Siyasi şərhçi: “Çini çökdürməyi planlaşdırırlar”

“Dünyadakı geosiyasi durumun təhlili göstərir ki, ABŞ və Rusiya arasındakı qarşıdurmanın yaratdığı gərginlik SSRİ dönəmindəkindən daha pisdir. ABŞ və müttəfiqləri Rusiyanı özlərinə düşmən elan edib və xarici siyasətlərini bu istiqamətdə müəyyənləşdiriblər”.

Bu fikirləri Reyting.az-a açıqlamasında Strateji Planlaşdırma və Araşdırmalar İnstitutunun rəhbəri Azad Məsiyev ABŞ və Rusiya prezidentlərinin Cenevrədə planlaşdırılan görüşünü şərh edərkən deyib.

A. Məsiyev bildirib ki, ABŞ və müttəfiqləri Rusiyanı bir dövlət olaraq parçalayıb sərvətlərini ələ keçirməyi qarşılarına ali məqsəd kimi qoyublar: “ABŞ-ın bu niyyətini Rusiya gözəl anlayır və buna adekvat tədbirlər görməyə məcbur olur. Bu məqsədlə Rusiya Yaxın Şərqdə, Ukraynada, Belarusda, o cümlədən Cənubi Qafqazda öz maraqlarını qorumaq naminə radikal addımlar atmaq məcburiyyətində qalıb. Rusiyanın atdığı bu addımlar ABŞ-ın qeyd etdiyim bölgələrdə planlarını pozub. Belə olan təqdirdə ABŞ üçün iki yol qalır:

birincisi, ya Rusiyanın bu addımlarına qarşı radikal qərarlar verməli, yəni bu, hərbi münaqişə olsa belə, Rusiya ilə birbaşa konfliktə girməli,

ikincisi, ya da dialoq başlatmaqla maraqları uzlaşdırmalıdır”.

İnstitut rəhbəri əlavə edib ki, ABŞ, istər SSRİ dönəmində, istərsə də indi başqa dövlətləri əllərində alət edərək Rusiyaya təzyiqlər edib və bu siyasətini davam etdirir: “Əgər ABŞ və NATO dövlətləri Rusiya ilə açıq şəkildə hərbi münaqişəyə girərsə, bu, nəin ki ABŞ və Qərb üçün, hətta bəşəriyyət üçün böyük fəlakətlə nəticələnə bilər. Hesab edirəm ki, ABŞ bu yolu seçməyəcək”.

Siyasi şərhçinin sözlərinə görə, NATO-nun baş katibi Yens Stoltenberq CNN telekanalı vasitəsi ilə bəyan edib ki, Şimal Atlantika Alyansı rəsmi Moskvanı düşmən və ya rəqib hesab etmir. Onun fikrincə, NATO rəsmisinin belə açıqlama verməsi də təsadüfi deyil: “Rusiyanın hərbi qoşun birləşmələrinin Ukrayna sərhədləri yaxınlığınada döyüş vəziyyətinə gətirilməsi ABŞ və Qərbə bir mesaj idi ki, yerinizi bilin.

NATO-nun hərbi-siyasi fəaliyyəti, Rusiya sərhəddi yaxınlığında fəallaşması bu ölkəyə qarşı birbaşa təhdiddir və bu, təhlükəsizliyin bölünməzliyi prinsipini pozur. Belə davranış Rusiya tərəfindən qəbuledilməzdir.

Putin Baydenin onu qatil adlandırmasını unutmayıb. Bu məsuliyyətsiz ittiham heç bir siyasi etikaya, ABŞ kimi nüfuzlu dövlətin rəhbərinə yaraşmayan, məsuliyyətsiz bir iddia idi, bu açıqlamanın bilərəkdən verildiyini düşünürəm. Əsası olmayan açıqlama dövlətlərarası münasibətlərin daha da gərginləşməsinə hesablanmışdı. Bu bəyanatı verən Baydenin qısa bir zamanda Putinin əlini sıxması siyasi baxımdan onun zəyifliyi anlamına gəli, eyni zamanda mənəvi baxımdan qəbul edilməzdir”.

Baydenin Putinlə nəzərdə tutulmuş Avropa görüşünə gəlincə, A. Məsiyev əlavə edib ki, ABŞ-Rusiya münasibətləri, o cümlədən dünyanın geosiyasi vəziyyəti müzakirə predmeti olacaqdır: “Rusiya üçün Ukrayna, Cənubi Qafqaz xüsusi əhəmiyyət daşıdığı kimi, ABŞ üçün də Yaxın Şərq və Turkiyə xüsusi əhəmiyyət daşıyır. Rusya-Türkiyə münasibətlərinin ikitərəfli hərbi-siyasi maraqlarının uzlaşması, eyni zamanda ikitərəfli iqtisadi-siyasi anlaşmalar ABŞ-ı çox narahat edir. Bundan başqa, ABŞ və Rusiya dövlət başçılarının görüşü nəzərdə tutulduğu bir zamanda ABŞ və İngiltərə xüsusi xidmət orqanları COVİD-19 virusunun Çinin gizli laboratoriyalarında yaradıldığı barədə kəşfiyyat məlumatlarının rəsmi şəkildə mətbuatda dövriyyəyə buraxılması təsadüfi deyil. ABŞ və Qərb dövlətləri Çinin COVİD-19 virusunu bilərəkdən yaydığını bəyan ediblər. Bu məsələdən istifadə edib Çinə qarşı sanksiyalar tətbiq edib, bu ölkəni iqtisadi-siyasi baxımdan çökdürməyi planlaşdırırlar. Bir sözlə, ABŞ COVİD-19 virusundan siyasi məqsədlər üçün istifadə etmək niyyətindədir”.

Siyasi şərhçi düşünür ki, görüş zamanı ABŞ prezidenti Bayden rusiyalı həmkarı Putinlə dünyanı cənginə alan COVİD-19 virusu barədə də müzakirələr apara, bunun nəticəsi kimi Çinə qarşı birgə fəaliyyət göstərməyi xahiş edə bilər.

Ana səhifəyə dön