Deputat: “Şəhid ailələri və əlillərin probleminin həlli dövlət siyasətinin prioritet sahəsidir”

“Prezident İlham Əliyevin yürütdüyü siyasətin mərkəzində prioritet sahələrdən biri də hər zaman şəhid ailələrinə və müharibə əlillərinə dövlət qayğısıdır”.

Bunu Reyting.az-a Milli Məclisin Regional məsələlər komitəsinin üzvü, deputat Cavid Osmanov deyib.

Onun sözlərinə görə, istər Vətən müharibəsindən əvvəl, istərsə də sonra Azərbaycan Respublikası Prezidentinin dövlət qarşısında qoyduğu ən vacib istiqamətlərdən biri də şəhid ailələrinə, müharibə əlillərinə dövlət qayğısının tamamilə genişləndirilməsi kimi tapşırıqları görmüşük: “Biz bunu bütün platformalarda gördük. Bildiyimiz kimi, artıq şəhid ailələrinə bütün növ sosial ödənişlər təyin olunub. Bütün şəhid ailələrinin istər pensiya, istərsə də müavinətlərin təyin olunması istiqamətində proses başa çatıb. Eyni zamanda müharibə əlillərimizin, onların sağlamlığının bərpası, onlara əlillik dərəcəsinin verilməsi üçün bir çox vacib addımlar atılıb.

İstər ölkə daxilində, istərsə də xaricdən gətirilən həkim kontingenti, istərsə də bəzi xəstələrimizin müalicə olunması üçün xarici ölkələrə göndərilməsi istiqamətində bir sıra tədbirlər görülüb. Bununla yanaşı Azərbaycan prezidentinin sərəncamı ilə “YAŞAT” Fondu yaradılıb, fond vasitəsilə bir çox tədbirlər müəyyənləşib və həyata keçirilir. Şəhid ailələrinə böyük dəstək verilməsi, onları narahat edən problemlərin həlli, Qarabağ müharibəsi əlillərini narahat edən məsələlərin həlli istiqamətində vacib məsələlərin həyata keçirilməsi üçün ölkə prezidenti tərəfindən bir sıra vacib işlər görülür”.

C. Osmanov əlavə edib ki, Birinci vitse-prezident Mehriban Əliyevanın rəhbərlik etdiyi Heydər Əliyev Fondu şəhid ailələri və müharibə əlillərini narahat edən problemlərin həlli, əlillərin sağlamlığının qaytarılması, müalicəsi, ən müasir protezlərlə təmin olunması, onların mənzil-məişət şəraitnin yaxşılaşdırılması istiqamətində də işlər görülüb.

Deputat bildirib ki, prezident İlham Əliyev tərəfindən imzalanan Sərəncama əsasən, 2021-2025-ci illər ərzində bütün şəhid ailələri, o cümlədən, Qarabağ müharibəsi əlillərinin mənzil məişət şəraiti yaxşılaşdırılacaq və hamısı mənzillərlə təmin olunacaq:

“Sağlamlığını itirmiş qazilərimizin nəqliyyat vasitəsi ilə təmin olunması istiqamətində də vacib işlər görülür. Bununla yanaşı Azərbaycan prezidenti tərəfindən şəhid ailəsinin üzvləri, o cümlədən Vətən müharibəsi iştirakçılarının işlə təminatı məsələsi də dövlət orqanları qarşısında bir nömrəli vəzifə kimi müəyyənləşdirilib. Bu sahədə də ciddi addımlar atılmaqdadır. Eyni zamanda cənab prezidentin imzaladığı Fərmana uyğun olaraq şəhər və rayon icra hakimiyyətlərində bu təbəqədən olan insanların problemlərinin həlli üçün bir şöbə də yaradılıb. Bu şöbə onların birbaşa yerlərdə qaldırdığı məsələlərin operativ və dərhal həll olunmasında vacib rol oynayacaq. Bütün bunların fonunda digər tədbirlər də müəyyənləşərək həyata keçirilir.

Bir daha qeyd edirəm, Azərbaycan prezidenti məhz bu təbəqədən olan insanların problemlərinin həlli istiqamətini dövlət siyasətinin prioritet sahəsi kimi müəyyənləşdirib. Bütün dövlət orqanları qarşısında bu məsələni bir nömrəli vəzifə kimi qoyulub”.

C. Osmanov bəzən sosial şəbəkələr üzərindən müəyyən problemlər qaldırıldığını da bildirib. Qeyd edib ki, müharibənin bitməsi 6 aydır və bu sahədə cuzi boşluqlar ola bilər: “Amma bunlar bu sahədə görülmüş, Azərbaycan prezidenti tərəfindən həyata keçirilmiş nəhəng layihələrə kölgə sala bilməz. Digər tərəfdən, bilirik ki, bəzən çirkin siyasət aparmaq naminə məhz bu təbəqədən olan insanlar üzərindən spekulyasiya aparmağa cəhd edən qaragüruh qüvvələr də var. Əlbəttə ki, bu, xoşagəlməz haldır. Eyni zamanda bizim əldə etdiyimiz ən böyük sərvətimiz olan milli birliyimizə də böyük zərbə vurmağa çalışmaqdır. Amma bununla heç nəyə nail ola bilməyəcəklər. Çünki Azərbaycan prezidentinin apardığı siyasət uğurludur, bunu biz Vətən müharibəsindəki parlaq qələbəmizlə də ölçə bilərik, bu, Azərbaycanın dünya müstəvisində əhəmiyyətli yer tutmasından da xəbər verir, çünki Respublika Günü ərəfəsində dövlət başçısına ünvanlanan məktublarda da bunu gördük”.

Deputat sonda bir daha qeyd edib ki, şəhid ailələri və müharibə əlillərinin probleminin həlli dövlət siyasətinin prioritet sahəsidir.

Reyting.az

Ana səhifəyə dön