Uyğurlara qarşı işgəncə dözülməz həddə çatıb

"Çində alternativ fikrə və tənqidə yer yoxdur. Tənqidçilər ya həbs olunur, ya “əmək düşərgələrinə” göndərilir, ya da ölkəni tərk etmək məcburiyyətində qalırlar".

Reyting.az xəbər verir ki, bunu politoloq Elxan Şahinoğlu deyib.

E. Şahinoğlu xatırladıb ki, Çində koronavirusa ilk yoluxanlar qeydə alınanda Pekin əvvəlcə bu xəstəliyi və fəsadlarını gizlətməyə çalışıb, ancaq xəstəliyin miqyası artdıqca, Pekin bu haqda xəbəri beynəlxalq aləmə yaymaq məcburiyyətində qalıb: "Ancaq artıq zaman əldən verilmişdi. Çünki səhiyyə üzrə ekspertlərin bir qismi ində də o fikirdədir ki, Pekin xəstəlik və onun miqyası barədə məlumatları zamanında beynəlxalq aləmlə bölüşsəydi, koronavirusun dünyaya yayılmasının qarşısını almaq olardı.

Misal üçün, Çindən sonra virus İran və İtaliyada sürətlə yayıldı. Bu necə baş verdi? İranın Qum şəhərində yaşayan iş adamı Çindən qayıtdıqda virusa yoluxmasından xəbərsiz idi. O, bu virusu bilmədən əvvəlcə yaşadığı şəhərə, sonra isə bütöv ölkəyə yaydı. Elə Cənubi Qafqaz ölkələrinə də virusun böyük hissəsi İrandan yayıldı. İranda virusa yoluxanların və ölənlərin sayı hələ də azalmır.

İtaliyada da oxşar vəziyyət yarandı. İtaliyanın bir sıra tikiş fabriklərində çinlilər çalışırdı. Onların bir qismi Çindən tətildən qayıtdıqda virusla İtaliyaya daxil oldular və virus bir anda İtaliyanı bürüdü, oradan da Avropaya yayıldı. İtaliyada ilk aylarda hər gün ölənlərin sayı yüzlərlə idi. Yəni əgər Çin xəstəliyin təhlükəsi və miqyası barədə əvvəlcədən məlumat versəydi, nə iranlı iş adamı Çinə gedər və virusu İrana yayar, nə də İtaliya çinli işçilərin ölkəyə girişinə icazə verərdi".

Politoloq qeyd edib ki, Pekinin uyğur siyasəti də eynidir:

"Çinin hakimiyyət strukturları uyğurlar problemləri olmadığını iddia edir. Ancaq soruşanda ki, “bəs onda uyğurlar niyə zorla əmək düşərgələrində saxlanılır?",- cavab eynidir: “Uyğurlar özləri əmək düşərgələrində çalışmaq istəyirlər”.

Heç bir insan zorla düşərgədə, özü də pulsuz çalışmaq istəməz. Bunun yalan olduğunu hamı bilir. Buna baxmayaraq, Pekin “əmək düşərgələri” siyasətindən imtina etmir. Vəziyyət o dərəcə dözülməz həddə çatıb ki, hətta uyğurlara əziyyət verənlərin bir qismi də daxilən əzab çəkməyə başlayıblar.

Çin polisinin yüksək rütbəli zabiti Avropa ölkələrindən birində sığınacaq taparaq “əmək düşərgələrində” əsl vəziyyət barədə dünyaya car çəkib. ABŞ-ın məşhur CNN televiziya kanalı həmin zabitdən müsahibə alıb. Zabit deyib ki, Çinin hakimiyyət strukturları məlumat toplamaq məqsədilə həbsdə olan uyğurlara işgəncə verirlər:

“Uyğurlara qarşı işgəncədə elektrikdən istifadə edirlər, qrup şəklində bir-birlərini zorlamaya məcbur edilirlər.

Bizə əmr verilirdi ki, uyğurları bir-birinə bağlayaraq onların bədənlərindən elektrik keçirək. Bundan başqa, uyğurları ayaqlarından asırdıq, başlarını suya salırdıq, dəmir zəncirlərlə döyürdük. Bunun nəticəsində uyğurlar ərzaq qəbul edə bilmir, yuxu hisslərini itirirdilər”.

Politoloq əlavə edib ki, uyğurlara verilən işgəncə barədə keçmiş illərdə də məlumatlar var idi: “Ancaq bu dəfə faktları işgəncəni bilavasitə həyata keçirən zabit açıqlayıb. Çinin hakimiyyət strukturları əllərində onu bayraq ediblər ki, uyğurlar içərisində radikallar var və onlar terrora meyllidirlər. Əlbəttə, uyğurlar arasında terrora meyllilər var, ancaq onlar böyük bir xalqı təmsil etmirlər. “Əmək düşərgələrində” çürüdülənlərin terrorçularla əlaqəsi yoxdur, onların günahı sadəcə uyğur olmalarında və haqlarını tələb etmələrindədir".

Ana səhifəyə dön