Ter-Petrosyan: “Ermənistanda güzəştə getməmək üçün dağıdıcı yol seçiblər”

“Ermənistan Azərbaycana uduzmadı, ancaq siyasi düşüncə infantilizmi səbəbindən bu məğlubiyyəti öz üzərinə götürdü”. Reyting.az xəbər verir ki, bu, Ermənistanın ilk prezidenti Levon Ter-Petrosyanın Ilur.am saytındakı məqaləsində qeyd edilib.

Məlumat üçün bildirək ki, sabiq prezidentin məqaləsində 2020-ci il müharibəsində erməni tərəfinin məğlubiyyətinin məsuliyyətinə toxunulur.

Son 20 ildə Ermənistanda ən ağıllı siyasətçilərdən sayılan Ter-Petrosyanın məqaləsində deyilir ki, müxalifətin əsas tezisi, son Qarabağ müharibəsindəki məğlubiyyət üçün əsas məsuliyyətli və günahkar şəxsin Nikol Paşinyan olmasıdır. Bu tezisin ən yaxşı formulası ötən il 3 dekabr tarixində “Vətəni Xilası Hərəkatı”nın bəyanatında verilib.

“Əgər həqiqətin yarısı olmasaydı və bəyanatı imzalayan güclər Nikol Paşinyanın onların zehni məhsulu olduğunu qəbul etsəydilər, belə bir qiymətləndirmə ilə tam razılaşmaq olardı”,- L. Ter-Petrosyan qeyd edib.

Ter-Petrosyana görə, 1997-ci ildən bu yana Ermənistanda, Erməni Milli Hərəkatı (ANM) istisna olmaqla, bütün tərəflər kompromis həll yolu üçün ən əlverişli fürsəti rədd edib və mövcud status-kvonun qorunub saxlanılması və güzəştə getməmək üçün dağıdıcı bir yol seçiblər: “Millətin sözdə elitası öz məsuliyyət hissəsini, yəni ziyalıların, politoloqların, analitiklərin, jurnalistlərin, alimlərin, universitet müəllimlərinin, diasporanın praktik olaraq bütün milli strukturlarındakı liderlərin böyük əksəriyyətini daşıyır”.

Erməni xalqına gəlincə, Ter-Petrosyan bildirib ki, xalq başına gələn fəlakətlərdə qətiyyən günahkar deyil: “Üstəlik, bu fəlakətin nəticələrinin birbaşa və yeganə daşıyıcısı məhz bu xalqdır. Sadəcə, xalqın qarşısında başınızı əyməlisiniz, onlar böyük fədakarlıqlar etdilər”.

Ter-Petrosyan yazır ki, hakimiyyət və siyasi dairələrin haqsız tənqidlərinə baxmayaraq, məğlubiyyətdə Ermənistan ordusu da günahkar deyil: “Hakimiyyətin cinayətkar siyasəti nəticəsində ordu sayına və müasir silahlarına görə dəfələrlə üstün olan bir düşmənlə döyüşməyə məcbur oldu. Və sona qədər borcunu fədakarlıqla yerinə yetirdi”.

Sabiq prezidentin fikrincə, yuxarıda göstərilənlər ondan ibarətdir ki, əslində, Azərbaycana məğlub olmayıblar, əksinə, siyasi düşüncə infantilizmi sayəsində bu məğlubiyyəti qəbul ediblər: “Bütün bunlar tarixdir, hər kəsin haqqı olduğu hər cür təfsirə imkan verir. Ancaq məsələ tarixdən hansı dərsləri götürməklə bağlıdır. Təəssüf ki, həm Ermənistanda, həm də diasporada müharibədən sonrakı ritorika yenə də xarici aləmdən dəstək, Azərbaycan və Türkiyəyə qarşı aramsız cəsarət və qeyri-ciddi intiqam gözləntiləri ilə doludur. Bu tendensiyanın seçki kampaniyası dövründə daha da güclənəcəyinə şübhə yoxdur. Bu da əslində dərs almaq baxımından heç bir ümid yaratmır. Bu, xalqımızın hələ də yeni itkilər və məyusluqlarla üzləşməsi deməkdir”.

Reyting.az

Ana səhifəyə dön