Ermənistan Azərbaycanı güc tətbiqinə təhrik edir

"Hadisələr zəncirvari formada davam edir. Əvvəlcə Ermənistan tərəfinin atəşkəsi pozması, Naxçıvanı, Şuşanı, Kəlbəcəri atəşə tutması ocağa benzin tökdü. Sonra Ermənistanın Baş naziri səlahiyyətlərini icra edən Nikol Paşinyan ilə Avropa İttifaqı Şurasının Prezidenti Şarl Mişel arasındakı danışıqlar, daha sonra Şarl Mişelin Azərbaycana səfər edərək prezident İlham Əliyevlə görüşməsi proseslərin planlı şəkildə getməyini göstərir".

Reyting.az xəbər verir ki, bunu siyasi ekspert Elman Vəliyev deyib. O bildirib ki, atəşkəsin pozulması Qərbə də sərf edir: "Bu səbəbdən Şarl Mişel bölgəyə səfər edərək tərəflər arasında münasibətləri nizamlamaq işini aparmaq üçün vasitəçi olmağa çalışır. İstəmirlər ki, bölgədən təcrid olunsunlar, təkcə Rusiya və digərləri yer alsın. Buna görə münaqişə tərəflərinin hər ikisi ilə dil tapmağa cəhd edirlər. Ya Azərbaycan, ya da Ermənistan - hansısa biri soyuq münasibət bəsləsə bu, Aİ üçün çətinlik yaradar. İstəyirlər ki, hər iki tərəf razı qalsın. Yəni “Avropa İttifaqı tərəfsiz olaraq sülhü bərqərar etməyə səy göstərir”,- təəssüratı yaratmağa çalışırlar. Onun üçün Ermənistana 2.6 milyard dollar yardım ayıracaq, bu yardım bir başa deyil, müəyyən nəzarət, hesabat əsasında olacaq".

Ekspert qeyd edib ki, N. Paşinyanın Qərbə meyl etməsi narahatlıq doğurub, xüsusilə də Fransa ilə yaxınlaşma Moskvada yaxşı qarşılanmır: "Rusiya tərəfi Paşinyanın bu hərəkətini münasibətləri korlamağa cəhd kimi dəyərləndirir”.

Siyasi ekspert əlavə edib ki, iyulun 20-də Azərbaycan prezidenti İlham Əliyevin rusiyalı həmkarı Vladimir Putinlə görüşü gözlənilir: “Prezident İlham Əliyevin sərt çıxışı və sonra Azərbaycan müdafiə naziri Zakir Həsənovun ehtimal olunan təxribatların qarşısının alınması üçün göstərişlər verməsi hadisələrin kulminasiya nöqtəsidir,- deyə bilərik. Moskva görüşündə 10 Noyabr, 11 Yanvar bəyanatları yenidən gözdən keçiriləcək. Rusiya Qərbin bölgədə üstünlük əldə etməyə çalışmasından narahatdır və tərəflər arasındakı gərginlikləri yatırmağı öz üzərinə götüməyə səy göstərir. Axı bu, Rusiyaya sərf eləmir. Bölgədə sülhün müdafiəçisi Rusiya hesab olunur. Qərb bu missiyanı öz üzərinə götürsə, Rusiyanın planları alt-üst ola bilər"

E. Vəliyev Zəngəzur dəhlizinin bu müzakirələrdə əsas yer alacağını ehtimal edir. O vurğulayıb ki, Zəngəzur Ermənistan ərazisi deyil, Azərbaycan torpağıdır: "Zəngəzurun qərbini vaxtı ilə qanunsuz formada Ermənistana veriblər. Ermənistan tərəfi KTMT-yə, Rusiyaya müraciət edəndə bildirdilər ki, hazırki ziddiyyətlər Qarabağda getmir, nə də ki, Ermənistan ərazilərinə hücum olmayıb. Bundan sonra Paşinyan Fransaya üz tutdu və bu da digər himayədarları narahat elədi.

Ermənistan verilən şansları düzgün dəyərləndirə bilmir. Azərbaycan tərəfini güc tətbiqinə təhrik edir. Moskva görüşündən sonra bölgədə irəliləyişlər görə bilərik. Yəni bu irəliləyişlər Azərbaycanın lehinə olacaq".

Reyting.az

Ana səhifəyə dön