İnstitut rəhbəri: “Paşinyan yenə anti-Rusiya siyasəti yeridərsə...”

“Bildiyiniz kimi, Paşinyan ABŞ tərəfindən inqilab yolu ilə Ermənistanda hakimiyyətə gətirilib. Məqsəd Ermənistanda anti-Rusiya əhval-ruhiyyəsi yaratmaq, erməni cəmiyyətində də ABŞ və qərbyönümlü fikir formalaşdırmaq idi. Bir sözlə, ABŞ Cənubi Qafqaz regionunda geosiyasi vəziyyətə tam nəzarət etmək, eyni zamanda bu bölgədə siyasi vəziyyətə diqtə etmək, Rusiya və İrana qarşı Ermənistan hakimiyyətindən və ərazisindən istifadə yararlanmaq planlaşdırılırdı. 44 günlük müharibənin nəticəsi ABŞ-ın region üçün nəzərdə tutduğu planlarını pozdu, 10 noyabr sazişi Ermənistanda siyasi böhran yaratdı və bu böhrandan çıxmaq, siyasi vəziyyəti sabitləşdirmək üçün Paşniyan növbədənkənar seçkiyə getmək qərarı verdi. Belə bir qərarın verilməsi erməni cəmiyyəti üçün düzgün addım idi”.

Bu fikirləri Ermənistandakı növbədənkənar seçkilərlə bağlı Reyting.az-ın sualına cavabında Strateji Planlaşdırma və Araşdırmalar İnstitutunun rəhbəri, siyasi şərhçi Azad Məsiyev deyib.

Azad Məsiyev bildirib ki, ABŞ hakimiyyətə gətirdiyi Paşinyanı hər vəchlə müdafiə etməli idi ki, o yenidən hakimiyyətə gəlsin və nəzərdə tutduğu planları həyata keçirsin: “Ermənistanda seçki prosesi zamanı - 20 iyun seçki günü baş verən qanun pozuntuları barədə kifayət qədər faktlar qeydə alınıb və bu seçkinin nəticəsini də erməni müxalifəti tanımır. Lakin bütün bunlara baxmayaraq, özünü demokratiyanın qarantı kimi tanıdan ABŞ və Qərb səsini çıxartmadı, seçkinin antidemokratik keçməsinə baxmayaraq, ABŞ və Qərb dövlətləri bütün qanunsuzluqlara göz yumur. ABŞ-ın və Qərbin bir marağı var: Paşinyan yenidən hakimiyyətə gəlsin. Beləliklə, demokratiya ABŞ və Qərb üçün ikinci plana keçdi”.

Siyasi şərhçi əlavə edib ki, 10 noyabr 2020-ci il tarixli məlum sənədə erməni tərəfindən imza atan Nikol Paşinyan olub, həmin sənədin müddəlarının həyata keçməsinə məsuliyyəti də o daşıyır: “Bu baxımdan Paşinyanla danışıq aparmaq bizim üçün daha məqbuldur. Əks təqdirdə, başqa radikal qüvvələr hakimiyyətə gəldiyi halda, sazişin (10 noyabr 2020-ci il tarixli) müddəlarını həyata keçirmək bir qədər çətin olardı. Bundan başqa, Paşinyanın yenidən hakimiyyətə gəlməsi erməni cəmiyyətini parçalayacaq, gərginliyi yenidən alovlandıracaq, bu isə dolayısı olaraq bizim maraqlarımıza uyğundur. Paşinyan hakimiyyəti ABŞ-ın iradəsi altında yenə də anti-Rusiya siyasəti yeridərsə, bu halda regionda Rusiya ilə Azərbacanın mövqeyi üst-üstə düşəcəkdir”.

Bu yaxınlarda Türkiyə prezidenti Rəcəb Tayyib Ərdoğanın bölgənin inkişafı və təhlükəsizliyi üçün təklif etdiyi 3+3 formatını yenidən gündəmə gətirməsinə də diqqət yönəldən A. Məsiyevin fikrincə, bu təklifin həyata keçməsi ABŞ-n bölgədə siyasi nüfuzunu zəiflədəcək, belə olan təqdirdə ABŞ hər vəchlə bu formatın həyata keçməsinə Paşinyanın əli ilə mane olmağa çalışacaq.

“Ermənistan-Azərbaycan münasibətləri Cənubi Qafqazdakı geosiyasi vəziyyətə bilavasitə təsir edən amillərdən biri idi, deyərdim ki, ən vacibi idi. Rusiya prezidenti Putinin Ermənistan-Azərbaycan müharibəsi zamanı atəşkəsin nail olmasında aktiv fəaliyyəti, onun təşəbbüsü, iradəsi ilə qısa zaman çərçivəsində atəşkəs barədə sənədin imzalanması və həyata keçirilməsi göstərir ki, Rusiya bölgədə söz sahibidir. 10 noyabr tarixli məlum sənəddə Rusiya prezidenti Vladimir Putinin imzası, Rusiya dövlətinin zəmanət verməsinə dəlalət edir. Paşinyan bu sənədə imza atmaqla sənədin icra olunmasında məsuliyyət daşıyır, əks təqdirdə Ermənistan istər Rusiya, istər Azərbaycan tərəfindən təzyiqlərlə üzləşəcəkdir”, - deyə siyasi şərhçi əlavə edib.

Ana səhifəyə dön