Deputat: “Pezidentin Qarabağa tez-tez səfər etməsi böyük qayıdışı sürətləndirir”

“Azərbaycan 44 günlük Vətən müharibəsində öz tarixinin ən parlaq qələbəsini qazanaraq həm ədaləti, həm ərazi bötüvlüyünü bərpa etdi. Eyni zamanda regiona yeni reallıqlar gətirdi”.

Bunu Reyting.az-a deputat Cavid Osmanov deyib. O bildirib ki, Azərbaycan Vətən müharibəsi bitəndən dərhal sonra bütün sahələrdə yeni mərhələyə qədəm qoyub:

“Yeni mərhələ ölkəmizin yaratdığı reallığa uyğundur. İşğaldan azad olunmuş ərazilər erməni vandalları tərəfindən 30 il işğal dövründə tamamilə darmadağın edilib, viran qoyulub. Şəhər və kəndlərdə infrastruktur, ekologiya tamamilə məhv olmuşdu. Müzəffər Ali Baş Komandan İlham Əliyevin rəhbərliyi ilə burada başladılan böyük yenidənqurma işləri ölkəmizin gücünün və qüdrətinin göstəricisidir. Burada infrastruktur layihələri həyata keçirilir, bunlar xüsusən də işğaldan azad edilmiş ərazilərimizin bir-birinə bağlanmasını həyata keçirdir. Ümumilikdə böyük nəqliyyat, logistika mərkəzi yaradılır. Əlbəttə ki, burada Zəngəzur dəhlizinin vacibliyini qeyd etməliyik. Zəngəzur dəhlizi siyasi, mənəvi, iqtisadi və təhlükəsizlik baxımından çox vacibdir. Birincisi, Naxçıvanla Azərbaycanın əsas hissəsinin birləşməsi, dəhliz məhz Azərbaycanın tarixi Zəngəzur üzərindən keçiriləcək. Eyni zamanda böyük mənada Türk dünyasını birləşdirən tarixi koridor olacaq. Digər tərəfdən, bu dəhlizi uzaq Çindən Avropaya qədər bir çox dövlətlər dəstəkləyir. Koridorun açılışını birmənalı olaraq gözləyirlər. Çünki yük daşımalarının həyata keçirilməsində, o cümlədən daha əlverişli logistika xəttinə çevrilməsində bir çox dövlətlər böyük maraq göstərirlər”.

Deputat qeyd edib ki, Füzuli Beynəlxalq Hava Limanının cəmi 8 ayda tikilməsi də bir çox mənada - siyasi, təhlükəsizlik və regionun inkişafı baxımından çox əlverişlidir:

“Bu hava limanının tikintisi vacib məsələ idi və ölkə prezidentinin rəhbərliyi ilə qısa müddətdə tikildi. Cənab prezident İlham Əliyev və Birinci vitse-prezident Mehriban Əliyeva işğaldan azad olunmuş ərazilərə sıx şəkildə səfərlər edirlər. Bu səfərlər böyük qayıdışa hazırlıq mərhələsini sürətləndirir. Yenidənqurma və bərpa işlərində də görürük ki, ən müasir, yüksək standartlara uyğun işlər görülür. Burada "ağıllı kənd" layihələrini qeyd edə bilərik. Salınacaq bütün şəhərlərin baş planları onu göstərir ki, Azərbaycan güclü qüdrətli dövlət olmaqla yanaşı, həm də müasir ölkədir. Gələcəyə istiqamətlənən böyük tədbirlər görülür. Bu ərazilər turizm sektorunun inkişafı üçün çox yararlı məkandır. Burada aqrar sektorun inkişafına yararlı ərazilərimiz var. Bu işlər başa çatdıqdan sonra əhalinin məşğulluğu, həyat şəraitinin yüksək səviyyədə qurulmasına heç kimin şübhəsi yoxdur. Burada olan dağ-mədən ehtiyatı, o cümlədən turizm potensialı, aqrar, istehsal sektorunun qurulması ölkəmizin gücünə güc qatacaq. Bu da ölkəmizin inkişafına, həmçinin ölkəmiz inkişaf etdikcə əhalinin sosial rifahına çox müsbət təsir edəcək”.

Ana səhifəyə dön