Qara dənizin bir hissəsi hava və su nəqliyyatına bağlanıb

Ukrayna sərhədlərinə toparladığı ordunu geri çəkən, ancaq Krım ətrafında onlarla hərbi gəmi və qırıcılar saxlayan Rusiya prezidenti Vladimir Putin ötən gün Qara dənizlə bağlı daha bir planını rəsmiləşdirib.

Reyting.az xəbər verir ki, Ukrayna sərhədlərindən ordu hissələrinin geri çəkilməsində Qərb ölkələrindən gələn təzyiqlərin heç bir rolu olmadığını bildirən Rusiya Müdafiə naziri Sergey Şoyqu Moskvanın özünü qorumaq üçün lazım olan hər şeyi edəcəyini deyib.

May ayında başlayacaq “Defender Europe-2021” hərbi təlimlərinə dair narahatlığını dilə gətirən Şoyqu Rusiya sərhədləri yaxınlığına etap olunan NATO qüvvələrini yaxından izlədiklərini bir daha diqqətə çatdırıb.

27 apreldə İstanbul boğazından keçərək Qara dənizə açılan ABŞ-ın sahil təhlükəsizlik gəmisi “Hamilton” bölgədə Rusiya donanmasının yaxınlığında hərəkət edir. Rus ordusu isə çərşənbə günü Qara dənizin bəzi bölgələrini bağlı elan edib.

Onu da qeyd edək ki, rəsmi Moskva raket gəmisinin Krım sahillərində həyata keçirdiyi atışın görüntülərini yayımlayıb. Svestapol limanından Qara dənizə açılan gəminin özəl görüntülərini paylaşan “Zvezda” kanalı təhlükəsizlik üçün həm dəniz, həm də hava sahəsinin qapadıldığını bildirib.

Əslində Krımda yerləşdirilən “Su-27” və “Su-35” qırıcılarının görüntüləri ötən həftə yayımlanıb. Görüntülərdə Putinin əmri ilə 40 qırıcının Krım yarımadasına gətirdiyi göstərilib.

Rusiyanın rəsmi olaraq aydınlıq gətirmədiyi başqa bir mövzu Ukrayna və Krım sərhədlərində böyük miqdarda silah-sursat saxlamasıdır. Yerli mətbuatın xəbərinə görə, Rusiyaya məxsus hərbi hissələr Ukrayna sərhədindən çəkilsə də, Poqonovo hərbi bazasında silah və mütəxəssislər qalacaq.

Rus mətbuatı Ukraynaya aid Rusiya istehsalı olan “S-300” hava hücumundan müdafiə sisteminin Donbas yaxınlığında yerləşdirdiyini bildirib.

Bu arada Ukrayna və Rusiya arasında müharibə təhlükəsi aradan qalxmış kimi görünsə də, tərəflər faktiki olaraq siyasi dialoq və həll prosesinə daxil olmaqda maraqlı görünmürlər.

2014-cü ildə Rusiyanın ilhaq etdiyi Krımın şimalındakı Herson istiqamətində cəbhə xəttinə səfər edən Ukrayna prezidenti Zelenski Moskvaya yeni təklif göndərib. Zelenski “Normand” formatına ABŞ, Kanada və İngiltərənin daxil olmasını təklf etsə də, onun bu istəyi Moskva tərəfindən rədd edilib. Rusiyanın Xarici işlər naziri Sergey Lavrov ötən gün Donbasda müharibədən qaçmağın mümkün olduğunu dilə gətirsə də, rəsmi Kiyevin millətçiləri dəstəkləməsini tənqid edib.

Ukraynaya açıq şəkildə dəstək verən ABŞ isə dövlət katibi Antoni Blinkeni may ayında Kiyevə göndərəcək. CNN kanalı Blinkenin Ukraynaya səfərinin Kiyevdəki qaynaqlar tərəfindən təsdiqləndiyini bildirib. Beləliklə, Donbasda müharibədən qaçmaq mümkün olsa da, tərəflər siyasi çözüm mərhələsinə tələsmirlər. Bu isə müharibə təhlükəsinin sovuşmadığını göstərir.

Reyting.az

Ana səhifəyə dön