Fərid Şəfiyev: “Delimitasiya və demarkasiyanın 1920-ci ilin xəritələri əsasında aparılacağına inanmıram”

Noyabrın 9-da Moskvada Azərbaycanla Ermənistan arasında 2 yeni sənədin imzalanacağı gözlənilir. Reyting.az xəbər verir ki, bir sıra ekspertlər bunu sülh müqaviləsi kimi dəyərləndirirlər.

Ehtimallara görə, yekun sənəddə tərəflər bir-birinin ərazi bütövlüyünü tanıyacaq, sərhədlərlə bağlı mübahisə, Sovet xəritələrinə əsasən öz həllini tapacaq.

Erməni mətbuatı isə yazır ki, delimitasiya və demarkasiya işləri, 1920-ci ilin xəritələrinə əsasən aparılacaq.

Qeyd edək ki, əgər bu məsələ həqiqətə uyğundursa, onda Ermənistan tərəfi Qərbi Zəngəzurla yanaşı, Göyçə gölünün şərq sahillərindəki torpaqları və Tavuş bölgəsini Azərbaycana təhvil verməlidir.

Xatırladaq ki, 1920-ci ilin sonlarında həmin ərazilər, Sovet hakimiyyətinin təkidi ilə Azərbaycan SSR-dən alınaraq, Ermənistan SSR-nin tərkibinə daxil edilib.

Mövzu ilə bağlı “Yeni Sabah”a açıqlamasında Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev qeyd edib ki, Azərbaycan bundan öncə də açıqlayıb ki, Ermənistanla sülh müqaviləsi imzalamaqda maraqlıdır:

“Bu istiqamətdə müəyyən bir irəliləyiş var, amma sülh sazişi məhz 9 noyabrda imzalanacaq, yoxsa başqa bir tarixdə, bu haqda heç bir şey deyə bilmərəm.

O ki qaldı kommunikasiyaların açılması, bununla bağlı cari ilin 11 yanvarında sənəd imzalanıb. Bundan irəli gələn də bir sıra məsələlər var.

Təəssüflər olsun ki, bir ara – seçkilər ərəfəsində ermənilər faktiki olaraq bundan imtina etmişdilər. İndi isə bu məsələyə qayıdıblar. Ermənistanın Baş naziri Nikol Paşinyan, MDB dövlətlərinin virtual sammitində də təsdiqləmişdi ki, bu istiqamətdə işləməyə hazırdır”.

Fərid Şəfiyev erməni mətbuatında dərc olunan, sərhədlərin 1920-ci il xəritələrinə əsasən təyin edilməsi məsələsinə də toxunub.

O, istifadə ediləcək xəritələrin 1920-ci ilə aid olacağı məsələsi haqqında danışarkən deyib ki, bu, həqiqətə uyğun deyil: “Bir sıra xəritələr var, amma iş daha çox 60-70-ci illərin, əsasən də 1975-ci ilin xəritəsi əsasında aparıla bilər. Amma hansı xəritələr əsas götürüləcək, hələ ki, bu məsələ üzərində danışıqlar gedir”.

F. Şəfiyev delimitasiya və demarkasiya işlərinin 1920-ci ilin xəritələri əsasında aparılacağına inanmır: “Ona görə ki, Ermənistanda çox xəbərlər yayılır. Burada söhbət ondan gedir ki, Nikol Paşinyanın mövqeyi ilə razılaşmayan radikallar, əsasən də Ermənistan cəmiyyətində yer alan siyasi partiyalar, revanşistlər var və ona qarşı müəyyən bir fəaliyyət aparırlar. Hesab edirəm ki, onlar Paşinyana qarşı bu məlumatı, yəni 1920-ci il xəritələri məsələsini atıblar ortaya. Biz də bilirik ki, bu, real bir şey deyil”.

Ana səhifəyə dön