ABŞ-ın Ukrayna ordusuna dəstəyi 2 milyard dolları keçib

Vaşinqton Moskvanın qıcığına səbəb olacaq və gərginliyi yenidən artıracaq addımlar atır. Ukraynanın sərhədə “S-300” kompleksi gətirməsi də Rusiya mətbuatında ciddi narahatlıq kimi təqdim olunur.

Reying.az xəbər verir ki, ABŞ Ukraynaya hərbi yardımlar göndərdiyi bir vaxtda, rəsmi Kiyev Rusiya istehsalı olan “S-300” hava hücumundan müdafiə sistemlərini Donbas yaxınlığına cəmləşdirir. Donbasda hərbi havaçılıq və taktiki raket silahlarından bir neçə ildir istifadə olunmasına baxmayaraq Ukrayna ilk dəfə Donbas ətrafında “S-300” kompleksi yerləşdirib.

İddiaya görə, Ukrayna Silahlı Qüvvələri hava müdafiə sistemlərinin işlək olması məsələsində çətinlik çəkirlər. Raket azlığı ilə paralel olaraq sistemlərin çoxunun radar sistemi ya işləmir, ya da zamanında dağıdılıb.

Müşahidə qrupundan verilən məlumata görə, “S-300” kompleksi Donetsk “paytaxtından” 97 kilometr uzaqlıqda quraşdırılıb.

İndiyə qədər Donetsk bir neçə dəfə “Toçka OTRK” ilə silahlandırılıb.

Kiyevin narahatlığını daha çox artıran separatçıların nəzarətindəki iki ədəd “SU-25” qırıcısıdır. Buna da səbəb Donbas istiqamətində 100 minlərlə Ukrayna ordu personalının olmasıdır. Başqa sözlə, hava hücumu bu zaman ciddi itkilərə yol aça bilər.

Amma işin digər maraqlı tərəfi odur ki, ABŞ Ukraynaya hərbi dəstəyini davam etdirir. Yunan mətbuatı yazır ki, Vaşinqton Kiyevə dəstəyini birmənalı şəkildə həyata keçirir. Kiyevdəki ABŞ səfirliyinin məlumatına görə, Ukrayna Silahlı Qüvvələrinə göndərilən son partiya hərbi yük hava nəqliyyatı yolu ilə ünvanına çatdırılıb.

ABŞ qaynaqları bu dəfə göndərilən hərbi yardımların nəzarət və əlaqə sistemləri avadanlıqları olduğunu bildiriblər.

Qeyd edək ki, 2014-cü ildən bu yana ABŞ-ın Ukrayna ordusuna yardımı 2 milyard dollara çatıb. Vaşinqtonun son dövrlər Ukraynaya təkcə maliyyə istiqamətində deyil, hərbi avadanlıq və təchizat baxımından da dəstək verdiyi qeyd olunur.

Ukraynaya ABŞ yardımı sistemli olaraq gəmilər və nəqliyyat təyyarələri vasitəsilə çatdırılır. Həm də Ukraynaya enən belə hərbi nəqliyyat təyyarələrinin yarısı barədə mətbuatda məlumatlar verilmir.

Bundan başqa, Ukrayna Dnestryani bölgənin sərhədləri istiqamətində də hərbçilərini artırıb. Bu isə Rusiyanın narahatlığına səbəb olub. Rusiya mənbələri bu gün Ukraynanın bir neçə gün əvvəl rus hərbi personalına təhdid yarada biləcək sayda Dnestryani sərhədlərə əsgər göndərdiyini qeyd edib. Burada Ukraynanın 3-5 min civarında hərbçisinin olduğu ehtimal edilir.

Məlum olub ki, Moldova da Rusiyadan narazıdır və Moskvanın davranışlarını düzəltməsini istəyir. Moldova prezidenti Maria Santou Dnestryani bölgədən çıxmadıqları təqdirdə rus ordusuna qarşı gücdən istifadə ediləcəyini deyib.

Onu da qeyd edək ki, hazırda Dnestryani bölgədə Rusiyanın “sülhməramlı” adı altında 1412 nəfərlik ordusu var. NATO-nun Moldovaya bu istiqamətdə verdiyi dəstəyə paralel olaraq Rusiya da bölgədə imkanlarını artırır. Dnestryani bölgədə 150-160 minlik rus yaşayır və onları faktiki rus milis dəstələri müdafiə edir. Moldova isə bu qüvvəni qanunsuz sayır və Rusiya əsgərlərinin ərazidən çıxarılmasında israrlıdır.

Reyting.az

Ana səhifəyə dön