Qriqoryan: “Azərbaycan da Ermənistanın yollarından istifadə edə biləcək”

“Ərdoğanın açıqlamasında dəhlizin müzakirə olunan bir siyasi məsələ olduğu qeyd edilir. Dəhlizin məntiqini anlamaq lazımdır. Biz artıq qeyd etmişik ki, Ermənistan ərazisində suveren dəhliz ola bilməz. Bəlkə də Ermənistanda azərbaycanlıların və ya türklərin Azərbaycanla əlaqə saxlamaq üçün istifadə edə biləcəyi ərazidə dəhlizlər və ya yollar açılacaq. Bu seçim mümkündür, amma bu yollar Ermənistanın suveren ərazisinin nəzarətində olacaq”.

Reyting.az xəbər verir ki, bunu Ermənistanın Təhlükəsizlik Şurasının katibi Armen Qriqoryan ölkəsinin “İctimai Televiziya”sının efirində deyib.

Armen Qriqoryan əmindir ki, problemin həlli üçün dialoqa ehtiyac var: “Türkiyə prezidenti “dəhlizlər” ifadəsini işlətdi. “Dəhlizlər” deyəndə biz tək deyil, bir neçə yolu başa düşürük. Bu, məntiqimizə çox yaxındır. Və müzakirə, dialoq üçün bir fürsət olarsa, düşünürəm ki, həll yollarını tapacağıq. “Dəhlizlər” sözü ilə biz aşağıdakıları nəzərdə tuturuq: Ermənistanda bir neçə yolun istifadəsi”.

Qriqoryan qeyd edib ki, dəhliz məsələsi Baş nazir müavinləri səviyyəsində müzakirə edilmir, bütün yol infrastrukturunun blokdan çıxarılması məsələsi müzakirə olunur: “Bu nöqtədə biz daha çox mövcud infrastrukturdan, yəni İrəvan-Tbilisi-Bakı-Rusiya dəmir yolundan, eləcə də infrastruktura sərmayə qoymağa demək olar ki, ehtiyac olmayan İrəvan-Naxçıvan-Culfadan istifadə etməyə daha çox meylliyik. Ermənistan-Naxçıvan sərhədində kiçik bir kilometrlik hissə çəkilməlidir və bu, çox vaxt aparmır. Azərbaycan da Ermənistanın yollarından istifadə edə biləcək. Yəni Azərbaycanın qərb bölgələri Tavuş və ya Sünikin infrastrukturlarından istifadə edib, Naxçıvanla əlaqə saxlaya biləcək. Bu varianta meylliyik və irəliləməyə çalışmaq üçün bunu müzakirə edirik”.

Göründüyü kimi, Ermənistan tərəfi hələ də Zəngəzur dəhlizi məsələsini gündəmə gətirməkdən ehtiyat edir. Amma bununla yanaşı eyham vurur ki, Azərbaycan Ermənistanın yollarından istifadə edəcək. Üstəlik, əgər söhbət daha çox dəmiryollarından gedirsə, aydındır ki, İrəvan-Moskva dəmir yolu yalnız Zəngəzur dəhlizindən keçə bilər. Bununla aydın olur ki, danışıqlar prosesində İrəvan Zəngəzur dəhlizində dəmiryolu xəttinin istifadəsinə qarşı çıxmaq üçün ciddi arqumentlərə sahib deyil. Burada söhbət yalnız magistraldan gedə bilər ki, hazırda İrəvan, Qazax istiqamətindən Taviş-Sünik yolu vasitəsilə Naxçıvana gediş-gəlişə razı olduğunu nümayiş etdirir. Amma bu o demək deyil ki, Zəngəzur dəhlizində dəmir yolunun işə düşməsindən sonra şose yolu gündəmə gəlməyəcək və İrəvan buna razı olmayacaq.

Ana səhifəyə dön