Avropa İttifaqı Rusiyanı hədələyir: Ukraynaya hücumun çox ağır bədəli olacaq

“Əgər Ukraynaya hərbi hücum olarsa, buna güclü cavab veriləcək. Bu hücumu edən çox ağır bədəl ödəyəcək”.

Reyting.az xəbər verir ki, Rusiyaya bu xəbərdarlığı Avropa İttifaqı Şurasının Prezidenti Şarl Mişel edib.

Belçikanın paytaxtı Brüsseldə Avropa Birliyinin (AB) mərkəzi qərargahında Azərbaycan, Gürcüstan, Moldova, Ukrayna və Ermənistan liderlərinin iştirakı ilə keçirilən sammitdən sonra Ş. Mişel deyib ki, bu sammit qanunun aliliyi, idarəetmə, fundamental hüquqlar və demokratik dəyərlər əsasında çağırılıb: “Bu sammit islahat proseslərinə dəstək olmaq, xüsusən rəqəmsal gündəm və rəqəmsallaşma ilə bağlı insanların gözləntilərinə cavab vermək niyyətinin bəyannaməsi idi. Gənclərin investisiya paketi ilə dəstəklənməsini, həmçinin təhlükəsizlik məsələsini də müzakirə etdik”.

Rusiyanın Ukrayna sərhəddində hərbi güc toplamasının da müzakirə edildiyini bildirən Mişel diqqətə çatdırıb ki, Ukraynanın ərazi bütövlüyünü tələb etmək imkanları yaranıb:

“Biz NATO, G7, ABŞ, Böyük Britaniya, Aİ və Şərq Tərəfdaşlığı ölkələri olaraq Rusiyanın təhdidlərinə qarşı birlikdəyik. Ukraynaya hücum olarsa, buna çox sərt cavab veriləcək və bu hücumun səbəbkarı çox ağır bədəl ödəyəcək”.

Mətbuat konfransında AB Komissiyasının sədri Ursula von der Leyen Belarus mövzusunda danışıb. Komissiya sədri deyib ki, bu gün keçirilən iclasda Belarusu boş masa təmsil edib: “Çünki Belarusun başında xalqı repressiyaya məruz qoyan, qaçqınlardan istifadə edən, Aİ-nin dəyərlərinə və sərhədlərinə hücum edən bir administrasiya var. Biz Aİ və Şərq tərəfdaşlığı üzvləri ilə birlikdə bunu pisləyirik. Ümid edirik ki, Belarus nümayəndəsi tezliklə bu boş yerə əyləşəcək”.

Ursula von der Leyen həmçinin bildirib ki, sammitdə əməkdaşlıq məsələləri, xüsusilə pandemiya ilə mübarizə müzakirə olunub: “Aİ olaraq bu ölkələrə 13 milyon doza vaksin ayırmışıq. Bundan əlavə, bu ölkələrə dəstək məqsədilə Polşa İnvestisiya Bankı ilə 35 milyon avro dəyərində dəstək müqaviləsi imzalanıb. Bu yolla region ölkələrinin xalqlarına pandemiyaya qarşı dəstək verəcəyik”.

Komissiya sədri Rusiya ilə gərginliyə də toxunub: “Aİ Komissiyası olaraq mümkün hücumlar halında mövcud sanksiyaları genişləndirmək üçün Şuradan icazə almışıq. Mümkün vəziyyətdə hansı sanksiyaların tətbiqi üzərində işləyirik”.

Onu da qeyd edək ki, Aİ Şərq Tərəfdaşlığı ölkələrinə təqdim olunacaq 17 milyard avroya qədər dövlət və özəl sərmayəni səfərbər etmək, onlara iş, artım və rifah gətirmək potensialı ilə qrantlar və zəmanətlərdən ibarət 2,3 milyard avroluq İqtisadi və İnvestisiya Planını da həyata keçirəcək.

Ana səhifəyə dön