bugünkü rəhbərliyinin qəzəbini bir az da artırıb. Bildiyiniz kimi, ABŞ Rüsiyanı özünə düşmən elan edib, Bayden isə Rusiya prezidentini "qatil" elan etməsinə baxmayaraq Türkiyə prezidenti Ərdoğan həmkarı Putinlə dostluq əlaqələrini inkişaf etdirməkdədir. Eyni zamanda Ərdoğan Türkiyənin maraqlarından və prinsipal mövqeyindən geri çəkilməyib və belə bir niyyəti də yoxdur”.

A. Məsiyev

İnstitut rəhbəri qeyd edib ki, Azərbaycanın apardığı 44 günlük Vətən müharibənin nəticəsi ABŞ-ın Cənubi Qafqazla bağlı planlarını siyasi cəhətdən fiaskoya uğradıb: “Bu müharibədə Türkiyənin, o cümlədən prezident Ərdoğanın mövqeyi xüsusi əhəmiyyət daşıyırdı, eyni zamanda Türkiyənin Cənubi Qafqazda Rusiya ilə hərbi-siyasi əməkdaşılğı ABŞ rəhbərliyini özündən çıxarmaya bilməzdi. ABŞ Türkiyənin Rusiya ilə iqtisadi, siyasi, hərbi əlaqələrinin kəsilməsini, Rusiyaya tətbiq etdiyi iqtisadi-siyasi sanksiya koalisiyasına qoşulmasını istəyir. ABŞ-ın tələbi isə Türkiyənin istər siyasi-iqtisadi, istərsə də hərbi maraqlarına uyğun gəlmir. Bu baxımdan ABŞ-dan gələn təkliflər Türkiyə tərəfindən rədd edilir.

Bu illər ərzində ABŞ və Qərb ölkələri tərəfindən müxtəlif formada Türkiyə dövlətinə təzyiqlər edilib. Türkiyənin Avropa Birliyinə daxil olmasına mane oldular, eləcə də “S-400”lərə görə sanksiyaların tətbiqini, Türkiyəyə qarşı terrorçuların himayə edilməsini və s. kimi təxribatları qeyd etmək olar. Baydenin “soyqırım” açıqlaması Türkiyə dövlətinə edilmiş növbəti təzyiqlərdən biridir”.

A. Məsiyev əlavə edib ki, C. Baydenin erməni lobbisi tərəfindən maliyyələşdirilməsi, himayə olunması sirr deyil: “Bu illər ərzində erməni lobbisinin etdiyi xidmətlərin əvəzi hansısa formada Baydenə tərəfindən ödənilməli idi. Baydenin “soyqırım” açıqlaması bir daha göstərdi ki, ABŞ prezidenti erməni lobbisinin əlində siyasi alətə çevrilib.

44 günlük müharibənin Paşinyan hakimiyyətinə vurduğu böyük zərbə dolaysı ilə ABŞ-a dəydi. Belə ki, Paşinyanı hakimiyyətə gətirən ABŞ-ın planları pozuldu və nəticədə Ermənistanda siyasi böhran yarandı, Paşinyan istefa verdi və təxminən iki ay sonra yeni parlament seçkilərinin keçirilməsi qərara alındı. ABŞ prezidenti Baydenin “soyqırım” açıqlaması həm də Ermənistanda keçiriləcək parlament seçkilərinə hesablanıb, bu seçki prosesində ABŞ-da yaşayan erməni lobbisinin dəstəklədiyi siyasi qüvvələrə dəstək nümayişidir”.

Siyasi şərhçinin sözlərinə görə, Baydenin “soyqırım” açıqlaması siyasi bəyanatdır, heç bir hüquqi əhəmiyyət daşımır, sadəcə, könül bulandırır:

“Türkiyə tərəfi “erməni soyqırımı” iddiasının köklü həlli üçün arxivləri dünya içtimaiyyətinin üzünə açıb. Türkiyə bu barədə rəsmi mövqeyini ortaya qoyub və bəyan edir ki, problemi tarixçilər araşdırsın, həqiqət üzə çıxsın. Türkiyə dövlətinin bu çağrışı istər ermənilərin, istər Qərbin, istərsə də ABŞ-ın maraqlarına uyğun deyil, çünki onlar həqiqət axtarmırlar, onlar üçün həqiqət maraqların təmin olunmasındadır”.

Siyasi şərhçinin fikrincə, Baydenin “soyqırım” açıqlaması ABŞ-ın milli maraqlarınada uyğun gəlmir: “Əksinə, bu açıqlama ABŞ ilə Türkiyə arasında münasibətləri daha da gərginləşdirəcək, Türkiyə ictimaiyyəti ilə yanaşı, dünyada yaşayan 300 miyonluq türkdilli xalqlar arasında anti-ABŞ əhval-ruhiyyəsini bir az da gücləndirəcək. Açığı, bu açıqlama Türkiyə dövlətinin əlinə “siyasi kozur” verdi ki, dünya siyasətində tam müstəqil siyasət yeritsin. Yəni ABŞ-ın hərbi gəmilərinin Qara dəniz bölgəsinə girməsinə icazə verməsin, Yaxın Şərq məsələsində Rusiya ilə daha yaxın siyasət yeritsin, Avrasiya İqtisadi Birliyinə daxil olsun. Türkiyə həmçinin, Turan İttifaqı barədə ciddi addımlar atmaq məcburiyyətində olacaq”.

O ki qaldı ABŞ-ın davranışına, A. Məsiyev deyib ki, bu ölkə əvvəlcə öz keçmişinə, bu gününə və gələcəyinə baxsa, daha yaxşı olardı: “ABŞ-ın uzaq keçmişdə törətdikləri soyqırım cinayətləri az deyil. Hindi xalqının başına gələnləri tarix unutmayıb, qırmızı dərililərin qətliamı barədə ABŞ-ın Texasdakı Hindi Soyqırımı muzeyində kifayət qədər faktlar saxlanılır, 1945-ci ildə Yaponiyanın iki böyük şəhərinə - Hiroşima və Naqasakiyə atılan atom bombasından təxminən 500 min insan ziyan çəkib. Bu insanlar arasında azyaşlı uşaqlar, qocalar, qadınlar da var idi. Onlardan təxminən 300 minə qədəri ölüb, 200 mindən artıq insan yaralanıb, eyni zamanda insanların şəxsi mülkləri dağıdılıb və bu günə kimi həmin şəhərlər radiolakasiyadan əziyyət çəkirlər. Bundan başqa, ABŞ-ın Vyetnamda, Koreyada, Kambocada, Laosda və İraqda törətdiyi qətliamlar barədə faktlar dünya iştimaiyyətinin yadından çıxmayıb.

Bayden siyasi məqsədlər üçün yalan üzərində həqiqət yaratmağa çalışır. Bu yanlış addım isə ABŞ-ın dünya siyasətində nüfuzunu itirməsi ilə nəticələnəcək, eyni zamanda NATO çərçivəsində müttəfiqi olan Türkiyəninin ondan üz döndərməsinə gətirib çıxaracaq”.

Ana səhifəyə dön