Partiya sədri ilə baş redaktor saxlanılıb

Əli Əliyev

Vətəndaş və İnkişaf Partiyasının (VİP) sədri Əli Əliyev və “Bumeranq” TV-nin baş redaktoru Elçin Rəhimzadə bir qrup qara maskalı şəxs tərəfindən saxlanılıblar.

Reyting.az xəbər verir ki, bu barədə məlumatı "Xural" qəzetinin baş redaktoru Əvəz Zeynallı Əli Əliyevin yaxınlarına istinadla Feysbuk səhifəsində yazıb.

Musavat.com isə hazırda VİP sədri və "Bumeranq" TV-nin rəhbərinin bir məsələ ilə bağlı ifadə verdiklərini, yaxın saatlarda sərbəst buraxılacaqları barədə məlumat yayıb.

Qeyd olunub ki, irəliləyən saatlarda VİP sədri Əli Əliyev və Elçin Rəhimzadə özləri məlumat yayacaqlar. Adları çəkilən şəxslərin sadəcə, ifadə üçün dəvət edildiyi vurğulanıb.

İstintaq orqanından bildiriblər ki, adları çəkilən şəxsləri sadəcə, ifadə üçün dəvət ediblər. Prosesdə heç bir qara maskalı olmayıb.

***

Son məlumata görə, VİP sədri Əli Əliyev sərbəst buraxılıb. Sərbəst buraxılan VİP sədri Əli Əliyev Musavat.com-un əməkdaşına deyib ki, onunla eyni zamanda saxlanılan “Bumeranq” TV-nin rəhbəri Elçin Rəhimzadənin də sərbəst buraxılacağını gözləyir. O, E. Rəhimzadə ilə bərabər bu dindirmə ilə bağlı açıqlama verəcəklərini bildirib: “Bir müddət sonra geniş açıqlamamız olacaq”.

***

VİP sədri Əli Əliyev və “Bumeranq” TV-nin rəhbəri Elçin Rəhimzadə sərbəst buraxılandan sonra internet televiziyaları vasitəsilə baş verənlər barədə brifinq keçiriblər.

Ə. Əliyev öncə bildirib ki, E. Rəhimzadə səhər tezdən evdən çıxanda bir insident müşahidə etdiyi üçün bu barədə ona zəng edib. Onlar daha sonra bununla bağlı məsləhətləşmək üçün VİP-in qərargahına gəlməyə razılaşıblar: “Biz qərargaha günorta saat 12-də daxil olduq. Özlərini DTX əməkdaşları kimi təqdim edən şəxslər gəlmişdilər. Mən onlarla bir yerdə getdim. Burda baş verənlərdən xəbərim olmadı. Saat 12:30-da orda idim. Ölkə miqyasında aparılan bir cinayət işi var. Onun təfərrüatları ilə bağlı sorğu-sual idi. Nə iş olması ilə bağlı deyə bilmərəm. Yəqin ki, ictimailəşəcək. “Bumeranq” TV-də yayımlanan bir neçə videogörüntü haqqında söhbət getdi. Araşdırma başladılıb. Onun detalları soruşulub. Mən şahid qismində dindirilmişəm. Elçin bəy də burda fəaliyyət göstərir. Mən də nəyi bildiyimi açıq şəkildə dedim”.

Ə. Əliyev deyib ki, onu qara maskalıları aparmayıb. Mülki geyimli şəxslər onu istintaqa dəvət edib və həm yolda, həm də DTX binasında da ona sayğılı münasibət göstərilib: “Özləri də deyiblər ki, sizi ziyalı kimi qəbul edirik. Dəvət olunmağımın səbəbi kimi aparılan cinayət işinin təfərrüatını öyrənmək olduğunu dedilər. Heç bir zorakılıq olmayıb. Hətta yolda mənə dərman lazım olub-olmamasını soruşdular, mədəni davrandılar. Orda olanda da yarım litrlik su alıblar. Dövlət orqanıdır, cinayət işi var. Cinayət işinin təfərrüatları ilə bağlı istintaq aparılır, bizi də dəvət ediblər”.

E. Rəhimzadə də açıqlamasında bildirib ki, ona sözügedən videolarla bağlı suallar verilib: “Məndən soruşuldu ki, o videoların mənbəyi hardandır? Hansı videoların olması ilə bağlı indi sizə hansısa açıqlama verə bilmərəm. Amma onu deyim ki, miqyaslı işdir. Orda bizdən xahiş olundu ki, bir müddətlik bu barədə danışmayın. Sonra bu barədə məlumat verərsiz... Əli bəylə bizi ayrı-ayrı aparıblar.

Məni 4 saat burda saxladılar, axtarış etdilər. Evimdə də axtarış aparıldı. Heç bir zorakılıq olmadı mənə qarşı. Sadəcə, izah edildi ki, sizi şahid qismində çağırmışıq ki, bu heyətlə nə əlaqəniz var”.

Ə. Əliyev brifinq zamanı jurnalistlərin “siyasi fəaliyyətinizlə bağlı sizə hansısa eyham oldumu?” sualını da cavablandırıb:

“Siyasi fəaliyətimlə bağlı hər hansı eyham olmadı. Amma nəsə ola bilər. Mən şahidəm, cinayət işi var. Konkret sual verib, cavab alıblar. Gələcəkdə görəcəyik ki, bu, gerçəkdən cinayət işi ilə bağlıdır, ya konkret mənim siyasi fəaliyyətimlə bağlıdır. Mən bundan əvvəl də prokurorluğa çağırılmışdım. Görünür, hökumət məni dişinə vurur (gülür). Narahat olmayın, siyasətçi həbsə də düşəcək, təzyiqə də məruz qalacaq. Biz ölkəni rifahlı etmək üçün çalışırıq. Dövlət orqanlarında işləyənlər də normal, kifayət qədər məlumatlı insanlardır”.(Musavat.com)