Yeni komando briqadasının Hadrutda yaradılması xüsusi məna kəsb edir

“24 dekabr 2021-ci ildə ölkə başçısı cənab İlham Əliyev işğaldan azad edilmiş Hadrut qəsəbəsi və Şuşa şəhərinə səfər etdi. Bu səfər çərçivəsində diqqəti çəkən bir sıra nüanslar olsa da, fikrimcə, ən vacib nüanslardan biri də ölkə başçısı və Silahlı Qüvvələrin Ali Baş Komandanı İlham Əliyevin Xocavənd rayonunun Hadrut qəsəbəsində Komando hərbi birliyinin açılışını etməsi, yeni yaradılmış birliyin hərbi andını qəbul etdikdən sonra orada söylədiyi nitqdir”.

Reyting.az xəbər verir ki, bunu siyasi ekspert Samir Hümbətov deyib.

Onun sözlərinə görə, Azərbaycan prezidenti həmin tədbirdə çıxış edərkən bildirib ki, müharibədən sonra yeni müasir silah-sursatlar alınır, eyni zamanda yeni silahlı birləşmələr yaradılır:

“Bugün Hadrutda bu hərbi hissədə yeni hərbi birləşmənin nümayəndələri - Komando qüvvələri yerləşir. Komando briqadasının yaradılması bizim üçün yenilikdir. Bir yox, iki yox, bir çox Komando briqadaları artıq Azərbaycanda yaradılır və bu briqadalar istənilən hərbi vəzifəni icra etməyə qadir olacaqlar. Yüksək təlim keçmiş, yüksək iradə nümayiş etdirmiş və vətən uğrunda özlərini fəda etməyə hazır olan övladlarımız bu briqadalarda xidmət edəcəklər. Bu bizim ordu gücümüzü böyük dərəcədə artıracaq. Belə briqadalar çox olacaq, minlərlə hərbçimiz bu briqadalarda xidmət edəcək və beləliklə, Azərbaycan Ordusu bundan sonra da öz peşəkarlığını və öz yüksək mənəvi ruhunu qoruyacaq".

Siyasi ekspert əlavə edib ki, ölkə başçısının bu çıxışına və yeni yaradılan hərbi hissəyə diqqət etdikdə bir neçə məsələni daha yaxşı anlamaq mümkündür:

“Ölkə başçısı qeyd etdi ki, belə briqadaların sayı bir yox, iki yox, daha çox olacaq. Bu isə o deməkdir ki, Azərbaycan yeni və müasir silahlar almaqla yanaşı, həm də ordunun peşəkarlığını artırmaqla dünyanın inkişaf etmiş ordularının ön sıralarında olmağa çalışır.

Digər tərəfdən, yeni yaradılan hərbi hissənin yerləşdiyi məkan bir sıra cəhətləri baxımından çox vacib əhəmiyyətə malikdir. Buranın həm dağlıq və meşəlik regionda yerləşməsi, həm təbii coğrafi şərait, həm ermənilərin Hadruta iddialarının hələ də davam etməsi, həm də rus "sülhməramlıları" və erməni terrorçu dəstələrinin tör-töküntülərindən qısa məsafədə yerləşməsi, bu komandoların qardaş Türkiyə hərbi sisteminə uyğun olaraq təşkil edilməsi çox önəmlidir. Görünən odur ki, Azərbaycan prezidenti İlham Əliyevin əsas hədəfi yeni peşəkar ordu birliklərini yaratmaqla Azərbaycan Ordusunu qardaş Türkiyə Silahlı Qüvvələrinin kiçik modelinə çevirmək istəyir. Bu isə Azərbaycan üçün olduqca önəmlidir. Ona görə ki, Azərbaycanın xarici təhlükəsizliyinin əsas təminatçısı peşəkar ordumuzun olmasıdır ki, bunun üçün də kifayət qədər çalışmalar davam edir”.

S. Hümbətovun fikrincə, yeni komando briqadasının Hadrutda yaradılmasının xüsusi mesajları var: “Bu mesajların birincisi Ermənistana verildi. Yəni gözünüzü Hadrutdan və Qarabağdan çəkin. İkincisi burada maraqlı olan güclərə verildi. Yəni, Azərbaycan torpaq məsələsində heç kimə güzəştə getmir. İstənilən an öz ərazilərimizi istənilən gücdən qorumağa qadirik.

Hesab edirəm ki, bundan sonra nə ermənilər, nə də ona açıq və gizli şəkildə dəstək verən qüvvələr Azərbaycana qarşı təcavüzkarlıq niyyəti ilə yanaşa bilməyəcəklər”.

Ana səhifəyə dön