Ərdoğan Putini Ukraynada təcili atəşkəsə çağırıb

Türkiyə və Rusiya prezdentləri Rəcəb Tayyib Ərdoğan və Vladimir Putin telefon danışığına başlayıblar.

Reyting.az Türkiyə KİV-lərinə istinadla xəbər verir ki, prezidentlər Ukrayna böhranını müzakirə edirlər.

***

Türkiyə prezidenti Rəcəb Tayyib Ərdoğan bu gün telefon danışığında Rusiya prezidenti Vladimir Putini Ukraynada təcili atəşkəsə çağırıb.

Reyting.az-ın xəbərinə görə, bu barədə Türkiyə Prezident Administrasiyası məlumat yayıb.

Məlumata görə, Ərdoğan Rusiya və Ukrayna arasında danışıqların başlamasının vacib olduğunu vurğulayıb. Qeyd edilib ki, Türkiyə prezidenti sülhün yolunu açmağı vacib sayıb.

***

Kremlin mətbuat xidməti V. Putin və R. T. Ərdoğanın telefon danışığı ilə bağlı məlumat yayıb.

Məlumatda bildirilir ki, telefon danışığı zamanı Putin Ukraynada xüsusi hərbi əməliyyatın gedişi barədə məlumat verib, bu kontekstdə prinsipial yanaşmaları və qiymətləndirmələri qeyd edib, qarşıya qoyulan əsas məqsəd və vəzifələri ətraflı izah edib.

Xüsusi əməliyyatın plana və qrafikə uyğun davam etdiyi vurğulanıb. V. Putin bildirib ki, Rusiya Silahlı Qüvvələri mülki şəxslərin həyatını xilas etmək və təhlükəsizliyini təmin etmək üçün mümkün olan hər şeyi edir, dəqiq zərbələr yalnız hərbi infrastruktur obyektlərinə endirilir: "Bunun fonunda Donbası intensiv atəşə tutan və Ukraynanın şəhər və qəsəbələrində faktiki olaraq girov götürülmüş mülki şəxslərdən, o cümlədən əcnəbilərdən “insan qalxanı” kimi istifadə edən millətçi, neonasist birləşmələrinin əməlləri xüsusi qəddarlığı və amansızlığı ilə seçilir".

Rusiya tərəfinin münaqişənin həlli üçün Ukrayna hakimiyyəti və xarici tərəfdaşlarla dialoqa hazır olduğu təsdiqlənib. Eyni zamanda, Ukrayna qüvvələrinin öz qüvvələrini və vasitələrini yenidən toplamaq üçün istifadə etdiyi danışıqlar prosesini uzatmaq cəhdlərinin nəticəsizliyinə diqqət çəkilib. Bu baxımdan xüsusi əməliyyatın dayandırılmasının yalnız Kiyevin hərbi əməliyyatları dayandırması və Rusiyanın məlum tələblərini yerinə yetirməsi şərtilə mümkün olduğu vurğulanıb.

Danışıqların planlaşdırılan növbəti raundu zamanı Ukrayna nümayəndələrinin yaranan reallıqları tam nəzərə alan daha konstruktiv yanaşma nümayiş etdirəcəyinə ümid ifadə olunub.

Rusiya və Türkiyə prezidentləri iki ölkənin diplomatik və hərbi idarələri arasında əlaqələrin davam etdirilməsinin vacibliyini bəyan ediblər. Vladimir Putin Rusiya tərəfinin Türkiyə vətəndaşlarının döyüş bölgələrindən təhlükəsiz təxliyəsi üçün bütün lazımi yardımı göstərməyə hazır olduğunu təsdiqləyib.

Rəcəb Tayyib Ərdoğan Rusiya mədəniyyətinə və onun xadimlərinə qarşı bir sıra Qərb dövlətlərində geniş vüsət alan kampaniyaya tənqidi qiymət verib.

Müxtəlif səviyyələrdə sıx təmasların davam etdirilməsi razılaşdırılıb.

Reyting.az

Ana səhifəyə dön