QAT qurultay hazırlıqlarına başlayıb

Qarabağ Azdlıq Təşkilatı (QAT) Ali Məclisinin növbəti iclası keçirilib. İclasda Ali Məclis üzvlərindən 25 nəfər əyani şəkildə, 17 nəfər videokonfrans formatında iştirak edib.

QAT-ın mətbuat xidmətindən Reyting.az-a verilən məlumata görə, iclas dövlət himninin oxunması və Şəhidlərin xatirəsinin yad edilməsi ilə başlayıb.

QAT-ın yaradıcılarından olan görkəmli şair, ictimai xadim Famil Mehdinin doğum günü olduğu qeyd edilib, xatirəsi yad edilib.

Ali Məclisin son iclasından sonra vəfat etmiş QAT Ağsaqqallar Şurasının üzvləri Nizami Hacıyev, Qurban Aslanov və Mehdi Nağıyevin xatirələri yad edilib, ruhlarına dualar oxunub.

Əvvəlcə təşkilati məsələlərə baxılıb, QAT Balakən və Ağdam şöbələrinin yeni seçilmiş sədrləri İkinci Qarabağ müharibəsi Qazisi Şəmsəddin Emçiyev və ictimai xadim, teatr aktyoru Xəyalə Xudadatovanın Ali Məclisə üzvlükləri təsdiqlənib, Birinci və İkinci Qarabağ müharibəsi Qazisi Rəhim Məmmədov, Qarabağ Qazisi Haşim İsgəndərli, tanınmış teatr və kino aktyoru Şirzad Pirallahi, ictimai xadim Eyvaz Emçiyev, tanınmış yazar, ictimai xadim Fəzli Mir, Fərhad Məmmədov Ali Məclisə sərbəst üzv seçiliblər.

QAT sədri Akif Nağı Ali Məclisin oktyabr ayında keçirilən iclasdan sonra görülən işlər və qərarların icrası ilə bağlı məlumat verib, sonra Qarabağ ətrafında hazırkı vəziyyət və təşkilatın vəzifələrinə dair məruzə ilə çıxış edib. Məruzə ətrafında Barat İmani, Murad İsmayılov (QAT Laçın şöbəsinin sədri), Rafiq Quliyev, Babək Sadıqov (Tərtər), Nəriman Mirzəli (Kəlbəcər), Fərhad Məmmədov, Sahib Musayev, Elxan Rəhimov (Şəki), Fəzli Mir, Rəhim Məmmədov, Nəriman Pirəliyev (Quba), Tağı Kazımov, Məhəmmədəli Quliyev (Sumqayıt), Xəyalə Xudadatova (Ağdam), Əminə Cabbarova, Hacı Hacıağa Nuri, Hacı Əkbər Rüstəmov, Şahmar İbrahimov və digərləri çıxış edib, təklif və fikirlərini bildiriblər.

Məruzə və çıxışların əsasında qərar qəbul edilib, Qarabağın tam azad olunması, tam qələbənin əldə olunması üçün cəmiyyətin, o cümlədən QAT-ın dəstəyi, fəal iştirakı ilə dövlət tərəfindən aşağıdakı işlərin görülməsi təklif edilib:

1. Bütün danışıqlarda, çıxışlarda, müzakirələrdə “Xankəndi məsələsi”, yəni Xankəndi, Xocalı, Ağdərə və digər yaxın ərazilərdə Azərbaycan hakimiyyətinin bərpa olunması tələbi əsas məsələ kimi qoyulmalıdır.

2. Rusiya sülhməramlılarının bölgədən 5 ildən daha tez, yaxın 2 il ərzində çıxarılması təmin edilməlidir.

3. ATƏT Minsk qrupu həmsədrlərinin fəaliyyətinin hər hansı formada bərpasına imkan verilməməlidir.

4. Azərbaycanla Ermənistan arasında sərhədlərin delimitasiya və demarkasiyası, həmçinin sülh müqaviləsinin hazırlanması üçün Azərbaycan, Ermənistan, Türkiyə və Rusiya tərəfindən 1921-ci ildə imzalanmış Qars müqaviləsi əsas hüquqi baza olaraq götürülməlidir.

5. Qarabağla bağlı bütün proseslərdə Türkiyənin Rusiya ilə bərabərhüquqlu şəkildə iştirakı təmin edilməlidir.

İclas iştirakçıları QAT-ın növbəti - VI qurultayının keçirilməsinə dair məsələni müzakirə edib, qurultayın 2022-ci ilin iyun ayında keçirilməsi ilə bağlı qərar qəbul olunub, qurultayın keçirilməsinə hazırlıq üçün Təşkilat Komitəsi yaradılıb, qurultaya nümayəndələrin seçilməsi üçün rayon, şəhər təşkilatlarında konfransların keçirilməsinə start verilib.

İclasdan sonra QAT Ağsaqqallar Şurasının üzvü, Qarabağ Qazisi, Şəhid atası Hacı Əkbər Rüstəmovun “Vətən Kitabı”nın imza mərasimi keçirilib.