Ukrayna ilə Rusiya atəşkəsə və üçüncü görüşə razılaşıblar: "Humanitar dəhliz yaradılacaq"

Belarusda Ukrayna və Rusiya arasında danışıqların ikinci mərhələsi başa çatıb.

Reyting.az NTV-yə istinadla xəbər verir ki, 2.5 saat sürən müzakirədən sonra tərəflər 3-cü görüşə də razılaşıblar.

Ukrayna tərəfi bildirib ki, istədiklər tələblərə müsbət rəy ala bilməsələr də, mülki əhalinin atəş altından çıxarılması və digər insani yardımlar üçün humanitar dəhlizə razılıq əldə olunub: “Ukrayna və Rusiya nümayəndə heyətləri müvəqqəti atəşkəsə dair razılığa gəliblər. Eyni zamanda, danışıqların üçüncü mərhələsi yaxın günlərdə baş tutacaq”.

Ukrayna Prezident Ofisinin rəhbərinin müşaviri Mixail Podolyak isə bildirib ki, tərəflər əsaəsn humanitar vəziyyəti müzakirə ediblər: “Vətəndaşların evakuasiyası, ərzaq və dərmanların çatdırılması üçün humanitar dəhlizlərin təmin edilməsinə dair razılığa gəlinib”.

Rusiya tərəfi də əhalinin təxliyəsi üçün müvəqqəti atəşkəs və humanitar dəhlizlə bağlı razılaşmanı təsdiqləyib.

***

Belarusda Ukrayna və Rusiya arasında danışıqların ikinci mərhələsi başlayıb.

Reyting.az xəbər verir ki, bu barədə Prezident Aparatı rəhbərinin müşaviri Mixail Podolyak "Tvitter"də yazıb.

O bildirib ki, gündəmdə olan mövzular dərhal atəşkəs, barışıq, dağıdılmış və ya daim atəşə tutulan kənd və şəhərlərdən mülki əhalinin çıxarılması üçün humanitar dəhlizlərin açılmasıdır.

***

Ukrayna və Rusiya nümayəndə heyətləri arasında keçiriləcək görüşün gündəliyi açıqlanıb.

Reyting.az xəbər verir ki, bu barədə danışıqların iştirakçısı, Ukrayna Ali Radasının deputatı David Araxamiya feysbukda yazıb.

O bildirib ki, 2 saat sonra görüşə başlayacaqlar: "Minimum proqramımız humanitar dəhlizlərdir. Daha sonra isə vəziyyətə uyğun hərəkət edəcəyik”.

***

“Rusiya danışıqlara hazırdır, amma Ukraynadakı hərbi əməliyyatı davam etdirmək niyyətindədir”.

Reyting.az xəbər verir ki, Ukrayna ilə bugünkü görüş barədə danışan Rusiyanın xarici işlər naziri Sergey Lavrov hazırda hərbi əməliyyatın davam etdiyini bildirib: "Əməliyyatın məqsədləri dəqiq müəyyən edilib. Bunlar Ukraynanın demilitarizasiyası, denasifikasiyası və Ukraynanın NATO-ya qoşulmayacağı ilə bağlı zəmanətin verilməsidir.

Biz danışıqlar aparmağa hazırıq. Ukraynalı həmkarlarımıza bizim mövqeyimiz bəllidir. Bizə söz veriblər ki, danışıqların növbəti mərhələsində öz mövqelərini təqdim edəcəklər. Biz danışmağa hazırıq, amma əməliyyatımızı davam etdirəcəyik, çünki Ukrayna ərazisində Rusiyanın təhlükəsizliyinə təhdid törədən infrastrukturun qalmasına imkan verə bilmərik”.

***

Ukrayna və Rusiyanın nümayəndə heyətləri arasında danışıqlar bu gün yerli vaxtla saat 15:00-da baş tutacaq.

BelTA xəbər verir ki, bu barədə Rusiya Prezidentinin köməkçisi Vladimir Medinski məlumat verib.

Onun sözlərinə görə, görüşün başqa günə ertələnməsi barədə xəbərlər həqiqətə uyğun deyil. V.Medinski danışıqların Brest vilayətində keçiriləcəyini və Ukrayna heyətinin artıq Polşadan Belarusa doğru yola düşdüyünü vurğulayıb.

Rusiyanın xarici işlər naziri Sergey Lavrov isə deyib ki, Ukraynanın gələcəyi ilə bağlı məsələni orada yaşayan insanlar həll etməlidirlər: “Biz Ukraynada həlak olanların ailələrinə və yaxınlarına başsağlığı veririk. Moskva dinc əhalinin ölümü ilə nəticələnən heç bir müharibəyə bəraət qazandırmır. İstənilən insan həyatı əhəmiyyətlidir. Lakin təəssüf ki, hərbi əməliyyatlarda qurbanlar olur”.

***

“Rusiya Belarusda Ukrayna ilə keçiriləcək danışıqların perspektivini görür”.

TASS xəbər verir ki, bunu Rusiya xarici işlər nazirinin müavini Sergey Ryabkov jurnalistlərə açıqlamasında deyib.

O, həmçinin Qərbin Kiyevi silahlandırdığını bildirib: “Ukraynada xüsusi əməliyyatlar tam şəkildə davam edir. Bir sıra ölkələrin buna reaksiyası ilə misli görünməmiş iqtisadi, siyasi və informasiya hücumları ilə müşayiət olunur”.

***

"Ukrayna nümayəndə heyəti Rusiya tərəfi ilə danışıqlara göndərilib, görüş martın 3-də gözlənilir".

TASS xəbər verir ki, bunu Rusiya prezidentinin köməkçisi, Rusiya nümayəndə heyətinin rəhbəri Vladimir Medinski Ukrayna ilə danışıqların ikinci raundu başlamazdan əvvəl jurnalistlərə deyib: "Ukrayna nümayəndə heyəti artıq Kiyevi tərk edib və yoldadır. Biz sabah onları gözləyirik".

Onun sözlərinə görə, Rusiya və Ukraynanın nümayəndə heyətləri Belovejskdə danışıqlar aparmaq barədə birgə qərar qəbul ediblər.

***

Bu gün axşam saatlarında Ukrayna və Rusiya arasında danışıqların növbəti mərhələsi keçiriləcək.

Reyting.az xəbər verir ki, bunu Ukrayna Prezidentinin Ofisi təsdiqləyib.

Xatırladaq ki, bundan əvvəl Rusiya prezidentinin mətbuat katibi Dmitri Peskov Rusiya nümayəndə heyətinin martın 2-də axşama sarı danışıqların yeni raundunun keçiriləcəyi yerə gələcəyini deyib: "Ukrayna nümayəndələri ilə görüşə hazırıq".

O bildirib ki, Rusiya nümayəndə heyətinə yenə Vladimir Medinski rəhbərlik edəcək: "Ümid edirik ki, onlar gələcəklər".

Ana səhifəyə dön