Ədalət Abdinov: “Ruslarla ukraynalılar arasında nifaq salanlar...”

“Rusiya-Ukrayna hərbi münaqişəsi zəhmətkeşlərin vətənpərvərlik ruhunda aktiv beyin yuyulması ilə müşayiət olunur. Ona görə də ən əvvəl burjua vətənpərvərlik ideologiyasının mahiyyətinin nədən ibarət olduğunu bilməliyik”.

Reyting.az xəbər verir ki, bunu Azərbaycan Kommunist Partiyası Mərkəzi Komitəsinin katibi Ədalət Abdinov bəyan edib.

Onun sözlərinə görə, milli dövlətlər və milli bazarlar formalaşdıqca, istismarçı siniflər muzdlu işçi kütlələrini bəzi kapitalistlərin mülkiyyətini digər kapitalistlərin təcavüzündən müdafiəyə sövq edəcək bir ideologiya icad ediblər: “Vətənpərvərlik belə bir ideologiyaya çevrilib. Burjuaziya insanların öz yaşayış yerinə bağlılığından, kollektivizmdən, eyni ərazidə yaşayan insanların dil və mədəni birliyindən istifadə etdərək və bu əsasda yeni, mürtəce ideologiya yaradıb. İndi muzdlu işçilərə təlqin olunur ki, onlar öz istismarçıları ilə birlikdə ən yaxşı “millətə” mənsubdurlar, onları əsarət altına almaq istəyən digər “millətlərdən” qorunmalıdırlar. Üstəlik, öz “millətinin” mənafeyinin müdafiəsi mütləq milli sərhədlərlə məhdudlaşmır. Öz “millətinin” mənafeyi, əgər “özünün” burjuaziyasının iştahı tələb edərsə, bu hüdudlardan çox-çox kənara çıxa bilər.

Bir “millət”in nümayəndələrinin yaşadığı yer “vətən” elan edilib. Və bütün muzdlu işçilərə uşaqlıqdan aşılanıb ki, “Vətən”i sevmək, lazım gələrsə, onun uğrunda vuruşmaq, ölmək lazımdır. Bəs onu hansı formada, harada, necə və nə üçün “qorumaq” lazımdır – bunu dövlət, yəni məhz bu burjuaziyanın aparatı göstərəcək. Əsas odur ki, “vətən”ə ən iri kapitalistlər onların muzdlu siyasətçiləri vasitəsilə rəhbərlik edirlər. Axı “vətən” guya fövqəlmilli bir şeydir. Burjuaziyanın fikrincə, muzdlu işşilər bu barədə dəqiq düşünməsələr daha yaxşıdır. Deyirlər, özünüzdə “vətən sevgisi” yetişdirin, bu kifayətdir. Amma dövlətin vasitəçiliyi olmadan “vətəni müdafiə etmək” olmaz. Yalnız dövlət deyəndə, gedin müdafiəyə.

Təəssüflər olsun ki, bu günə qədər dünyada milyonlarla işçi bu hiylə ilə idarə olunur və burjua çəkişmələrinə xidmət edirlər. Burjuaziyanın hiyləgər ideologiyasına aldanmış işçi sinifin digər “millətlərdən” olan işçi sinifin nümayəndələrini öldürməsi adi hala çevrilib. Onun burjua mahiyyətini dərk etmədən işçi sinifi bu saxta ideologiyanı bölüşür və kapitalistlərə itaətkar bir sürü formalaşdırır, onun vəhşiliklərini fəal şəkildə dəstəkləyir.

“Özlərinin” burjuaziyasının əlində oyuncaq olmamaq üçün hər bir işçi bunu başa düşməlidir:

Birincisi, insanlar obyektiv olaraq “millətlərə” deyil, siniflərə bölünür. "Millətlər" yalnız zəif təfəkkürlü sakinlərin şüurunda mövcuddur. Burada hər hansı bir “millətin” muzdlu işçisinin maraqları ilə hər hansı “millətin” sahibkarının maraqları obyektiv şəkildə ziddiyyət təşkil edir, çünki ikincisi birincinin quldurluğu hesabına yaşayır. Və məsələn, bir rus muzdlu işçinin ukraynalı muzdlu işçi ilə bölüşəcək heç bir şeyi yoxdur. Onların dil fərqliliyinə və ya yaşamalı olduqları burjua dövlətlərinin bayraqlarının fərqliliyinə görə maraqların heç bir ziddiyyəti yaranmır. Bir burjua dövlətinin ordusu digər burjua dövlətinə qarşı müharibəyə getsə belə, bu ölkələrin muzdlu işçiləri arasında heç bir obyektiv ziddiyyət yaranmır. Ona görə də başa düşmək lazımdır ki, indi ruslarla ukraynalılar arasında nifaq salan hər kəs muzdlu işçilərin düşmənidir və müstəsna olaraq kapitalist sinfinin maraqlarını təmsil edir.

İkincisi, dövlətdən ayrı mövcud olan heç bir “vətən” yoxdur və ola da bilməz. “Yer və göy” kimi başa düşülən vətənin qorunmağa ehtiyacı yoxdur. Lakin burjuaziyaya yeni bazarlar ələ keçirmək və ya öz bazarını başqa kapitalistlərin təcavüzündən qorumaq üçün “yem” lazımdır. Kapitalist hökmranlığı şəraitində oliqarxların maraqlarını qorumadan “vətəni müdafiə etmək” mümkün deyil.

Bu o deməkdirmi ki, kommunistlər vətənə sevgini inkar edirlər? Xeyr, biz bu anlayışın saxta, burjua yozumunu rədd edirik. Vətən xalq kimi, vətənə məhəbbət isə öz xalqına məhəbbət kimi başa düşülməlidir. Amma istənilən insanların böyük əksəriyyəti muzdlu işçilərdir. Ona görə də insan öz xalqının əksəriyyətinə yaxşılıq arzulamadan vətənini sevə bilməz. Və bu çoxluğun faydası o vaxta qədər mümkün deyil ki, o, mütləq azlıq üçün zənginləşmə mənbəyi rolunu oynayır. Yəni, vətəni parazit-sahibkarlar sinfinin diktaturasının məhv edilməsi, fəhlə sinfi diktaturasının qurulması və kommunizm quruculuğu uğrunda mübarizədən başqa cür sevmək qeyri mümkündür.

Üçüncüsü, milli dövlətin, yəni “özünün” burjuaziyasının dövlətinin muzdlu işçi üçün heç bir dəyəri yoxdur. İşçinin onu müdafiə etməsinin mənası yoxdur. İstənilən burjua dövləti, mütləq əksəriyyətin öz işçi qüvvəsini bu azlığın müəyyən etdiyi qiymətə (əmək haqqı) azlığa satmaq məcburiyyətində qaldığı vəziyyəti zorla qoruyub saxlayaraq, öz əsarətinə almaq üçün alətdir. Buna görə də muzdlu işçi, təbii ki, “öz” burjuaziyasını itirməkdən heç nə itirmir. Onun işçi qüvvəsinin dəyərini, yəni əmək haqqının ölçüsünü yenə də əmək bazarındakı vəziyyətə uyğun olaraq kapitalist müəyyən edəcəkdir”.

Qeyd edək ki, son günlər Ədalət Abdinov Rusiyanın Ukraynada keçirdiyi hərbi əməliyyatları müdafiə etməklə seçilir və buna görə, sosial şəbəkələrdə ciddi şəkildə dışlanır. Baş kommunist bu yazısını da əslində Ukraynada baş verən əməliyyatlar kontekstində yazıb.

Ana səhifəyə dön