Şuşa Bəyannaməsinin imzalanması...

İbrahim Əliyev

Azərbaycan və Türkiyə respublikaları arasında bağlanmış Şuşa Bəyannaməsi bu iki qardaş ölkə arasında münasibətlərin səviyyəsini özündə təcəssüm etdirir. Bu iki ölkə həmişə bir-birinin yanında olub. Hətta bunun fiziki cəhətdən mümkün olmadığı dövrlərdə də, onlar, mənəvi tellərlə bir-biri ilə sıx bağlı olublar. Azərbaycanın öz müstəqilliyini bərpa etdiyi son dövrdə də bu yaxınlıq, bu birlik hər məsələdə, hər məqamda özünü büruzə verib.

Azərbaycanın müstəqilliyini tanıyan birinci dövlət Türkiyə olub. Onun çətin anlarında yanında olan da Türkiyədir. Ermənilər öz havadarlarının hərtərəfli dəstəyi sayəsində Azərbaycan ərazilərinin bir hissəsini işğal etdiyi zaman Türkiyə öz iqtisadi maraqlarının ziddinə olaraq təcavüzkar Ermənistana sərhədlərini bağlayıb.

Azərbaycanın müstəqillik tarixinin bütün anlarında Türkiyə Azərbaycana münasibətdə tutduğu mövqedən bir addım da geri çəkilməyib, öz maddi və mənəvi dəstəyini göstərib. Bunu düşmənlər də yaxşı bilir və bu faktla hesablaşmağa məcburdurlar.

Şuşa Bəyannaməsi Türkiyə-Azərbaycan münasibətlərində hərtərəfli əməkdaşlığa yeni imkanlar yaradır. Burada çox geniş sahələrdə əməkdaşlıq nəzərdə tutulur. Prezidentlərin çıxışlarında qeyd olunduğu kimi, başlıca məsələ müdafiə və işbirliyi sahəsində nəzərdə tutulan məqamlardır.

Şuşa Bəyannaməsinin imzalanması Azərbaycanın müstəqilliyinin bərpa edildiyi gündən bir dövlət kimi formalaşması, möhkəmlənməsi və dünyada özünü təsdiq etməsi istiqamətində dönməz irəliləyişin yeni mərhələsini təşkil edir və bu günə qədər onun apardığı ardıcıl, məqsədyönlü siyasi xəttin məntiqi nəticəsidir. Bu əldə edilən səviyyə bir günün, bir anın, bir məqamın nəticəsi deyildir. Bu gün Şuşa Bəyannaməsi ilə bir daha təsdiq edilən nəticə müstəqil Azərbaycan Respublikasının ictimai həyatının bütün sahələrində zərrə-zərrə əldə etdiyi, daim güclənən inkişafın təntənəsidir. O təkcə Qarabağ münaqişəsinin həlli, bu sahədə ədalətin bərpası ilə bağlı deyildir - baxmayaraq ki, bu amil bugünkü reallığın ən parlaq göstəricisidir. Əldə edilən səviyyə Azərbaycanın gərgin tarixi reallıqlar şəraitində dönmədən, bir an belə tərəddüd etmədən həyatın bütün sahələrində - milli dövlət quruculuğunda, ölkənin müstəqil iqtisadiyyatının qurulması və sosial ədalətin təsdiq edilməsində, hərbi quruculuqda, dünya iqtisadiyyatında oynadığı rolun güclənməsi və təsdiqində, beynəlxaq münasibətlər sistemində əldə etdiyi uğurlar onun dünya miqyasında möhkəm yerini, iradəsini təsdiq edir.

İbrahim ƏLİYEV

Azərbaycan Turizm və Menecment Universitetinin “İctimai fnlər” kafedrasının müdiri

Ana səhifəyə dön