Deputat: “Bunlar İlham Əliyevin əleyhinə hətta quldurla da əməkdaşlığa hazırdırlar”

“Cənab İlham Əliyevin Müzəffər Ali Baş Komandanlığı ilə Böyük Zəfərimizdən bir il ötür. Bu bir il, Zəfərin nəticələrinin qorunması baxımdan çox vacib bir dönəm idi və Azərbaycan bu mərhələni uğurla adladı. Heç şübhəsiz, kökündə həmrəyliyimiz dayanan bu qələbənin bir memarı var - o da cənab İlham Əliyevdir. Cənab İlham Əliyevin bu qətiyyəti milli səviyyəyə sığacaq məsələ deyil, bu zəfər beynəlxlaq hüququn aliliyini təmin etdi, bütövlükdə bölgənin taleyini dəyişdi. Heç şübhəsiz ki, bizi bu qələbəyə şəhidlərin qanı, qazilərin sağlamlığı, döyüşən oğullarımızın qorxmazlığı apardı. Biz onlara, o cümlədən onların fədakar valideynlərinə nə qədər minnətdar olsaq, azdır”.

Reyting.az xəbər verir ki, bunu Milli Məclisdə çıxışı zamanı deputat Bəhruz Məhərrəmov deyib.

Onun sözlərinə görə, zəfərimizin əldə edilməsində müstəsna rolu olanlardan biri də Birinci vitse-prezident Mehriban xanım Əliyevadır və Qələbə Günü ərəfəsində bu adı çəkməmək ədalətsizlik olardı: “Müharibə dövründə arxa cəbhənin yükü faktiki olaraq onun çiyinlərində oldu, evinə şəhid tabutu gələn ailənin fəryadına yerli strukturlardan daha tez Mehriban xanımın nümayəndələri yetişdi. Mehriban xanım hər bir şəhid anasının fasciəsini onunla birgə yaşadı. O, hər bir qazi üçün ümid yeri oldu, onların müalicələri üçün bütün imkanları səfərbər etdi.

Müharibə dövründə Ermənistan və havadarlarının feyk xəbər strategiyası məhz Mehriban xanımın başlatdığı təşkilatlanma sayəsində darmadağın edildi. Bütün təhlükələri gözə alaraq o, cənab prezidentlə birgə işğaldan azad olunmuş əraziləri qarış-qarış gəzdi, vandalizmə və mədəni terrora məruz qalmış milli-mədəni və dini abidlələrimizin öz əvvəlki simasının bərpası istiqamətində köklü işlər gördü. “Xarı Bülbül” Festivalı və Vaqif poeziya günlərini ən yüksək səviyyədə təşkil edərək düşmənin mənən sındırılması məhz Mehriban xanımın adı ilə bağlıdır. Ən vacibi isə o, bütün bunları cənab İlham Əliyevin rəhbərliyi altında, vahid siyasi xəttin ayrılmaz parçası kimi yerinə yetirdi. Bu mənada hesab edirəm ki, Vətən müharibəsində və post-müharibə dövründə Mehriban xanımın müstəsna xidmətlərinin nəzərə alınması, onun ali səviyyədə təltif edilməsi barədə parlamentin təşəbbüs göstərməsi vacibdir”.

Deputat daha bir məsələyə diqqət çəkib:

“Oktyabrın 25-də Qubadlıda cənab prezidentin rayon ictimaiyyətinin nümayəndələri ilə görüşündə həmkarımız, dəyərli ziyalı Tahir Mirkişili çox maraqlı bir fikir işlətdi. Dedi ki, cənab prezident, bu müharibə bir ildir dayansa da, siz hələ də döyüşürsünüz və hadisələr göstərir ki, biz sizin rəhbərliyinizlə hələ çox döyüşməli olacağıq. Onun bu sözü reallığı çox dəqiq ifadə etmiş bir fikirdir. Bəli, bu gün biz mübarizədəyik, amma artıq qalib tərəf kimi, proseslərin gedişi göstərir ki, üstünlük bizim tərəfimizdədir. Xüsusən də son bir neçə ayda yaşananlar göstərdi ki, biz uğurla bütün xarici təsirləri ram edirik, bundan sonra da edəcəyik. Amma o güclərin daxildəki uzantıları ipə-sapa yatmaq istəmir. Təsəvvür edin, İranla münasibət gərginləşir, irançı olurlar, Rusiya ilə münasibətlər sərinləşir, ruspərəst olurlar, Türkiyə-Azərbaycan münasibətləri ən ali səviyyəyə çatır, bunlar dönüb olur Türkiyə müxalifətçisi. Yəni, nə olur-olsun, kim olur-olsun, bunlar İlham Əliyev əleyhinə birləşməyə hazırdırlar. Fərqi yoxdur birləşəcəkləri kimdir – bu, düşmən də ola bilər, quldur da, terrorçu da, qatı cinayətkar da. Əsas odur Azərbaycan hakimiyyətinə qarşı əks mövqedə olsunlar. Özü də hansı hakimiyyətə! 30 illik işğala son qoyub milli qürurumuzu bərpa edən, tariximizin ən taleyüklü problemini həll edib bizi hərbi-siyasi gücə çevirən bir iqtidara, bir liderə.

Bilirsiz, bu cür olmur, ən azından 28 illik müxalifət təcrübəsi onlara iqtidar və dövlət arasında fərqi başa salmalı idi. Əlbəttə, bu gün bu məzmunda danışmağı arzu etməzdim, amma reallığın ifşasından doğan zərurəti də nəzərə almaq lazımdır.

Hörmətli sədr, mən çıxışımın sonunda parlamentin rolunu xüsusi qeyd edib, sizə xüsusi təşəkkürümü bildiriəm. İstər müharibə, istər post-münaqişə dövründə parlament diplomatiyası məhz sizin rəhbərliyinizlə müstəsna çevikliyi və məhsuldarlığı ilə fərqləndi. Hər kəs şahiddir ki, həmkarlarımızın, başda siz və müavinləriniz olmaqla, gecəsi-gündüzü olmadı və bu mənada qazi parlament adının qürurunu yaşamaq bizə nəsib oldu.

Bir daha bayramımız mübarək!”.

Ana səhifəyə dön