Deputat: “Ya cənab prezidentə müraciət edək, ya da Milli Məclisin…”

“Azərbaycan Respublikasında Ekologiya və Təbii Sərvətlər Nazirliyinin yaradılması çox müsbət, mütərəqqi bir qərar idi. Bu nazirlik yaradılandan sonra ölkəmizdə çoxsaylı milli park və dövlət təbiət qoruqları yaradılıb. Hazırda 10 milli park, 14 dövlət təbiət qoruğu var. Mən vaxtilə də bu məsələni qaldırmışdım. Çox təəssüf ki, nə bu təbiət qoruqlarının, nə də milli parkların hüquqi rejiminə dair Azərbaycan Respublikasında qanun yoxdur”.

Reyting.az xəbər verir ki, bu sözləri Milli Məclisin plenar iclasında Bütöv Azərbaycan Xalq Cəbhəsi Partiyasının (BAXCP) sədri, Milli Məclisin hüquq siyasəti və dövlət quruculuğu komitəsinin sədr müavini Qüdrət Həsənquliyev deyib.

Q. Həsənquliyev təklif edib ki, bu məsələ ilə bağlı addım atılmalıdır: “Ya hökumətə müraciət etməliyik ki, bir layihə göndərsin, ya da özümüz belə bir qanun qəbul etməliyik. Bundan başqa, hazırda Azərbaycanda dövlət hakimiyyətində, dövlət idarəetmə orqanlarında nəsillərin əvəzlənməsi prosesi gedir və bu normaldır. Amma bu, heç də bəzən bütün sahələrdə mütərəqqi və hamar formada özünü biruzə vermir. Bizə göndərilən qanun layihələrində ciddi çatışmazlıqların olduğunu görürük. Mən bunu da təbii qarşılayram. Bu, mümkün və qəbulolunandır. Belə halların qarşısını almaq üçün keçmiş sovet məkanında, məsələn, Rusiyada Nazirlər Kabineti yanında qanunvericiliklə əlaqəli hüquq institutu var. Ukraynada qanunvericilik institutu Radanın, Qazaxıstanda isə Ədliyyə Nazirliyi yanındadır. Bizdə Ədliyyə Nazirliyi yanında qanunvericilk baş idarəsi var. Onun əsasnaməsində qeyd olunur ki, bu baş idarənin əsas vəzifəsi mövcud qanunların yeni qəbul olunmuş qanunlara uyğunluğunu təmin etmək, bu istiqamətdə təkliflər vermək, qanunlara edilən əlavə və düzəlişlər barədə rəylər təqdim etməkdir. Amma biz görürük ki, əksər hallarda heç baş idarənin də rəyləri nəzərə alınmır. Ona görə, mən səmimi olaraq söyləyirəm, Milli Məclisin bundan öncəki sədrləri də çalışıblar ki, imkan daxilində ölkəmiz üçün mələrsə eləsinlər. Sizin də Milli Məclisin imicinin dəyişilməsi baxımından, apardığınız diplomatik iş, xarici səfərlər, daxildə aparılan islahatlar göstərir ki, dövlətimiz, ölkəmiz üçün bacardığınz səviyyədə əsl fədakarlıq edirsiniz. Amma bu institutun yaradılmasına nail olsaq, bu, sizin adınızla qalar. Hesab edirəm ki, ya cənab prezidentə müraciət edək, ya Milli Məclisin nəzdində belə bir institut yarada, ya da Ədliyyə Nazirliyinin baş idarəsini instituta çevirə bilərik. Nazirlər Kabineti və yaxud Prezident yanında da belə bir institut yaratmaq mümkündür”.

Q. Həsənquliyev qeyd edib ki, belə bir institutun yaradılmasına son dərəcə ciddi ehtiyac var və bununla bir çox problemləri həll etmək olar.

Ana səhifəyə dön