Sabir Rüstəmxanlı: "Tahir Kərimli hər zaman öz orjinal fikri ilə seçilib"

Milli Məclisin növbədənkənar iclasında deputat Eldəniz Səlimovun toxunulmazlığının ləğviylə bağlı Baş prokurorun təqdimatının müzakirəsi zamanı qalmaqallı fikirlər səslənib.

Deputat Tahir Kərimli həmkarının müdafiəsinə qalxaraq onun toxunulmazlığının ləğvinin qanunsuz olduğunu deyib. Tahir Kərimli çıxış zamanı qalmaqala səbəb olan fikirlər də səsləndirib. O, Eldəniz Səlimova cinayət işi açılmasının da doğru olmadığını deyərək,

“Belə çıxır ki, polisin yiyəsi var, deputatın yiyəsi yoxdur” ifadəsini səsləndirib.

Tahir Kərimliyə cavab olaraq Milli Məclisin spikeri Sahibə Qafarova deyib ki, deputatın yiyəsi xalqdır:

“Sizin çıxışınız başadüşülən deyil. Bu, nə deməkdir ki, Milli Məclisin yiyəsi yoxdur? Milli Məclisin yiyəsi xalqdır. Mən sizi dəvət edəcəyəm otağıma, bir səs yazısına qulaq asarsınız, görərsiniz ki, kim kimi təhqir edib. Mən otaqdan çıxacağam, amma sizi o səs yazısına qulaq asmağa məcbur edəcəyəm”.

Parlament seçkilərlə, xalqın səsi ilə formalaşır. Bu baxımdan Sahibə Qafarova dedikləridə haqlıdır.

Vətəndaş Həmrəyliyi Partiyasının (VHP) sədri, deputat Sabir Rüstəmxanlı Cebhe.info-ya açıqlamasında deyib ki, Milli Məclis fərqli fikirlərin səsləndiriləcəyi məkandır:

“Məclisdə Tahir Kərimlinin sözünü bəyənən də var, ona qarşı olan da var. Hər kəs öz fikirini deyir. Tahir Kərimli hər zaman öz orjinal fikri ilə seçilib. O, sözünü cəsarətlə deyən bir deputatdır. Onun düşüncəsi elədir. Yəqin ona ağır gəlib ki, polisin şikayəti ilə millət vəkili öz toxunulmazlığını itirir. Orada başqa mübahisələr də var idi ki, millət vəkili vəzifəli şəxs hesab olunur, yoxsa yox. Milli Məclisdə bu cür mübahisələrə öyrəşmişik. Bunları çox təbii qəbul edirəm. Tahir Kərimli öz sözünü dedi, Sahibə Qafarova da cavab verdi ki, sən onun nə danışdıqlarından xəbərsizsən, onun səs yazıları var.

Səs yazısının olması da bir az ayrı şübhə yaradır ki, polis o görüşə hazır gəlib, yoxsa o səsi başqası yazıb. Bu işlərin içində olmadığım üçün detallar haqqında nəsə deyə bilmərəm. Amma ümumi olaraq Milli Məclisin iclası normal keçdi. Bir gün əvvəl isə İntizam komissiyası daha detallı araşdırma aparmışdı və təqtimad hazılamışdı. İntizam komissiyasının rəyi və Baş prokurorun təqdimatı səsə qoyulanda Milli Məclis yekdilliklə səs verdi. Ayrı-ayrı fikirlərin, rəylərin Milli Məclisin ümumi qərarına təsiri olmadı”.

Qeyd edək ki, Eldəniz Səlimov Xaçmazda qohumuna məxsus restoranda polis əməkdaşını döyərək onu təhqir etməkdə ittiham olunur. Baş Prokurorluğun təqdimatı ilə 3 avqustda Milli Məclisin növbədənkənar sessiyası çağrıldı və iclasda 98 deputatın səsi ilə Eldəniz Səlimovun toxunulmazlığı ləğv olunub. Artıq Eldəniz Səlimov saxlanılıb və onun haqqında 3 ay həbs qətiimkan tədbiri seçilib.

Ana səhifəyə dön