Ceyhun Bayramov iranlı nazirlə mətbuat konfransında: "İran bu layihədən töhfə alan ölkələrdən biri olacaq"

“İran ilə Azərbaycan arasındakı münasibətlərin əsasını dərin tarixi köklər təşkil edir".

Reyting.az xəbər verir ki, bunu Azərbaycanın xarici işlər naziri Ceyhun Bayramov bu gün İranın xarici işlər naziri Hüseyn Əmir Abdullahianla birgə keçirdiyi mətbuat konfransında deyib: “Son aylar ərzində biz beynəlxalq tədbirlərdə 3 dəfə görüşmüşük. Bu görüşlərin əsas məğzi ölkələrimiz arasındakı münasibətlərin irəli aparılmasından ibarətdir".

C. Bayramov bildiirb ki, Azərbaycan müstəqillik qazandıqdan sonra ölkələr arasında bir sıra sənədlər imzalanıb: "2021-ci ilin 10 ayı ərzində qarşılıqlı ticarət dövriyyəsində 23,6 faiz artım olub”.

Ceyhun Bayramovun sözlərinə görə, artıq son bir neçə ay ərzində müsbət məqam ondan ibarətdir ki, İranla bir sıra yeni layihələrlə bağlı razılıq əldə edilib: “Yeni layihələrin icrası ilə bağlı yol xəritəsi hazırlanır. Hesab edirəm ki, yaxın vaxtlarda təsdiq ediləcək”.

Reyting.az-ın məlumatına görə, nazir vurğulayıb ki, Azərbaycan və Türkiyə liderlərinin təşəbbüsü ilə yaradılan "3+3" platformasını ilk dəstəkləyən ölkələrdən biri də İran olub: “Artıq 10 dekabr tarixində xarici işlər nazirlərinin müavinləri çərçivəsində ilk görüş keçirilib. Bu region üçün olduqca əhəmiyyətli bir platformadır”.

Nazirin sözlərinə görə, Zəngəzur dəhlizinin işə salınması nəinki Azərbaycan və Ermənistan, o cümlədən digər region ölkələri üçün də yeni imkanlar yaradır: “Hesab edirik ki, İran bu layihədən töhfə alan ölkələrdən biri olacaq. İranın dövlət və özəl şirkətləri azad edilmiş ərazilərin bərpası ilə bağlı layihələrdə yaxından iştirakına dair marağını ifadə edib. Onlar tərəfindən müraciətlər daxil olub. Hazırda həmin təkliflərin dəyərləndirilməsi həyata keçirilir. Hesab edirəm ki, onlardan birinin yaxın həftələrdə icrasına başlanılması planlaşdırılır”.

Ceyhun Bayramov qeyd edib ki, İran və Azərbaycan arasında əlaqələr sərhədlərin toxunulmazlığı və ərazi bütövlüyü prinsipi əsasında qurulub: “Həm Ermənistanın Azərbaycan ərazilərini işğal altında saxladığı dövrdə, həm də 44 günlük Vətən müharibəsi dövründə İran Azərbaycanın ərazi bütövlüyünü dəstəkləyib. İran Vətən müharbəsində də Azərbaycanın tarixi qələbəsini dəstəkləyib və Azərbaycan bunu yüksək qiymətləndirir. Ermənistanın Azərbaycan ərazilərini işğal etməsi regional təhlükəsizliyə təhdid yaradırdısa, Azərbaycanın öz ərazilərini işğaldan azad etməsi region üçün yeni inkişaf və iqtisadi artım imkanları yaradıb".

Nazir deyib ki, işğaldan azad edilən ərazilərin minalardan təmizlənməsi ilə bağlı İran ilə Azərbaycan arasında danışıqlar aparılır: "Bu gün keçirilən görüşdə də bu məsələ müzakirə olunub: “Razılıq əldə olunub ki, ANAMA İranın müvafiq qurumları ilə ərazilərin minalardan təmizlənməsi ilə bağlı fikir mübadiləsi aparsın”.

İranlı nazir isə deyib ki, İran Azərbaycanı ən yaxşı qonşularından və dostlarından biri hesab edir: “İqtisadi Əməkdaşlıq Təşkilatının iclası çərçivəsində Azərbaycan və İran prezidentlərinin görüşü zamanı liderlər bir-birilərinə dəstəklərini ifadə etdilər”.

Hüseyn Əmir Abdullahian bildirib ki, iqtisadi imkanlarıı daha da inkişaf etdirmək üçün razılıq əldə olunub: “Biz iki ölkə arasındakı münasibətləri daha da gücləndirmək üçün bütün fikirləri, ideyları həyata keçirməyə çalışacağıq. Hərbi və siyasi sahədə də əməkdaşlığlımızı davam etdirəcəyik. Bir sözlə, Azərbaycanla İran arasında önəmli razılıqlar əldə olunub”.

Onun sözlərinə görə, müxtəlif ideyalar irəli sürülüb və əlaqələrin inkişafı sürətlə davam edəcək: "Azərbaycanı öz ərazilərini işğaldan azad etməsi münasibəti ilə təbrik edirəm. İranın yeni hökumətinin prioriteti Azərbaycanla əlaqələri maksimum səviyyədə inkişaf etdirməkdir”.

Nazir qeyd edib ki, yeni hökumət İran, Azərbaycan, Türkiyə və Rusiya arasında dördtərəfli əlaqələrin inkişaf etdirilməsini istəyir: "Bundan başqa, 3+3 formatı çərçivəsində görüşlər təşkil edilir. Region ölkələri öz problemlərini həll edlə bilərlər. Hər hansı regiondan xaric ölkənin müdaxiləsinə ehtiyac yoxdur. Lazım deyil ki, biz regiondan kənar ölkələrdən istəyək ki, bizim taleyimizi həll etsin, problemlərimizi çözsünlər. Onların bizim regionda hər hansı yeri ola bilməz. Region ölkələrinin problemi həll etmək üçün lazımı qədər iradələri var”

Reyting.az

Ana səhifəyə dön